Read Rampi 1 Timotius 2 Bible Online

1 Timotius 2 - Rampi bible

1 Timotius 2

¹Kaꞌisaꞌ-isaꞌ kuperapiꞌ hingkeꞌna ingkei to mepoꞌohi mekokae pe Pueꞌ Ala, merapiꞌ, moꞌawerasiꞌ hei mampekokaeki toaꞌ ntaniꞌna. Lekiꞌna tiꞌo iwalikei pe lekiꞌ-lekiꞌna toaꞌ.

²Lekiꞌ-lekiꞌna datu hante topoparenta, hangangaa topekokaekihi, hingkeꞌna moromiꞌ kotuwuꞌte hei hawaꞌi uwaꞌ toaꞌ to mampopoꞌioꞌioki, hingkeꞌna holangkoki menomba pe Pueꞌ Ala hei mowaliki nturusi walia to hintotoꞌ rotorimo hangko awanta.

³Moromiꞌ ane mekokaeki hibali tiꞌo, alaꞌ tiꞌo mampomotanaꞌ lalina Pueꞌ Ala, to mohompoꞌki.

⁴Alaꞌ peleihaNa hingkeꞌna lekiꞌ-lekiꞌna toaꞌ niposalamaꞌ ka pehuku dosa, hei pobahaꞌ pepoturuꞌ to tuꞌu.

⁵Pueꞌ Ala haduolu, hei haduolu woꞌo To mampelumbui Pueꞌ Ala hante manusiaꞌ. To mampelumbui tiꞌo toaꞌlu woꞌo, iomo Yesu Kerisitu.

⁶Io to mampewei wotaNa nirokoꞌ hingkeꞌna mohompoꞌ lekiꞌ-lekiꞌna toaꞌ. Tiꞌo mewali i tempo to nopokonontomo Pueꞌ Ala, hingkeꞌna tongawa pe ingkiꞌ komarimane Pueꞌ Ala mohompoꞌ lekiꞌ-lekiꞌna toaꞌ ka pehuku dosa.

⁷Iomo horiana nirumbaꞌa pe toaꞌ to handoꞌiohi toYahudi mampekarebaiki noniuꞌ pepoꞌohi to tuꞌu. Lekiꞌna to kutiꞌimo tuꞌu, hawaꞌa mowuti.

⁸Peleingku hingkeꞌna i umbo-umbolu porampuami menomba, tomaꞌani mekokae hante lali to mangkolehi, hei hawaꞌhi wadi bukota hante mosisalaꞌ.

⁹Watoꞌo woꞌo towoweꞌe, hangangaa mopakeꞌhi baduꞌ topoꞌadaꞌ. Anioꞌhi mobungai baduꞌra hingkeꞌna noperenakihi awara. Anioꞌhi mampopongaangaa wilolura. Anioꞌhi mopakeꞌ bulawa ba parewa to masuliꞌ.

¹⁰Angkana towoweꞌe hangangaa mampomaranga wotana hante walia to moromiꞌ, to masipatoꞌ hibali towoweꞌe to menomba pe Pueꞌ Ala.

¹¹Towoweꞌe hangangaa mengkoruꞌ hei menondoꞌ mampehoromua pepoturuꞌ.

¹²Towoweꞌe hawaꞌi kupoliu mampoturuꞌ ba moparentai tomaꞌani. Hangangaa mondiiꞌhi hei mampehoromua.

¹³Alaꞌ to uluꞌ-uluꞌna nowali Pueꞌ Ala, iomo hi Adama, honiꞌi hi Hewa.

¹⁴Haꞌio hi Adama to noꞌakalai Belisiꞌ, angkana hi Hewareꞌi to noꞌakalaino, hinaꞌ molungkaꞌi parentana Pueꞌ Ala.

¹⁵Angkana towoweꞌe kehapohi pahua pehuku i lali komaporiꞌ tempora moꞌanaꞌ, tontona niposalamaꞌhi, asalana maroho mepoꞌohi pe hi Yesu Kerisitu hei marima pe toaꞌ ntaniꞌna, tuwuꞌ mangkolehi i hinarona Pueꞌ Ala. Lekiꞌna tiꞌo niwali hante walia to masipatoꞌ.