Read Rampi 1 Timotius 1 Bible Online

1 Timotius 1 - Rampi bible

1 Timotius 1

¹Suraꞌ hieꞌe ka hi Paulu, surona Yesu Kerisitu motuntuni pohawaꞌna Pueꞌ Ala to mamposalamaꞌki hei pohawaꞌna Yesu Kerisitu pepohinaruanta.

²Suraꞌ hieꞌe kupokatu pe ingko, Timotius, to kupoꞌanaꞌ alaꞌ pepoꞌohimu pe Kerisitu. Mekokaeꞌa pe Pueꞌ Ala, Umoꞌta, hante pe Yesu Kerisitu, Pueꞌta, hingkeꞌna Nopaꞌaniko rima ngkotuwuꞌ, hei Notidoꞌkiko rimaNe, hei Nopaꞌaniko romiꞌ ngkotuwuꞌ.

³Kulei ane lebaꞌko i Epesu hibali to kutiꞌikiko tempoku nolou pe Makedonia, alaꞌ i Epesu uwaꞌ haꞌumbora duo toaꞌ to mepoturuꞌ to hawaꞌi maniuꞌ, hei hangangaa ikamorokihi.

⁴Itiꞌikihi hingkeꞌna hamboaꞌmohi poko mampehoromua lolita-lolita wuti hei lolita-lolita pemuleꞌa to hawaꞌi mokoꞌukoa to mewali poheꞌeroa. Lekiꞌna tiꞌo mampowuli toaꞌ horiana hawaꞌi robahaꞌ hohumbo lalane Pueꞌ mamposalamaꞌ manusiaꞌ moliu i pepoꞌohinta pe Yesu Kerisitu.

⁵Tungkaihana poturuꞌku hieꞌe, hingkeꞌna lekiꞌ-lekiꞌta hangangaa momepokarimaki ka kopopuhiꞌna lalinta, pekiri to moromiꞌ hante pepoꞌohi to tuꞌu-tuꞌu pe Pueꞌ Ala.

⁶Uwaꞌhi haꞌumbora toaꞌ to hamboaꞌi motuntuni lala to mononto hieꞌe, angkana motuntunihi lala ntaniꞌna, hei mampomehoniꞌ-honiꞌluhi nturusi lolita to hawaꞌi modumbuꞌ.

⁷Rokodokoꞌi mepoturuꞌ noniuꞌ i Aturana hi Musa, angkana hawaꞌi robahaꞌ palaihane hapo to ropepoturuꞌki tiꞌo. Rotiꞌi, mapandehi mampokononto palaihana Aturana hi Musa, hantaro hawaꞌi robahaꞌ tungkaihane.

⁸Tobahaꞌmo komoromiꞌne Aturana hi Musa, asalana totuntuni hintotoꞌ hante tungkaihana.

⁹Hangangaa topoꞌilali tungkaihane Aturana hi Musa hingkeꞌna nomoromiꞌ kotopopatengkaꞌne. Aturana hi Musa hawaꞌi mokamoroki toaꞌ to mononto waliara. Angkana tungkaihana pe toaꞌ to molungkaꞌi atura, toaꞌ to meꞌewa, toaꞌ to hawaꞌhi mengkoruꞌ pe Pueꞌ Ala, toaꞌ to madosa, toaꞌ to hawaꞌhi moꞌagama, toaꞌ to mampetuntuiluhi peleihana lalira i duniaꞌ hieꞌe, toaꞌ to morokoꞌ inoꞌra ba umoꞌra, hei to morokoꞌ toaꞌ ntaniꞌna,

¹⁰toaꞌ to mebualosi hante toaꞌ to mowali salaꞌ hibali to nowali tomaꞌani hante hangko tomaꞌanina ba towoweꞌe hante hangko towoweꞌena. To niꞌopikihi woꞌo, toaꞌ to motawaniꞌ awana hingkeꞌna nipohawiꞌi, toaꞌ to mowuti, toaꞌ to mosobiꞌi wuti, hei lekiꞌ-lekiꞌna toaꞌ to mowali hapo to hawaꞌi hintotoꞌ hante poturuꞌ to tuꞌu.

¹¹Poturuꞌ tiꞌo hintotoꞌ hante Kareba Moromiꞌ to Nopoꞌohikiꞌa Pueꞌ kupowute. Kareba Moromiꞌ tiꞌo noniuꞌ Pueꞌ Ala to makuasaꞌ hei masipatoꞌ nipokodeꞌ.

¹²Moꞌawerasiꞌa pe Pueꞌta Yesu Kerisitu, to mampaꞌaniꞌa komaroho, ala Noꞌele tungkuꞌa hei Nopoꞌohiꞌa horiana Nohiniꞌa mewali topajamaNa.

¹³Kehapoꞌi hampiha kutaloleuꞌ hante kupononaꞌa hi Yesu hei kupopoꞌioꞌio to mepoꞌohi pe Io, angkana Pueꞌ Ala mangkarimaꞌa alaꞌ tempo tiꞌo handoaꞌa mepoꞌohi, mewaliꞌ hawaꞌi kubahaꞌ hapo-hapo to kuwali.

¹⁴Angkana kehapoꞌi woriꞌ mpololeke dosangka, Nopokarorimaꞌa mpololeke Pueꞌ hei Nopaꞌaniꞌa rima ngkotuwuꞌ, horiana mepoꞌohiꞌa pe hi Yesu Kerisitu hei mampokarimaꞌa toaꞌ ntaniꞌna.

¹⁵Tuꞌu mpuꞌu lolita to mantiꞌi, “Hi Yesu Kerisitu humei pe duniaꞌ hingkeꞌna mamposalamaꞌ to madosa ka pehuku dosara.” Tuꞌu mpuꞌu lolita tiꞌo hei masipatoꞌ topoꞌohi. Hei ka lekiꞌ-lekiꞌna toaꞌ to madosa, akumola to madosa mpololeke.

¹⁶Kehapoꞌi watoꞌo, tongawa rimane Pueꞌ Ala i aku, hingkeꞌna i lali kotuwuꞌku hieꞌe to madosa mpololeke, tongawamo mpuꞌu kosabaraꞌne hi Yesu Kerisitu, horiana mewaliꞌa pandiri' pe lekiꞌ-lekiꞌna toaꞌ hingkeꞌna mepoꞌohihi woꞌo pe hi Yesu hante pahuahi kotuwuꞌ to wolaꞌ to hawaꞌi mokoꞌukoa.

¹⁷Masipatoꞌ mpuꞌu toponindi hei topokodeꞌ Pueꞌ Ala, Datunta to moparenta wute nantolou-louna, hei to hawaꞌi mokoꞌukoa, to hawaꞌi niꞌokiꞌ, hei to hawaꞌi uwaꞌ kohibobaliaNe. Topokodeꞌ konaꞌNe wute nantolou-louna. Amin.

¹⁸Timotius to kupoꞌanaꞌ, kuperapiꞌ hingkeꞌna ipetuntuiꞌi poturuꞌka to kupowutekiko hieꞌe. Iponindiꞌ lolita to nopowutemo toaꞌ noniuꞌ ingko, lolita tiꞌo to mampokaroho lalimu, hingkeꞌna nomaroho patengkaꞌne jama to itiko hibali haduo surodadu to moponiꞌ.

¹⁹Lebaꞌko i lali pepoꞌohimu, hei iwali nturusi walia to moromiꞌ motuntuni lalimu to moromiꞌ. Uwaꞌ haꞌumbora duo toaꞌ to hawaꞌi motuntuni lalina to moromiꞌ, horiana hawaꞌi modumbuꞌ pepoꞌohire,

²⁰hibali hi Himeneu hante hi Alesande. To roduo tiꞌo kupeserakaki pe kuasaꞌna Belisiꞌ hingkeꞌna hamboaꞌmohi motaloleuꞌ Pueꞌ Ala.