Read Rampi 1 Timotius 5 Bible Online

1 Timotius 5 - Rampi bible

1 Timotius 5

¹Ane ipoturuꞌi haduo tomaꞌani to moꞌumuruꞌmo ka ingko, inioꞌko makasaraꞌ. Agina ikamoroki hante lolita to moꞌalusuꞌ, irekeꞌ hibali umoꞌmu. Anaꞌntomaꞌani irekeꞌ hibali halalimu.

²Towoweꞌe to moꞌumuruꞌmo irekeꞌ hibali inoꞌmu, hei towoweꞌe to moleaꞌ tene ka ingko irekeꞌ hineeꞌmu, iwali pe iohi hante lali to mangkolehi.

³Ane uwaꞌi towoweꞌe tobembaꞌ tuwuꞌ hadoduona, hangangaa toꞌadaꞌi hei tosulungihi.

⁴Angkana ane tobembaꞌ to uwaꞌ anaꞌna ba oꞌuweꞌna, anaꞌna ba oꞌuweꞌna tiꞌo hangangaa nipoturuꞌkihi noniuꞌ lala morewahi tinora hingkeꞌna mohowonihi komoromiꞌna todulura hante uweꞌra. Alaꞌ tiꞌo to mampomotanaꞌ lalina Pueꞌ Ala.

⁵Ane uwaꞌi tobembaꞌ to hadoduona hei hawaꞌi uwaꞌ howeꞌ haduo to morewahiꞌi, mepohinarulu pe Pueꞌ Ala. Ando wini io mekokae nturusi pe Pueꞌ Ala merapiꞌ sulungi.

⁶Angkana tobembaꞌ to mampaliꞌlu komotanaꞌ-tanaꞌ, mopalaiha mahi pepoꞌohine, kehapoꞌi tuwuꞌlu wotalokaꞌne.

⁷Ipowutekihi poturuꞌka hieꞌe pe tobembaꞌ, hingkeꞌna waliara hawaꞌi masalaꞌ.

⁸Alaꞌ ane uwaꞌ haduo toaꞌ to mantiꞌi moromiꞌ pepoꞌohine pe Pueꞌ Ala, angkana hawaꞌi morewahi halalina hei tinona, waliana tiꞌo mosapuaka pepoꞌohina. Meloliu kokodakene ka toaꞌ to hawaꞌi mepoꞌohi pe Pueꞌ Ala.

⁹Tobembaꞌ to wadi nipopekahi konaꞌne i lali suraꞌ pampokononto tobembaꞌ hingkeꞌna nosulungiꞌi toaꞌ to mepoꞌohi, bateꞌnalu toaꞌ to waheꞌe: tinuwuꞌna hawaꞌi makuraꞌ ka oni mpuluꞌ ntoꞌana hei to hampihalu hamoko.

¹⁰Hangangaa mombaha waliane to moromiꞌ, rapaꞌna: morewahi moromiꞌ anaꞌna, motanaꞌ mantorimo tolori i tambina, mosulingi halali hampepoꞌohina hibali toaꞌ to nipohawiꞌ, mosulungihi toaꞌ to i lali komaporiꞌ, hei ka lali-lalina mowali hinangkana jama to moromiꞌ.

¹¹Ane tobembaꞌ to moleaꞌ tene, anioꞌ niꞌukiꞌ konaꞌne i lali suraꞌ pampokononto tobembaꞌ. Alaꞌ ane uwaꞌ tene laline momaꞌani, bateꞌna hingkiꞌ mohamoko. Koꞌukoana masalaꞌ alaꞌ molungkaꞌi dandina i Kerisitu kohawaꞌana intu hingkiꞌ momaꞌani.

¹³Hawaꞌi podo iolu, lohehi, jamara nolou humeiluhi pe tambina awara, mangkonunuꞌ, hei mampometebaꞌ-tebaꞌ lolita pe awara. Rolei woꞌo mampekahi urusiana toaꞌ ntaniꞌ, hei mampowute nturusi lolita to hawaꞌi masipatoꞌ nipowute.

¹⁴Iomo horiana kutiꞌi, tobembaꞌ to moleaꞌ tene, agina momaꞌanihi huliꞌ, moꞌanaꞌhi, hei morewuhi moromiꞌ toaꞌ to uwaꞌ i lali tambira, hingkeꞌna hawaꞌi uwaꞌ lalane poniꞌta hingkiꞌ mosalaꞌiki to metuntu pe Kerisitu.

¹⁵Alaꞌ uwaꞌhi tobembaꞌ to hamboaꞌi motuntuni peleihana Kerisitu, mampetuntuiluhi peleihana Belisiꞌ.

¹⁶Ane toSarani uwaꞌ tinora tobembaꞌ, agina iohi to morewahiꞌi. Alaꞌ hawaꞌi moromiꞌ ane jumaꞌa to morewahi tobembaꞌ tiꞌo. Alaꞌ jumaꞌa hangangaa morewahi tobembaꞌ to merima-rima mpololeke tuwuꞌra hei hawaꞌi uwaꞌ to morewahihi.

¹⁷Pinatuana toSarani to moromiꞌ potadulakoine, masipatoꞌ mpuꞌu niꞌadaꞌi rompiha ka toaꞌ ntaniꞌna, pelumbuꞌna pinatua to mepoturuꞌ hante to mampowute hawaꞌna Pueꞌ.

¹⁸Alaꞌ i lali Boo Mangkolehi teꞌukiꞌ waheꞌe: “Anioꞌ nisamaꞌi omeꞌne gapiꞌ ane kolentuꞌana nipopajama.” Hei teuꞌkiꞌ woꞌo: “Topajama hangangaa nipaꞌani harona.”

¹⁹Ane uwaꞌ hawiꞌne Pueꞌ i jumaꞌana toSarani to nosalaꞌi toaꞌ, anioꞌ liu itorimokei pesalaꞌire. Ane uwaꞌ roduo ba tolu duo toaꞌ to mosobiꞌi kotuꞌuna komasalaꞌna, honiꞌi itorimokei.

²⁰Ane uwaꞌ to mowali dosa, moromiꞌ ane nikamorokiꞌi i hinarona lekiꞌ-lekiꞌna halali hampepoꞌohinta, hingkeꞌna toaꞌ ntaniꞌna motehuꞌhi woꞌo motuntuni waliana.

²¹Timotius, kupaꞌaniko lolita hieꞌe, hingkeꞌna ipetuntuiꞌi lekiꞌ-lekiꞌne hawaꞌku hieꞌe, hei inioꞌko mampopoꞌori-ori toaꞌ. Pueꞌ Ala hante Yesu Kerisitu hei malaꞌekana to Noꞌuwiꞌ pangkiꞌki.

²²Anioꞌko hohiꞌ-hohiꞌ mohini korawemu mampotinto toaꞌ mewali hawiꞌna Pueꞌ i jumaꞌana toSarani, hingkeꞌna hawaꞌi ipohorunga ane mowaliꞌi dosa. Iparesaꞌ dulu waliare, honiꞌi ihini korawema mobarakatihi hingkeꞌna nomonontomo mewalihi hawiꞌna Pueꞌ i jumaꞌana toSarani. Moromiꞌ-romiꞌko hingkeꞌna mononto nturusi waliama.

²³Anioꞌko maꞌinulu uwai to popuhiꞌ. Agina ikaloi hangkiuꞌ hante anggoroꞌ, hingkeꞌna nomoromiꞌ pehorima alaꞌ poko molaloꞌi hinaꞌima.

²⁴Uwaꞌ toaꞌ to tongawamo komadosane, kehapoꞌi handoaꞌi tene nihuroni kara-karare. Uwaꞌhi woꞌo toaꞌ to madosa to hawaꞌi kaliuꞌ nibahaꞌ dosane, komorue-rueha honiꞌi nibahaꞌ.

²⁵Watoꞌo woꞌo, uwaꞌhi toaꞌ tongawa mpuꞌu komoromiꞌne waliara. Hei uwaꞌhi woꞌo toaꞌ to hawaꞌi nibahaꞌ waliare to moromiꞌ, angkana i ando to hingkiꞌ hupaꞌ, waliara to moromiꞌ tiꞌo hingkiꞌ robahaꞌ toaꞌ.