Read Rampi Titus 1 Bible Online

Titus 1 - Rampi bible

Titus 1

¹Suraꞌ hieꞌe ka aku hi Paulu, hawiꞌna Pueꞌ Ala hei surona Yesu Kerisitu. Noꞌuwiꞌa hei Norumbaꞌa hingkeꞌna mosulungiꞌa toaꞌ-toaꞌ to noꞌuwiꞌmo Pueꞌ Ala hingkeꞌna romaroho i lali pepoꞌohira. Aku woꞌo mampaꞌanihi kopebahaꞌ to maniuꞌ to nopepoturuꞌki agamanta,

²wute pahuaki pepohinarua kotuwuꞌ to wolaꞌ to hawaꞌi mokoꞌukoa, hibali to Nodandikiki. Alaꞌ ikohandoaꞌana tene duniaꞌ hieꞌe Nowali, Nodandimokiki kohingkiꞌ pahuante kotuwuꞌ to wolaꞌ, hante Pueꞌ Ala hawaꞌi mowuti.

³Mewaliꞌ, i tempo to Nopokononto, Noponobahaꞌikiki lala ngkotuwuꞌ to moromiꞌ to hawaꞌi mokoꞌukoa. Boo Mangkolehi tiꞌo Nopepoꞌohiki pe aku hingkeꞌna kupowuteꞌi motuntuni hawaꞌna Pueꞌ Ala, to mamposalamaꞌki.

⁴Suraꞌ hieꞌe kupakatukiko, Titus, to kupoꞌanaꞌ alaꞌ hampepoꞌohiki. Mekokaeꞌa pe Pueꞌ Ala Umoꞌta, hei pe Yesu Kerisitu, Topohompoꞌ, hingkeꞌna Nopaꞌaniko pebarakati hei romiꞌ ngkotuwuꞌ.

⁵Kupolihiko i woiꞌ Kreta, hingkeꞌna ipopatengkaꞌi jamante to handoaꞌi tene uko, hei iparilangkaꞌ woꞌo toaꞌ to wadi motadulakoi toSarani i lekiꞌ-lekiꞌna bolaꞌ hibali to kitiꞌikiko.

⁶Hei toaꞌ to iparilangkaꞌ mewali tadulakora toSarani, hangangaa toaꞌ to hawaꞌi uwaꞌ komasalaꞌane, to hadoduolu hantambine, hei anaꞌnahi hangangaa mepoꞌohi woꞌo pe Kerisitu, hawaꞌhi kasaraꞌ hei meꞌewa.

⁷Toaꞌ to moꞌurusi jumaꞌa, iohi to morewahi jamana Pueꞌ Ala. Iomo hinaꞌ hangangaa iꞌuwiꞌ toaꞌ to hawaꞌi uwaꞌ komasalaꞌne, to hawaꞌi mampokokodeꞌ ba to poko bukota, to hawaꞌi lolonua ba to mosisalaꞌ nturusi ba to mampaliꞌlu doiꞌ.

⁸Hangangaa toaꞌ to robahaꞌ mantorimo tolori, moromiꞌ nturusi waliare, buhaꞌ pekiri, mononto lalire, mangkolehi kotuwuꞌre, hei robiaꞌ morii peleihane lalira to kodake.

⁹Hangangaa maroho pepoꞌohire i poturuꞌ to tuꞌu, hibali to ukomo rotorimo, hingkeꞌna robahaꞌ lala mampoturuꞌ toaꞌ i pepoturuꞌ to tuꞌu tiꞌo hei mampokaroho lalira, hante hawaꞌi woꞌo motehuꞌ mokamoroki salaꞌna to moꞌewa pepoturuꞌ tiꞌo.

¹⁰Alaꞌ woriꞌ toaꞌ to moꞌewa poturuꞌta, pelumbuꞌnamo iohi to motuntuni adaꞌ pebulabaꞌ. Mampokonawuꞌhi toaꞌ hante lolita to hawaꞌi modumbuꞌ.

¹¹Toaꞌ tiꞌo hangangaa nikamorokihi. Anioꞌhi ipoliu mepoturuꞌ! Alaꞌ woriꞌ tino to wuli nokomi pepoturuꞌra. Hei tungkaihara hingkeꞌna pahualuhi rasiꞌ to hawaꞌi masipatoꞌ.

¹²Hampiha, uwaꞌ haduo to notiꞌi toKreta nabi, mantiꞌi, “Toaꞌ-toaꞌ toKreta poko mowutihi hei hibalihi waliara pinatuwuꞌ to hariko hei lohe.”

¹³Hapo to notiꞌi nabi tiꞌo umbiꞌ tuꞌu, iomo horiana ingko hangangaa mokamoroki toaꞌ to moꞌewa poturuꞌta, hingkeꞌna tontohi metatiko i poturuꞌ to maniuꞌ,

¹⁴hei hawaꞌhi mampehoromua lolita mpototuru toYahudi ba atura-atura to rowali toaꞌ-toaꞌ to mohoha poturuꞌ tiꞌo.

¹⁵Lekiꞌ-lekiꞌna mangkolehi i toaꞌ to manobaꞌ lalina. Angkana toaꞌ to kodake lalina hante to hawaꞌhi mepoꞌohi, hawaꞌi uwaꞌ to mangkolehi i iohi, alaꞌ kodake lalire hante pekirira, horiana hamboaꞌi robahaꞌ komasalaꞌre.

¹⁶Rotiꞌi, robahaꞌ Pueꞌ Ala, angkana mowutihi, alaꞌ waliara hawaꞌi mampetidoꞌki korobahaꞌna Pueꞌ Ala. Kodake mpuꞌu waliare, hawaꞌhi wadi nipohawaꞌki, hante hawaꞌi robiaꞌ mowali hapo to moromiꞌ.