Read Rampi 2 Timotius 4 Bible Online

2 Timotius 4 - Rampi bible

2 Timotius 4

¹Yesu Kerisitu hingkiꞌ mehupaꞌ i duniaꞌ hieꞌe hingkiꞌ mobutusi toaꞌ to tuwuꞌ hante toaꞌ to mahi, hei Io mehupaꞌ moparenta hei mewali Datu. Iomo hinaꞌ kuperapiꞌ mpololeke pe ingko i hinarona Pueꞌ Ala hei hi Yesu Kerisitu:

²Hangangaa timomoko mpuꞌu mampowute PohawaꞌNa i tempo to moromiꞌ ba i tempo to maporiꞌ. Itiꞌikihi pe to mowali salaꞌ hante ikamorokihi, honiꞌi ipomononto lalire hampepoꞌohimu hingkeꞌna moromiꞌ waliara. Hangangaa sabaraꞌko nturusi mopaguruhi.

³Alaꞌ hingkiꞌ mehupaꞌ tempone, toaꞌ hamboaꞌmo hingkiꞌ mampehoromua poturuꞌ to moromiꞌ, angkana iohi hingkiꞌ mampaliꞌhi guru-guru motuntuni peleira hingkeꞌna notebuhoꞌi to rokodokoꞌio.

⁴Mengkabonoꞌluhi ane pahorihi pepoturuꞌ to tuꞌu-tuꞌu, angkana rolei mampehoromua pepoturuꞌ to nipeꞌoꞌuwaꞌ.

⁵Iomo hinaꞌ kuperapiꞌ mpololeke, Timotius, hingkeꞌna ipolebaꞌ lalimu, sabaraꞌko i lali komaporiꞌ. Ipowute nturusi Kareba Moromiꞌ pe toaꞌ to hawaꞌi tene hampiha pahori Kareba Moromiꞌ. Ipololiu moromiꞌ lekiꞌ-lekiꞌna jama to Nopaꞌanikiko Pueꞌ.

⁶Alaꞌ kubahaꞌ hamboaꞌi morue kotuwuꞌku i duniaꞌ hieꞌe, hingkiꞌ hupaꞌmo andongka. Kehapoꞌa nirokoꞌ, kupetangekilu kotuwuꞌku hieꞌe Mewali popenombangku pe Pueꞌ Ala.

⁷Kupetuntuimo moromiꞌ lala to nopokonontokiꞌa Pueꞌ. Kupotutuhamo pajamangka. Hawaꞌi tewolihi pepoꞌohingku wute i koꞌukoana.

⁸Mewaliꞌ hinewowoꞌena, timomomo harongka i suruga, alaꞌ kupetuntuimo peleihane Pueꞌ Ala. Harongku tiꞌo hingkiꞌ nopaꞌanikiꞌa Pueꞌ i ando pobutusi i koꞌukoana duniaꞌ, i tempona moparesaꞌ waliana lekiꞌ-lekiꞌna toaꞌ i konontoana. Hei handoꞌio akulu to pahua haro tiꞌo. Angkana nopaꞌanikihi woꞌo pe lekiꞌ-lekiꞌna toaꞌ to mangkopundai kohupaꞌNa huliꞌ.

⁹Timotius, humeiꞌa iloloꞌo hohiꞌ,

¹⁰alaꞌ hamboaꞌi uwaꞌ to mampoꞌowoniꞌa i hieꞌe. Nopolihimoꞌa hi Demaꞌ, alaꞌ molaimo nolou pe Tesalonika mampaliꞌlu komasana i duniaꞌ hieꞌe. Hi Karesike nolou pe Galatia. Hi Titus woꞌo nolou pe Dalamatia.

¹¹Hi Lukas romo to moꞌawa hante aku. Ane humeiko intu Timotius, ipohinalu hi Markus humei iseꞌe, alaꞌ io mampororuiꞌa i lali jamangku.

¹²Hi Tikiku kurumbaꞌ nolou pe Epesu.

¹³Kuperapiꞌ woꞌo hingkeꞌna ikomikiꞌa humei kumbangka to makamba to kupolihi i kota Troas i tambina hi Kapusi, hante ikomikiꞌa humei suraꞌ-suraꞌka hei inioꞌ woꞌo ikombulihaki suraꞌka to niwali ka koliꞌ alaꞌ kuparaluꞌi mpololeke.

¹⁴Majaga-jagako pe hi Alesande, topowali kala. Io moꞌewa poturuꞌta. Woriꞌ waliane to kodake pe aku. Waliana tiꞌo hingkiꞌ nohowoni Pueꞌ Ala.

¹⁶Uluꞌ-uluꞌna i tempoku niparesaꞌ alaꞌ waliangku hampiha, hawaꞌi mpuꞌu howeꞌ haduo mehupaꞌ to mamperoruiꞌa. Lekiꞌ-lekiꞌra ropolihiꞌa. Mekokaeꞌa pe Pueꞌ hingkeꞌna hawaꞌi Nohowoni waliare tiꞌo.

¹⁷Angkana kehapoꞌi hawaꞌi uwaꞌ awangku to mampoꞌawaꞌa, tontonalu Pueꞌ to mampoꞌowoniꞌa nturusi. Io mampaꞌaniꞌa komaroho mampotutu jamangku mampowute Kareba Moromiꞌ, hingkeꞌna lekiꞌ-lekiꞌna toaꞌ to handoꞌiohi toYahudi wadi pahori kareba tiꞌo. Koꞌukoana, Io mampohenteꞌa ka komahia.

¹⁸Hei hinewowoꞌena, bateꞌku nopohente Pueꞌ ka lekiꞌ-lekiꞌna to kodake, hingkiꞌ Nokomiꞌa mekahi i lali kodatuaNa i suruga. Topokodeꞌmo konaꞌNe wute nantolou-louna. Amin!

¹⁹Tabea pe hi Priska hante hi Akwila hei pe tinona hi Onesiporu.

²⁰Hi Eratus uwaꞌ tene i kota Korintus. Hi Toripimu kupolihi i Miletu alaꞌ hawaꞌi polido.

²¹Ihohiꞌi humei ikohandoaꞌana tene mehupaꞌ tempo mepoholeꞌ! Tabea ka hi Ebulu, hi Pude, hi Linu hante hi Laudia, hei ka lekiꞌ-lekiꞌna halali hampepoꞌohinta to uwaꞌ iseꞌe.

²²Pueꞌ moꞌowoniko. Rima Ngkotuwuꞌ moꞌowonikei!