Read Rampi 1 Tesalonika 2 Bible Online

1 Tesalonika 2 - Rampi bible

1 Tesalonika 2

¹Halali-halali umbiꞌ ibahaꞌlukei hadoduomi kohupaꞌki pe ingkei hawaꞌi modangkeleꞌi.

²Kohandoaꞌangki hupaꞌ i kotami, ropoperima-rimaka hei ropononaꞌaka i kota Pilipi. Ibahaꞌmokei hapo to mewali pe ingka! Hei kehapoka woꞌo roꞌewa toaꞌ to woriꞌ i kota-kota, Pueꞌta mampokaroho lalingki hingkeꞌna kipodehoꞌ mampowutekikei Kareba Moromiꞌ to ka Pueꞌ Ala.

³Hawaꞌkei kirumbaꞌ mampetuntui poturuꞌ to salaꞌ. Hawaꞌi woꞌo uwaꞌ tungkaihane lalingki to kodake, hei hawaꞌka mangkodokoꞌi motobebea ba hihimolu.

⁴Hawaꞌka woꞌo mampowute Kareba Moromiꞌ hingkeꞌnalu nomotanaꞌ laline toaꞌ, angkana mampowuteluka hapo to mampomotanaꞌ Pueꞌ Ala, alaꞌ Io to moparesaꞌ lalingki hei Nopoꞌohika mampowute Kareba Moromiꞌ.

⁵Halali-halali, ibahaꞌkei, hawaꞌka mampowute hante wiharo to moꞌowi to motobebeakei. Hawaꞌka mampetomoromiꞌ hingkeꞌna pahuaka ba hapo-hapo ka ingkei. Pueꞌ Ala to mosobiꞌi!

⁶Hawaꞌka woꞌo mampaliꞌ konaꞌ pe ingkei ba pe toaꞌ ntaniꞌna. Kotuꞌuana, hawaꞌi woꞌo masalaꞌ ane niperenakika, alaꞌ ingka hieꞌe suronaluka mpuꞌu Kerisitu.

⁷Angkana moꞌalusuꞌ pambiarangki i lumbu-lumbumi, hibali haduo inoꞌ mampotundeꞌ hei morewahi anaꞌna.

⁸Alaꞌ komarimangki mpuꞌu, matimomoka mepaꞌani pe ingkei, handoꞌio podo Kareba Moromiꞌ to ka Pueꞌ, angkana kotuwuꞌki woꞌo. Alaꞌ komarimangki mpuꞌu pe ingkei!

⁹Halali-halali, bateꞌna ikolowoikei tene hohumbo komawongkoꞌki majama hampiha. Majamaka madori ando wini hingkeꞌna noꞌuwaꞌ pangkaki, hei hawaꞌi howeꞌ haduo to kipomasusa kolentuꞌangki mampoturuꞌkei Kareba Moromiꞌ to ka Pueꞌ Ala.

¹⁰Ibahaꞌkei waliangki i hinarona Pueꞌ: waliangki moromiꞌ i pampeꞌelena Pueꞌ Ala, mononto hei hawaꞌi uwaꞌ komasalaꞌangki pe ingkei to mepoꞌohi pe hi Yesu. Ingkei to mewali sabiꞌki moꞌawa hante Pueꞌ Ala.

¹¹Ibahaꞌkei perewahingki pe ingkei haduo-haduo, hibali haduo umoꞌ to mampoturuꞌ anaꞌna.

¹²Kipoturuꞌkei hei kipomaroho lalimi, hingkeꞌna tuwuꞌkei hintotoꞌ hante peleihana Pueꞌ Ala, to mowowoikei pe lali kodatuaNa hei komanobaꞌa.

¹³Uwaꞌ woꞌo halangkaꞌ to poko kipoꞌawerasiꞌi pe Pueꞌ Ala. Iomo i tempoki mampowute pohawaꞌna Pueꞌ Ala pe ingkei, ingkei mampehoromua hei mantorimo kareba tiꞌo, hawaꞌi hibali kareba to ka manusiaꞌ angkana kareba to ka Pueꞌ Ala. Io kolentuꞌa majama i lalimi to mepoꞌohi pe hi Yesu.

¹⁴Halali-halali, ingkei woꞌo motuntuni kotuwuꞌna jumaꞌa Yudea to mewali tumpuna Yesu Kerisitu. Ingkei mampolalamokei komaporiꞌ i roboꞌmi hibali to rohori jumaꞌana Pueꞌ Ala i Yudea ka toaꞌ-toaꞌ toYahudi.

¹⁵ToYahudi tiꞌohi to morokoꞌ Pueꞌ Yesu hante nabi-nabi, hei mampopoꞌioꞌioka. Iohi hawaꞌi mantolinei hapo to hintotoꞌ hante peleihana Pueꞌ Ala hei hawaꞌhi palei lekiꞌna toaꞌ,

¹⁶hei mosalemporihi lalangki hingkeꞌna hawaꞌka hohumbo mampowute Kareba Moromiꞌ pe toaꞌ to handoꞌiohi toYahudi, hantaro Kareba Moromiꞌ tiꞌo to mohompoꞌhi ka pehuku dosara. Mewaliꞌ, alaꞌ peloliuna waliare to kodake, meliu dosare. Alaꞌ kobukotana Pueꞌ Ala horiana hinewoꞌena nohukumohi.

¹⁷Halali-halali, hawaꞌi morue ka pokaꞌanta, popundaka mpuꞌu pe ingkei. Kehapoki mokaꞌa moꞌela, angkana lalinta tontona hidupaꞌ. Alaꞌ kopopundangki, kipaliꞌ mpuꞌu lala hingkeꞌna hohumboka nolou mokadoroꞌikei. Hei aku hi Paulu, haꞌumbora mpihamoꞌa dokoꞌ nolou mokadoroꞌikei, angkana datu tokodake mosalemporiꞌa.

¹⁹Kikodokoꞌi mpuꞌu mokadoroꞌikei, alaꞌ ane hupaꞌmo tempo kohupaꞌana hi Yesu Pueꞌta hei hirampuki i hinaroNa, himoreꞌi tene to hingkiꞌ mewali pepohinaruangki hei wuaꞌna pajamangki to kipomotanaꞌ?

²⁰Bateꞌna ingkei mpuꞌu to kipokodeꞌ hei kipomotanaꞌ!