Read Rampi 1 Tesalonika 5 Bible Online

1 Tesalonika 5 - Rampi bible

1 Tesalonika 5

¹Halali-halali, hawaꞌi paralu kiꞌukiꞌkikei hiwaꞌimbo ando kohupaꞌane Pueꞌ Yesu.

²Alaꞌ ibahaꞌmokei hadoduomi hante mononto ando kohupaꞌne Pueꞌ, hingkiꞌ hupaꞌ hibali topanako i halumbu wini.

³Ikohandoaꞌana tene hupaꞌ tempone, toaꞌ to hawaꞌhi mepoꞌohi pe Pueꞌ Ala hingkiꞌ mantiꞌi, “Moromiꞌ mpuꞌu kotuwuꞌte, hawaꞌi uwaꞌ komotehuꞌnte.” Angkana i tempo tiꞌo woꞌo, hangkaꞌ-hangkaꞌlu mehupaꞌ morumpahi komaporiꞌ to monono, hibali haduo towoweꞌe to nokomaporiꞌi hingkiꞌ moꞌanaꞌ. Hawaꞌi uwaꞌ podo haduo mampepoliliꞌi pehukuna Pueꞌ Ala.

⁴Angkana hawaꞌkei hibali toaꞌ to tuwuꞌ i lali komokorindi, horiana i ando tiꞌo hokohi hibali to nokohupaꞌi topanako.

⁵Ingkei lekiꞌ-lekiꞌmi tuwuꞌ i lali komobaro hante mowalia to moromiꞌ hibali tuwuꞌ i andona, hawaꞌi hibali toaꞌ to tuwuꞌ i lali komokorindi to mowalia ngkodake.

⁶Iomo horiana inioꞌkei lembeꞌ toturu hibali toaꞌ to hawaꞌi matimomo, hinamo ingkei tuwuꞌ i lali kosabaraꞌ inioꞌ mowalia ngkodake,

⁷alaꞌ i tempo wini toaꞌ lembeꞌluhi toturu hante malanu-lanulu.

⁸Angkana ingkiꞌ hieꞌe toaꞌ topobahaꞌ to mobaro, alaꞌ tiꞌo pekirinta hangangaa mobaro. Hangangaa tontoki mepoꞌohi pe Pueꞌ hei marimaki pe toaꞌ ntaniꞌ hei topohinaru Pueꞌ Ala hingkiꞌ mamposalamaꞌki. Iomola laba to topakeꞌ moꞌewa kuasaꞌ to kodake.

⁹Alaꞌ Pueꞌ Ala moꞌuwiꞌki handoꞌio hingkiꞌ mohukuki angkana mamposalamaꞌki moliu i Pueꞌta Yesu Kerisitu.

¹⁰Yesu Kerisitu mahi mampohorungaki, hingkeꞌna ane hupaꞌI, moromiꞌ mahi ba tuwuꞌluki tene, i tempo tiꞌo hingkiꞌ tuwuꞌki moꞌawa hante Io.

¹¹Iomo horiana, halali-halali, hangangaa momepokaroho lalikei hei momepaguru haduo hei haduo, hibali to iwalimokei hinewowoꞌena.

¹²Halali-halali, kiperapiꞌ hingkeꞌna i lumbu-lumbumi iꞌadaꞌikei toaꞌ to majama madori mampopopatengkaꞌ jamana Pueꞌ, iohi to noꞌuwiꞌmo Pueꞌ hingkeꞌna motadulakoikei hei mokamorokikei.

¹³Hei tuꞌu-tuꞌu niꞌadaꞌihi hante rima alaꞌ jamara, hei mohintuwuꞌkei haduo hei haduo.

¹⁴Halali-halali, kiperapiꞌ woꞌo hingkeꞌna ikamorokihi to hawaꞌi hiniꞌ majama. Ipokarohokei toaꞌ to mororangko pepoꞌohire, isulungikei toaꞌ to paralu nisulungi, hangangaa sabaraꞌkei i lekiꞌ-lekiꞌna toaꞌ.

¹⁵Elekei, ane uwaꞌi mowali to kodake pe ingkei, inioꞌ ihowonikei, sangadinareꞌi poko iwalikei to moromiꞌ pe halalimi tiꞌo hei i lekiꞌ-lekiꞌna toaꞌ.

¹⁶Alaꞌ pohaꞌanumi hante Yesu Kerisitu, poko motanaꞌkei, hei poko mekokaekei, moꞌawerasiꞌkei i lali hapo-hapo to mewali, alaꞌ tiꞌo peleihana Pueꞌ Ala pe ingkei.

¹⁹Anioꞌkei moꞌewa Inohaꞌ Mangkolehina Pueꞌ Ala to majama i lalimi,

²⁰hei anioꞌ niroa nangkoꞌ kareba to nopaꞌanikikei Pueꞌ Ala.

²¹Hangangaa ipaliꞌkei lekiꞌ kototuꞌuane hei to moromiꞌ ituntunikei.

²²Ipomoꞌelakei lalimi ka langkaꞌ-langkaꞌna to kodake.

²³Hinamo Pueꞌ Ala to mepaꞌani romiꞌ ngkotuwuꞌ mampomangkolehikei lekiꞌmi hei hinamo inohaꞌ, tanuanaꞌ hei wotami terewahi moromiꞌ hingkeꞌna hawaꞌi uwaꞌ komakuraꞌ hei komasalaꞌa i pehupaꞌna Yesu Kerisitu Pueꞌta.

²⁴Pueꞌ Ala to moꞌuwiꞌkei iomo Pueꞌ Ala to tungkuꞌ, hei hapo to Nodandi bateꞌna hingkiꞌ Nopobuhoꞌi.

²⁵Halali-halali, kiperapiꞌ hingkeꞌna ipekokaekika woꞌo.

²⁶Ipowute tabeangki hante komarimangki i lekiꞌ-lekiꞌna halali hampepoꞌohinta.

²⁷I lali konaꞌna Pueꞌ Yesu, kuperapiꞌ mpololeke hingkeꞌna suraꞌ hieꞌe ibasakei i hinarona lekiꞌ-lekiꞌna halali hampepoꞌohinta to uwaꞌhi itoꞌo.

²⁸Hinamo rima ngkotuwuꞌ ka Yesu Kerisitu, Pueꞌta, mampoꞌowonikei.