Read Rampi 2 Tesalonika 1 Bible Online

2 Tesalonika 1 - Rampi bible

2 Tesalonika 1

¹Suraꞌ hieꞌe ka ingka: hi Paulu, hi Silas hante hi Timotius, kipokatu pe jumaꞌa Tesalonika i lali Pueꞌ Ala Umoꞌta hante i lali Pueꞌ Yesu Kerisitu.

²Romiꞌ ngkotuwuꞌ hante rima ngkotuwuꞌ ka Pueꞌ Ala, Umoꞌta, hei ka Pueꞌ Yesu Kerisitu moꞌowonikei.

³Ingka hangangaa poko moꞌawerasiꞌka pe Pueꞌ Ala, alaꞌ ingkei, halali-halali. Hei umbiꞌna masipatoꞌ kipoꞌawerasiꞌi, alaꞌ pepoꞌohimi pedeꞌ terononihi hante rimami pe to haduo hei haduo pedeꞌ maroho i iliꞌmi,

⁴iomo horiana mololitaka i lali komotanaꞌ pe jumaꞌa-jumaꞌana Pueꞌ Ala to ntaniꞌna, ingka hadoduongki motanaꞌ hei kiperenaki noniuꞌ ingkei alaꞌ kosabaraꞌmi hei pepoꞌohimi i lali morii hinangkana pepopoꞌioꞌio hante petaloleuꞌ to ihorikei.

⁵Komarohona pepoꞌohimi mampotongawa komonontona pobutusina Pueꞌ Ala. Motuntuni pobutusiNa, ingkei hingkiꞌ mewali toaꞌNa i lali kodatuaNa, alaꞌ mantahakei i lali komaporiꞌ nokomi pepoꞌohimi pe Pueꞌ Ala.

⁶Alaꞌ tuꞌu mononto Pueꞌ Ala hingkiꞌ mohowoni waliara to medihaꞌ-dihaꞌ pe ingkei.

⁷Hei Io hingkiꞌ mepaꞌani kohimpononohaꞌa pe ingkei to nidihaꞌ-dihaꞌ, hei pe ingka woꞌo, i tempona Pueꞌ Yesu mengkohou ka Suruga hei mampopemombaha wotaNa moꞌawa-awa hante malaꞌeka-malaꞌekaNa, i lali kuasaꞌNa, i lali api to makiꞌ,

⁸hei mampoꞌuwaꞌ pehowoni pe toaꞌ tota pebahaꞌ pe Pueꞌ Ala hei pe to hawaꞌhi hiniꞌ mampetuntui kareba noniuꞌ hi Yesu Pueꞌta.

⁹Iohi hingkiꞌ mantorimo pehuku to manasa to hawaꞌi mokoꞌukoa wute nantolou-louna, nitubehi moꞌela ka hinarona Pueꞌ, horiana hamboaꞌmohi hingkiꞌ pangkiꞌ kuasaꞌNa hei wantaNa to kodeꞌ.

¹⁰I tempona Io mehupaꞌ i ando tiꞌo, Io hingkiꞌ nipokodeꞌ i lumbuna toaꞌna Pueꞌ Ala, hei hingkiꞌ nopohele lekiꞌna toaꞌ to mepoꞌohi, alaꞌ lolita to kikomi ipoꞌohimokei.

¹¹Iomo horiana kipekokaekikei nturusi, halali-halali. Mekokaeka pe Pueꞌ Ala Umoꞌta. Kiperapiꞌ hingkeꞌna Nopopewali tungkaihaNe i lali kotuwuꞌmi wute Norekeꞌkei toaꞌ to hintotoꞌ notiꞌi toaꞌNa, alaꞌ Noꞌuwiꞌmokei. Kiperapiꞌ i lali kuasaꞌNa, Nopopewali lekiꞌ-lekiꞌna tungkaihami to moromiꞌ, hei Nopoganaꞌi lekiꞌ-lekiꞌne to ijamakei alaꞌ pepoꞌohimi pe Pueꞌ Yesu.

¹²Tungkaihangki mekokae watoꞌo, hingkeꞌna nokomi waliami to moromiꞌ, konaꞌna Yesu Pueꞌta ropokodeꞌ, hei hingkeꞌna ingkei woꞌo hingkiꞌ nopokodeꞌ Pueꞌ Yesu. Lekiꞌ-lekiꞌna tiꞌo hangangaa mewali alaꞌ kopopuhiꞌna lalina Pueꞌ Ala Umoꞌta hei Pueꞌ Yesu Kerisitu.