Read Rampi 2 Tesalonika 2 Bible Online

2 Tesalonika 2 - Rampi bible

2 Tesalonika 2

¹Noniuꞌ pehupaꞌna Pueꞌta Yesu Kerisitu hei koterampuanta hante Io kipowute pe ingkei, halali-halali,

²Inioꞌkei hohiꞌ motehuꞌ ba wewoꞌ hei masusa lalimi, ane pahorikei toaꞌ mantiꞌi Pueꞌ mehupaꞌmo huliꞌ. Kehapoꞌi rotiꞌi, robahaꞌ ka Inohaꞌ Mangkolehi, ba rohori ka toaꞌ ntaniꞌ ba rotiꞌi suraꞌ ka ingka, inioꞌkei ipoꞌohi, alaꞌ lekiꞌna tiꞌo hawaꞌi tuꞌu.

³Inioꞌkei hiniꞌ lalimi ropowewoꞌ hante hohumbo lala to rowali! Alaꞌ ikohandoaꞌana ando tiꞌo mehupaꞌ hingkiꞌ uwaꞌ to mewali medulu, woriꞌ toaꞌ to buntoꞌ, maꞌoruꞌ hei meꞌewa pe Pueꞌ Ala. Hei haduo toaꞌ to kodake waliana hingkiꞌ mampomombaha wotana hei io to monontomo nipelubaꞌ pe naraka.

⁴Alaꞌ Iomo poniꞌ to mampokokodeꞌ. Io mahura i Tambina Pueꞌ Ala hei hingkiꞌ mangakuꞌ io Pueꞌ Ala.

⁵Hawaꞌkeireꞌi ikolowoi tiꞌo, woriꞌ mpihamo kutiꞌikikei, i tempoku tene moꞌawa-awa hante ingkei?

⁶Hinewowoꞌena ibahaꞌmokei hapo to motaha lekiꞌna hapo to hingkiꞌ mewali, io hingkiꞌ mampotongawa kuasaꞌna i tempo to nopakatantumo Pueꞌ.

⁷Hei tempo hieꞌe, kuasaꞌna to kodake menele ngkandiiꞌ-ndiiꞌ i duniaꞌ. Angkana io handoaꞌi tene hupaꞌ, alaꞌ uwaꞌ tene to motahaꞌi. Mewaliꞌ, ane to motaha tiꞌo maweaꞌmo,

⁸i tempo tiꞌomola to mepobuntoꞌ hingkiꞌ mampembombaha wotana, angkana Pueꞌ Yesu hingkiꞌ morokoꞌi hante Inohaꞌ ka omeꞌNa hei hingkiꞌ mamporopuꞌi, ane Io mehupaꞌ huliꞌ.

⁹Toaꞌ to kodake tiꞌo hingkiꞌ hupaꞌ hei hingkiꞌ mopakeꞌ kuasaꞌna Belisiꞌ mowali woriꞌ langkaꞌna tandaꞌ to mepohele to mepomonawuꞌ.

¹⁰Lekiꞌ-lekiꞌna akalana to kodake hingkiꞌ nopakeꞌ mampokonawuꞌhi toaꞌ to monontomo horewuꞌ, alaꞌ hawaꞌhi hiniꞌ motuntuni pohawaꞌna Pueꞌ to mamposalamaꞌhi ka pehuku salaꞌra.

¹¹Iomo horiana Pueꞌ Ala mowali kowuliana pekirira, horiana mampoꞌohihi tota tuꞌu,

¹²hingkeꞌna nihukuhi lekiꞌne toaꞌ to hawaꞌhi mepoꞌohi i komaniuꞌa hei paleihi walia to kodake.

¹³Angkana ingka hangangaa poko moꞌawerasiꞌka pe Pueꞌ Ala, alaꞌ ingkei poko halali, to Nopokarima Pueꞌ Ala. Uluꞌana Noꞌuwiꞌmokei Pueꞌ Ala, hingkiꞌ Noposalamaꞌ i lali Inohaꞌna Pueꞌ Ala to mampomangkolehikei hei i lali komaniuꞌa to ipoꞌohikei,

¹⁴Io mowowoikei i tempomi mampehoromua Kareba Moromiꞌ to kipowutekikei hingkeꞌna pahuakei dolaꞌmi i wantana Pueꞌta, Yesu Kerisitu.

¹⁵Metotiꞌimokei maroho hei motuntuni poturuꞌ-poturuꞌ to itorimomokei ka ingka, moromiꞌ wiharo, ba to teꞌukiꞌ.

¹⁶Pueꞌ Ala mampetidoꞌki rimana, hei Nopokaroho lalinte wute nantolou-louna, hei Nopaꞌaniki pepohinarua to moromiꞌ alaꞌ kopopuhiꞌna laliNa. Iomo hinaꞌ mekokaeka pe Pueꞌta, Yesu Kerisitu, hei Pueꞌ Ala, Umoꞌta, hingkeꞌna Nopokaroho hei Nopololebaꞌ lalimi, hingkeꞌna moromiꞌ lekiꞌ-lekiꞌna pololitami hante waliami.