Read Rampi 1 Tesalonika 3 Bible Online

1 Tesalonika 3 - Rampi bible

1 Tesalonika 3

¹Alaꞌ kohawaꞌnamo kibiaꞌ motaha kopopundangki, iomo hinaꞌ hi Timotius kirumbaꞌ nolou pe ingkei halalingki to uwaꞌ i kota Tesalonika hei ingka mampekau i kota Atena. Hi Timotius tiꞌo, awangki i lali jamana Pueꞌ Ala, alaꞌ io woꞌo mampowute Kareba Moromiꞌ noniuꞌ Kerisitu. Mewaliꞌ kirumbaꞌmo hi Timotius nolou pe ingkei, hingkeꞌna nopododoliꞌi lalimio hei nopokaroho pepoꞌohimio,

³hingkeꞌna hawaꞌi uwaꞌ haduo to bata-bata laline hei maꞌoruꞌ ka pepoꞌohina alaꞌ komaporiꞌ to morumpakei. Alaꞌ ibahaꞌlukei halali-halali, komaporiꞌ to morumpakei hieꞌe hintotoꞌ hante peleihana Pueꞌ Ala.

⁴I tempoki tene moꞌawa hante ingkei, kipowutemo umbiꞌ pe ingkei, toaꞌ to mepoꞌohi hingkiꞌ pahuahi komapori'. Hei ibahaꞌmokei hinewowoꞌena mewalimo.

⁵Alaꞌ kopopundangku mpuꞌu iomo hinaꞌ kurumbaꞌ hi Timotius nolou pe ingkei, hingkeꞌna kubahaꞌi hohumbo pepoꞌohimi, alaꞌ kikomomaꞌa, inioꞌ intu nokeloikei datu to kodake, hohumbokei nopokonawuꞌ horiana Kareba Moromiꞌ to kipowute hawaꞌi modumbuꞌ.

⁶Hinewoꞌena hi Timotius mahuliꞌmo hei nopowute pe ingka kareba to moromiꞌ hohumbo pepoꞌohimi pe Kerisitu hei pomepokarimami. Io mampatiꞌikika ingkei tontona mamponindi hapo to moromiꞌ noniuꞌ ingka. Hei dokoꞌkei mohidupaꞌ hante ingka hibali ingka dokoꞌka woꞌo mohidupaꞌ hante ingkei.

⁷Halali-halali, iomo horiana, i lali lekiꞌna komasusa hei komaporiꞌ, tepododolika alaꞌ kareba noniuꞌ ingkei. Pepoꞌohimi pe Kerisitu mampomotanaꞌ lalingki.

⁸Horiana hinewowoꞌena tontona maroho lalingki, alaꞌ pepoꞌohimi maroho pe Pueꞌ.

⁹Alaꞌ ingkei, horiana motanaꞌka i hinarona Pueꞌ Ala hei moꞌawerasiꞌka pe Pueꞌ Ala.

¹⁰I tempoki mekokae, moromiꞌ ando ba wini, ka lali-lalingki merapiꞌka pe Pueꞌ Ala hingkeꞌna holangkoka mokadoroꞌikei, alaꞌ kikodokoꞌi tene mampoturuꞌkei hingkeꞌna terononihi pepoꞌohimio.

¹¹Hinamo Pueꞌ Ala Umoꞌta hadoduoNa, hei Pueꞌta Yesu mampaꞌanika lala hingkiꞌ mohidupaꞌ hante ingkei!

¹²Hinamo Pueꞌ mowalikei pedeꞌ momepokarima haduo hei haduo, mampokarima lekiꞌna toaꞌ horiana rimami tiꞌo terononihi hibali rimangki pe ingkei.

¹³Kiperapiꞌ pe Pueꞌ hingkeꞌna Nopokaroho lalimi, hingkeꞌna nomoromiꞌ tuwuꞌmi hante tuwuꞌ mangkolehi hawaꞌi uwaꞌ komasalaꞌmi i hinarona Pueꞌ Ala Umoꞌta ikohupaꞌna huliꞌ intu Pueꞌta Yesu moꞌawa hante lekiꞌ-lekiꞌna toaꞌNa. Amin.