Read Rampi 2 Timotius 3 Bible Online

2 Timotius 3 - Rampi bible

2 Timotius 3

¹Ibahaꞌkei alaꞌ i ando-ando koꞌukoana hingkiꞌ mehupaꞌ tempo to maporiꞌ.

²Manusiaꞌ hingkiꞌ mampokarima wotana hadoduona hei hingki' mewali hawiꞌna doiꞌ. Iohi hingkiꞌ mampokokodeꞌ, mepononaꞌahi, hingkiꞌ mampomehoniꞌki tomotodi hei hawaꞌhi pobahaꞌ moꞌawerasiꞌ, hawaꞌi uwaꞌ pepoꞌohire,

³hawaꞌhi marima, hei hawaꞌhi mohintuwuꞌ. Poko mampometebaꞌ-tebaꞌhi lolita, hawaꞌi robiaꞌ morii peleihana lalira, kabobuneꞌa hante hawaꞌi rolei hapolu to moromiꞌ.

⁴Dokoꞌhi metaloleuꞌ, mampokokodeꞌ hei hawaꞌhi mampekiri ngkurauꞌ. Ropotanaꞌ tene koduniaꞌa ntina motuntuni peleihana Pueꞌ Ala.

⁵Kehapohi mampopatengkaꞌ pamingura angkana kotuꞌuane hingkenaꞌlu noꞌokiꞌhi toaꞌ. To kotuꞌuana hawaꞌi roꞌokui kuasaꞌne Pueꞌ mowolihi pekiri. Walia to watoꞌo Ikoꞌelai!

⁶Alaꞌ i lumbura, uwaꞌhi toaꞌ to mampowute pepoturuꞌ to salaꞌ mekahi pe tambi-tambi, hante mampokonawuꞌhi towoweꞌe to mololihaꞌhi nikeloi. Madori rohori alaꞌ dosara, hei motuntuniluhi peleihana lalira.

⁷Kehapoꞌi dokoꞌhi towoweꞌe tiꞌo nipoturuꞌ, angkana hawaꞌhi hampiha pobahaꞌ poturuꞌ to maniuꞌ ka Pueꞌ Ala.

⁸Hibali hi Yane hante hi Ambereꞌ to moꞌewa hi Musa hampiha, hatoꞌolu woꞌo toaꞌ-toaꞌ tiꞌohi to meꞌewa poturuꞌ ka Pueꞌ Ala. Pekirira hamboaꞌi mononto, pepoꞌohira tetuhumo hante hamboaꞌi maniuꞌ.

⁹Tuꞌu morasiꞌhi angkana hawaꞌi uwaꞌ pelaworoane, alaꞌ kobebera hingkiꞌ nobahaꞌ lekiꞌna toaꞌ, hibali to norumpamo hi Yane hante hi Ambereꞌ.

¹⁰Angkana ingko Timotius, alaꞌ moruemoko kupoꞌawa, ipetuntuimo mpuꞌu poturuꞌka, waliangku hei tungkaihana lalingku. Hei ipetuntuimo woꞌo pepoꞌohingka, kosabaraꞌku, komarimangku, hei morii i lali komaporiꞌ.

¹¹Ibahaꞌmo konipopoꞌioꞌiongka horiana manasaꞌa. Ibahaꞌlu lekiꞌna to mewali pe aku i Antokia, i Ikonium, hei i Listra, hei ibahaꞌmo lekiꞌ to kupomaporiꞌ! Angkana Pueꞌ mamposalamaꞌa ka lekiꞌna tiꞌo.

¹²Tuꞌu lekiꞌna toaꞌ to dokoꞌ tuwuꞌ menomba pe Yesu Kerisitu hingkiꞌ nipoperima-rima.

¹³Angkana toaꞌ to kodake waliana hei poꞌakala hingkiꞌ tetambai kokodakere, metobebeahi hei hingkiꞌ nitobobeahi woꞌo.

¹⁴Angkana noniuꞌ ingko Timotius, hangangaa metatikoko i poturuꞌ-poturuꞌ to maniuꞌ to nipoturuꞌkimoko pe ingko hei to ipoꞌohi mpololeke alaꞌ iponindi hihimo guru to mampoturuꞌko.

¹⁵Ikolowoi mepongka kokiuꞌko tene, ingko pobahaꞌmoko Boo Mangkolehi to mepaꞌani pekiri pe ingko hei mangkomiko pe kosalamaꞌa, alaꞌ pepoꞌohi pe Yesu Kerisitu.

¹⁶Lekiꞌ-lekiꞌna to teꞌukiꞌ i lali Boo Mangkolehi, niꞌukiꞌ hintotoꞌ hante kuasaꞌ Inohaꞌ Mangkolehi, modumbuꞌ i ingkiꞌ, hingkeꞌna tobahaꞌ pepoturuꞌ to tuꞌu, tobahaꞌ woꞌo hapo to salaꞌ, tokoꞌelai walia to kodake, hei tobahaꞌ lala to mampokononto walianta pe to moromiꞌ.

¹⁷Moliu i Boo Mangkolehi, lekiꞌna toaꞌ to mampopatengkaꞌ jamana Pueꞌ Ala, Nopoganaꞌimo hingkeꞌna mowalihi lekiꞌna walia to moromiꞌ.