Read Rampi 1 Timotius 6 Bible Online

1 Timotius 6 - Rampi bible

1 Timotius 6

¹Ane halali hampepoꞌohinta to mewali hawiꞌ tuwuꞌna, ipoturuꞌkihi hingkeꞌna mengkoruꞌ hante motuntunihi tuara i hapo-hapolu, hingkeꞌna hawaꞌi uwaꞌ haduo toaꞌ to mampariwoiꞌ konaꞌna Pueꞌ Ala ba mosapuaka pepoturuꞌta.

²Ane toSaraniꞌi tuare, hawaꞌi masipatoꞌ ane haduo hawiꞌ mantiꞌi waheꞌe: “Hawaꞌi paralu kupetuntui hawaꞌne, alaꞌ io halalingku i lali konaꞌna Pueꞌ Ala.” Hangangaa ropopatengkaꞌ moromiꞌ-romiꞌ jamare tuara, alaꞌ tuara to ropajamaki tiꞌo, iomo halali hampepoꞌohira to ropokarima. Lekiꞌ-lekiꞌna to kuꞌukiꞌ hieꞌe, ipagurukihi toaꞌ hingkeꞌna maroho pepoꞌohire.

³Uwaꞌhi to mampowute pepoturuꞌ to mosisalaꞌ hante poturuꞌta. Hawaꞌhi mampoꞌohi pepoturuꞌ to tuꞌu ka Pueꞌta, Yesu Kerisitu. Hawaꞌhi mampoꞌohi lolita to nipoturuꞌkiki hingkeꞌna mengkoruꞌki pe Pueꞌ Ala.

⁴Toaꞌ tiꞌo mampetomapandehi, hantaro hawaꞌhi pobahaꞌ hapo-hapo. Peleira, hingkeꞌna moheꞌero-erohi nturusi hante mampaliꞌhi posisalaꞌ lolita. Alaꞌ pepoturuꞌra tiꞌo, iomo hinaꞌ woriꞌ toaꞌ to mowahiꞌhi, mosisalaꞌhi, momepononaꞌa, meroraiꞌhi,

⁵hante mampoheꞌeroki awara. Pekirira toaꞌ tiꞌo hamboaꞌi moromiꞌ, hawaꞌi robahaꞌ poturuꞌ to peniuꞌ. Rotiꞌi, wadihi pahua rasiꞌ ka pepoturuꞌra.

⁶Kotuꞌuana, mengkoruꞌ pe Pueꞌ Ala mangkomi rasiꞌ to kodeꞌ, asalana hapo to uwaꞌ topoganaꞌmo.

⁷Alaꞌ i kohupaꞌta i duniaꞌ hieꞌe, hawaꞌi uwaꞌ to tokomi humei. Watoꞌo woꞌo i pahuliꞌanta, hawaꞌi uwaꞌ to hingkiꞌ wadi tokomi mahuliꞌ.

⁸Mewaliꞌ, ane uwaꞌmo pangkate hante baduꞌta, ganaꞌmo.

⁹Angkana toaꞌ to dokoꞌhi mewali sugiꞌ, nokeloihi peleihana lalira to hawaꞌi modumbuꞌ hei mangkomihi komaporiꞌ. Koꞌukoana monawuꞌhi pe lali dosa, hei pahuahi kohorewuꞌa.

¹⁰Alaꞌ ane mampaliꞌluki doiꞌ, iomo to mampoꞌuwaꞌ woriꞌ langkaꞌna walia to kodake. Uwaꞌ woꞌo toaꞌ to mampaliꞌ nturusi doiꞌ, horiana mampolihihi pepoꞌohira. Koꞌukoana mokodokoihi wotara hadoduora hante norumpahi woriꞌ komaporiꞌ.

¹¹Angkana ingko Timotius, hawiꞌnako Pueꞌ Ala, ipomoꞌela tuwuꞌma ka lekiꞌ-lekiꞌna walia to watoꞌo. Magegako motuntuni walia to mononto, mengkoruꞌko pe Pueꞌ Ala. Ipokaroho pepoꞌohima pe Kerisitu hei komarimamu i awamu, marohoko morii komaporiꞌ, ipomaꞌalusuꞌ waliama pe awamu.

¹²Magegako nturusi metuntu hei ipokaroho pepoꞌohima pe Pueꞌ Ala, to mampaꞌaniko kotuwuꞌ wute nantolou-louna hei kotuwuꞌ tiꞌo itiko maroho. Alaꞌ iomo tungkaihane Pueꞌ Ala mowowoiko mewali toaꞌNa, i tempomu mantiꞌi pepoꞌohimu pe Pueꞌ Ala i hinarona toaꞌ to woriꞌ.

¹³Mewaliꞌ, Timotius, hieꞌemo poturuꞌka pe ingko. Kupaꞌaniko lolita i hinarona Pueꞌ Ala to mampotuwuꞌ hinangkana, hei i hinarona Yesu Kerisitu to mampowute komaniuꞌaNa pe Pontius Pilatu.

¹⁴Kupaꞌaniko lolita hingkeꞌna ipetuntuiꞌi lekiꞌ-lekiꞌne hawaꞌ hieꞌe, hingkeꞌna hawaꞌi uwaꞌ komasalaꞌmu wute hupaꞌ huliꞌ Pueꞌte Yesu Kerisitu.

¹⁵Tempo kohupaꞌana hi Yesu Kerisitu nopokonontomo Pueꞌ Ala motuntuni peleihaNa. Bateꞌna Iolu to makuasaꞌ hei to masipatoꞌ nipokodeꞌ. Iomo Datu ka lekiꞌ-lekiꞌna datu, Pueꞌ ka lekiꞌ-lekiꞌna pueꞌ.

¹⁶Bateꞌna Iolu to hawaꞌi uwaꞌ koꞌukoane. Io meꞌohaꞌ i peꞌohaꞌa to mewanta mekokiro. Hawaꞌi uwaꞌ howeꞌ haduo to mokododungkuiꞌI ba pangkiꞌI, alaꞌ Io hawaꞌi hohumbo niꞌokiꞌ. Bateꞌna Iolu to masipatoꞌ niꞌadaꞌi hei to masipatoꞌ moparenta wute nantolou-louna. Amin.

¹⁷Ane toaꞌ tosugiꞌ i lali koduniaꞌa hieꞌe, ipoturuꞌkihi hingkeꞌna inioꞌhi mampokokodeꞌ hei inioꞌhi mamporoho luma ngkoduniaꞌ, alaꞌ luma duniaꞌ wadi moholi. Agina mepoꞌohihi pe Pueꞌ Ala to mampaꞌaniki lekiꞌ-lekiꞌna pebarakati to hawaꞌi uwaꞌ hukaꞌna, hingkeꞌna topopodumbuꞌi hante komotanaꞌ lali.

¹⁸Ipoturuꞌhi hingkeꞌna moromiꞌ nturusi waliare, mosulingihi awara, motanaꞌ mepaꞌani ba hapo-hapo pe awara, hei moromiꞌ lalire.

¹⁹Alaꞌ ane watoꞌoꞌi waliare, hibalihi mamporia lumara to moromiꞌ i lali suruga, hei pahuahi kotuwuꞌ to wolaꞌ mpololeke ka Pueꞌ Ala.

²⁰Timotius, Pueꞌ Ala mampoꞌohiko mampowute poturuꞌ to mononto. Mewaliꞌ, itiko moromiꞌ pepoturuꞌ tiꞌo, hingkeꞌna hawaꞌi uwaꞌ to mowolihi. Mekoꞌelako ka toaꞌ to mampowute lolita to hawaꞌi uwaꞌ podumbuꞌana hei toaꞌ to moꞌewako hante pepoturuꞌra to hawaꞌi mononto. Rotiꞌi, uwaꞌ komapandere to maniuꞌ, angkana hawaꞌi tuꞌu.

²¹Kotuꞌuana toaꞌ to motuntuni pepoturuꞌra tiꞌo, moholi pepoꞌohire pe hi Yesu. Pueꞌ mobarakatikei lekiꞌ-lekiꞌmi.