Read Rampi 1 Timotius 4 Bible Online

1 Timotius 4 - Rampi bible

1 Timotius 4

¹Inohaꞌ Mangkolehi mampokononto: i ando to hingkiꞌ mehupaꞌ, uwaꞌhi toaꞌ to hingkiꞌ maꞌoruꞌ ka pepoꞌohira. Hingkiꞌ mengkoruꞌhi pe kuasaꞌ to mepomonawuꞌ hei motuntunihi pepoturuꞌ to ka lomoa.

²Poturuꞌ tiꞌo ropowute toaꞌ to mepomonawuꞌ. Lolitara hawaꞌi hibali hante waliara. Mokorindi lalire, hawaꞌi robahaꞌ mohili ane mowalihi walia to kodake.

³Mampoturuꞌhi toaꞌ hingkeꞌna hawaꞌhi hamoko hei moꞌopihi toaꞌ mangka haꞌumbora langkaꞌ to niꞌoka to nopoꞌuwaꞌ Pueꞌ Ala, hantaro Pueꞌ Ala mampoꞌuwaꞌ to niꞌoka hingkeꞌna to mepoꞌohi wadi mangka hante poꞌawerasiꞌ pe Io. Toaꞌ to mepoꞌohi tiꞌo iomo to pobahaꞌ poturuꞌ to tuꞌu.

⁴Lekiꞌna to nopoꞌuwaꞌ Pueꞌ Ala moromiꞌ hei hawaꞌi uwaꞌ halangkaꞌ to kodake, ane totorimoꞌi i lali poꞌawerasiꞌ pe Pueꞌ Ala.

⁵Alaꞌ Pohawaꞌna Pueꞌ Ala hante pekokae to mampomangkolehi hapo to toꞌoka.

⁶Ane ipagurukihi lekiꞌ-lekiꞌne hieꞌe pe halali hampepoꞌohinta, hingkiꞌ mewaliko hawiꞌna Yesu Kerisitu to moromiꞌ. Hei hingkiꞌ maroho mpuꞌu pepoꞌohima alaꞌ Boona Pueꞌ Ala to topoꞌohi hei pepoturuꞌ to moromiꞌ to moruemo ipetuntui.

⁷Ipomoꞌelamo wotama ka lolita tota modumbuꞌ ba lolita tota tuꞌu, ipobiasamo wotama mengkoruꞌ nturusi pe Pueꞌ Ala.

⁸Mampomaroho wota hangkiuꞌlu podumbuꞌane, angkana ane topokaroho lalinte mengkoruꞌ pe Pueꞌ Ala, woriꞌ podumbuꞌane, alaꞌ mangkomi pebarakati i lali kotuwuꞌta i duniaꞌ hei kotuwuꞌ to wolaꞌ intu.

⁹Tuꞌu mpuꞌu lolita hieꞌe hei hangangaa topoꞌohi mpololeke.

¹⁰Iomo hinaꞌ majamaki mpololeke, alaꞌ mepoꞌohiki pe Pueꞌ Ala to tuwuꞌ wute nantolou-louna hei Topohompoꞌ lekiꞌ-lekiꞌna toaꞌ, pelumbuꞌnamo toaꞌ to mepoꞌohi.

¹¹Ipagurukihi lekiꞌ-lekiꞌne to ka kutiꞌikimoko, hei ihowoꞌikihi hingkeꞌna ropetuntuiꞌi.

¹²Anioꞌ haduo toaꞌ mopariwoiꞌko alaꞌ moleaꞌluko tene. Hangangaa mewaliko pandiri' i halali hampepoꞌohinta i lali pololitamu, waliamu, komarimamu i awamu, pepoꞌohimu pe Pueꞌ, hei kotuwuꞌmu to mangkolehi.

¹³Ikohandoaꞌangku mehupaꞌ, hangangaa ibasa nturusi Boo Mangkolehi pe halali hampepoꞌohinta. Hangangaa ipokaroho nturusi lalire hante ipoturuꞌkihi.

¹⁴Anioꞌ ipohinteꞌi jamama to hangangaa ipopatengkaꞌ motuntuni komapande to noweikiko Inohaꞌ Mangkolehi. Nipaꞌaniko komapande i tempora hawiꞌna Pueꞌ i jumaꞌara toSarani mohini korawera i tutuꞌmu mampowute lolita ka Pueꞌ Ala noniuꞌ i ingko.

¹⁵Lekiꞌ-lekiꞌna jamamu hangangaa ipopatengkaꞌ mpuꞌu ka lali-lalimu, hingkeꞌna pedeꞌ tongawa komoromiꞌne pajamamu pe Pueꞌ.

¹⁶Moromiꞌko i waliamu hei i pepoturuꞌmu. Ijama nturusi lekiꞌ-lekiꞌne hieꞌe, ala ane iwaliꞌi watoꞌo, ingko mamposalamaꞌko wotamu hei toaꞌ to mampehoromua poturuꞌmu.