Read Rampi 2 Tesalonika 3 Bible Online

2 Tesalonika 3 - Rampi bible

2 Tesalonika 3

¹Kololiuhana, halali-halali, kuperapiꞌ hingkeꞌna ipekokaekika woꞌo hingkeꞌna koworiꞌ-woriꞌa toaꞌ to hingkiꞌ mampehoromua hei mantorimo pohawaꞌna Pueꞌ, hibali to mewali i ingkei hampiha.

²Kiperapiꞌ woꞌo hingkeꞌna Pueꞌ Ala mampolohoꞌka ka toaꞌ to kodake hei to mampoperima-rimaka, alaꞌ hawaꞌi lekiꞌna toaꞌ, mampoꞌohi pohawaꞌna Pueꞌ Ala.

³Angkana Pueꞌ tontona mampobuhoꞌi dandiNa. Io hingkiꞌ mampomaroho lalimu hei morewahiko ka lekiꞌna to hawaꞌi moromiꞌ.

⁴Kipoꞌohi i lali konaꞌna Pueꞌ, alaꞌ hapo to kipepahaimo pe ingkei, iwalimokei hei tontona iwalikei nturusi.

⁵Kipekokaekikei hingkeꞌna Pueꞌ Yesu morandakei wute ibahaꞌkei mpuꞌu rimana Pueꞌ Ala pe ingkei hei Kerisitu mepaꞌani kotungkuꞌa pe ingkei.

⁶Angkana pepahangki pe ingkei halali-halali, i lali konaꞌna Pueꞌta Yesu Kerisitu, hingkeꞌna mekoꞌelakei ka lekiꞌna halalimi to hawaꞌi hiniꞌ majama hei to hawaꞌi hiniꞌ motuntuni poturuꞌ to itorimokei ka ingka.

⁷Alaꞌ ibahaꞌlukei hadoduomi, hohumbo ingkei hangangaa mampetuntui waliangki, alaꞌ ingka hawaꞌka himpohente majama i lumbumi,

⁸hei hawaꞌka mangka momoto pangkana toaꞌ angkana mampaliꞌka hante holemuꞌ ando wini, hingkeꞌna hawaꞌi nopomasusa hihimo i lumbumi,

⁹hawaꞌi mopalaiha hawaꞌka masipatoꞌ merapiꞌ pe ingkei kopongkonangki, angkana mehupaꞌka mepaꞌani pandiri' hingkeꞌna ipetuntuikei.

¹⁰I tempoki tene moꞌawa-awa hante ingkei hampiha, uwaꞌmo pepakaꞌingaꞌi pe ingkei, hihimo toaꞌ to hawaꞌi hiniꞌ majama, anioꞌmo mangka.

¹¹Kitiꞌikikei alaꞌ kihori uwaꞌ toaꞌ to hawaꞌi mononto tuwuꞌne hante hawaꞌi majama, angkana mampowewoꞌlu hante hapo tota modumbuꞌ.

¹²Toaꞌ to hatoꞌo kikamoroki hante kipoturuꞌ i lali Pueꞌ Yesu Kerisitu, hingkeꞌna iohi tontolu lebaꞌ mohinoroi jamara hingkeꞌna pahuahi pangkara hadoduora.

¹³Kipetiꞌiki pe ingkei, inioꞌkei luleꞌ mowalia to moromiꞌ.

¹⁴Rapaꞌna, ane uwaꞌ toaꞌ to hawaꞌi hiniꞌ motuntuni hapo to kiꞌukiꞌ i lali suraꞌ hieꞌe, nipoꞌilali toaꞌ tiꞌo. Anioꞌ nipoꞌawahi, hingkeꞌna robahaꞌ komasalaꞌre hei mohilihi.

¹⁵Angkana inioꞌkei ipohibali poniꞌmi, moromiꞌ rahimo ane ipoturuꞌkei hibali halalimi.

¹⁶Pueꞌ moromiꞌ, hinamo mampaꞌaniki nturusi romiꞌ ngkotuwuꞌ i langkaꞌ-langkaꞌna pe ingkei. Pueꞌ moꞌowonikei lekiꞌmi.

¹⁷Tabea ka aku, hi Paulu. Tabea hieꞌe kuꞌukiꞌ hante korawengku hadoduongku. Hieꞌemo tandaꞌne i lali lekiꞌna suraꞌ, waheꞌe kuꞌukiꞌ.

¹⁸Rima Ngkotuwuꞌ ka Yesu Kerisitu, Pueꞌta moꞌowonikei lekiꞌmi.