Read Rampi 1 Tesalonika 4 Bible Online

1 Tesalonika 4 - Rampi bible

1 Tesalonika 4

¹Halali-halali, kololiuhana, kipaꞌanimokei pepoturuꞌ noniuꞌ hohumbo tuwuꞌ to mampomotanaꞌ lalina Pueꞌ Ala. Umbiꞌ iwalimokei hibali tiꞌo, angkana i lali kuasaꞌna Pueꞌ Yesu, kiperapiꞌ mpololeke pe ingkei hingkeꞌna pedeꞌ mampomotanaꞌkei lalina Pueꞌ Ala.

²Alaꞌ ibahaꞌmokei poturuꞌ-poturuꞌ to ihorimokei ka ingka, kipowute i lali konaꞌna Pueꞌ Yesu.

³Hieꞌemola peleihane Pueꞌ Ala, hingkeꞌna tuwuꞌkei mangkolehi anioꞌ mebualosi,

⁴aginamo moroako haduo towoweꞌe mewali hantambimu, hei morewahi adaꞌ kohamoko hei pomeꞌadaꞌi to mampomotanaꞌ lalina Pueꞌ hei toaꞌ.

⁵Anioꞌko tuwuꞌ motuntuni peleihana pekirimu to kodake, mowalia pelei-leihamu pe hantambimu ba pe maꞌanimu hei mampelapiki hantambimu ba maꞌanimu pe towoweꞌe ntaniꞌna ba pe tomaꞌani ntaniꞌna, hibali to nowali toaꞌ to hawaꞌi pobahaꞌ Pueꞌ Ala.

⁶Hibali tiꞌo anioꞌ nohaduo toaꞌ mowali salaꞌ pe hangko hampepoꞌohina ba mobagiuꞌi, hampiha ingkei ukomokei nipaꞌani pepaꞌingaꞌi to makasaraꞌ, iomo Pueꞌ hingkiꞌ mohuku toaꞌ-toaꞌ to mowali walia to hibali tiꞌo.

⁷Pueꞌ Ala mowowoiki, handoꞌio hingkeꞌna tuwuꞌki mowalia ngkodake, angkana tuwuꞌki mowalia to mampomotanaꞌ lalina Pueꞌ.

⁸Iomo horiana ane uwaꞌ toaꞌ to mosapuaka poturuꞌ hieꞌe, handoꞌio manusiaꞌ to nosapuaka, angkana mosapuaka Pueꞌ Ala, to mampaꞌanikei Inohaꞌ MangkolehiNa.

⁹Kotuꞌuana hawaꞌi paralu kiꞌukiꞌkikei poturuꞌ pomepokarima i hangko hampepoꞌohinta, alaꞌ Pueꞌ Ala mampagurumokei hingkeꞌna momepokarimakei haduo hei haduo.

¹⁰Tongawamo komarimami pe lekiꞌ-lekiꞌna halali hampepoꞌohimi i lekiꞌna woiꞌ Makedonia. Angkana kiperapiꞌ mpuꞌu, halali-halali, hingkeꞌna pedeꞌ momepokarimakei.

¹¹Hinamo tuwuꞌkei sabaraꞌ. Iwalimokei hieꞌe mewali pepotinto i lali kotuwuꞌmi, inioꞌkei mampekahi urusiana awami. Majamakei mampaliꞌ kopongkonami, hibali to kipagurukimokei hampiha.

¹²Ane iwalikei hatoꞌo, hawaꞌkei hingkiꞌ mohinaru pe toaꞌ ntaniꞌna, hei hingkiꞌ roꞌadaꞌikei toaꞌ to hawaꞌhi mepoꞌohi pe Pueꞌ Yesu.

¹³Halali-halali, tungkaihana lalingki hingkeꞌna ibahaꞌkei noniuꞌ toaꞌ to mahimohi, hingkeꞌna hawaꞌi masusa lalimi hibali toaꞌ to hawaꞌi uwaꞌ pepohinaruara pe Pueꞌ.

¹⁴Alaꞌ topoꞌohimo Pueꞌ Yesu mahi hei tuwuꞌ huliꞌ, hatoꞌo woꞌo kotopoꞌohine lekiꞌ-lekiꞌna, toaꞌ to mahimohi to mepoꞌohi pe Io hingkiꞌ nopopeꞌarohi Pueꞌ Ala. Ane hupaꞌmoꞌi Pueꞌ Yesu i korompihana, Pueꞌ Ala hingkiꞌ mangkomi toaꞌ tiꞌo moꞌawa hante Io.

¹⁵Noniuꞌ tiꞌo, hieꞌemo pepoturuꞌne Pueꞌ to hingkiꞌ kipowute pe ingkei, iomo i tempona Pueꞌ Yesu mehupaꞌ, ingkiꞌ to tuwuꞌluki tene hawaꞌki hingkiꞌ mampedului to mahimo.

¹⁶Alaꞌ ane temponamoꞌi Pueꞌ Yesu mehupaꞌ ka Suruga, hingkiꞌ tohori loaꞌne malaꞌeka meꞌoꞌando hei tandaꞌ moni torompeꞌna Pueꞌ Ala. Hei i tempo tiꞌo, hingkiꞌ tuwuꞌ huliꞌ lekiꞌna toaꞌ to mahi to mepoꞌohi pe Kerisitu.

¹⁷Uko tiꞌo ingkiꞌ to tuwuꞌlu tene tempo tiꞌo, hingkiꞌ nihiniki moꞌawa-awa hante iohi i lali kini, hei mohidupaꞌki hante Pueꞌ i raoha, katoꞌo ingkiꞌ meꞌohaꞌki moꞌawa Pueꞌ wute nantolou-louna.

¹⁸Mewaliꞌ halali-halali, hinamo momepokarohokei haduo hei haduo hante wiharo hieꞌe.