Read Rampi Pilemon 1 Bible Online

Pilemon 1 - Rampi bible

Pilemon 1

¹Pilemon to kukopundai.[1] Suraꞌ hieꞌe ka aku hi Paulu, to nitarungkuꞌ alaꞌ pajamangku mampowute kareba noniuꞌ i Yesu Kerisitu, hei ka hi Timotius, halali hampepoꞌohinta. Kipakatu suraꞌ hieꞌe pe ingko, Pilemon, halali hampajamangki to kipokarima,

²hante hi Apia, halalingki towoweꞌe to kipokarima, hei hi Akipu, awangki majama mampowute Kareba Moromiꞌ, hei jumaꞌa to hirampu i tambimu.[2]

³Kuperapiꞌ hingkeꞌna Pueꞌ Ala Umoꞌta hei Pueꞌ Yesu Kerisitu mobarakatikei hei mampaꞌanikei romiꞌ ngkotuwuꞌ.

⁴Pilemon, i piha-pihangku mekokae, kuponindiko nturusi, hei kutiꞌi woriꞌ komoromiꞌmu pe Pueꞌ Ala,

⁵alaꞌ kuhorimo kareba to ropowute noniuꞌ komarohona pepoꞌohimu i Pueꞌ Yesu hei rimamu i lekiꞌ-lekiꞌna toaꞌNa.

⁶Mekokaeꞌa hingkeꞌna nokomi pohintuwuꞌta hante halali hampepoꞌohinta, hingkiꞌ tetambai nturusi hapo to tobahaꞌ noniuꞌ i lekiꞌ-lekiꞌna pebarakati to nopaꞌanikiki Pueꞌ Ala alaꞌ pohaꞌanunta hante Kerisitu.

⁷Motanaꞌa mpololeke hei dodoli lalingka alaꞌ rimamu tiꞌo, alaꞌ ingko to mampokaroho lalire toaꞌna Pueꞌ Ala.

⁸Halalingku Pilemon! Kotuꞌuana, wadiko kuparentai mowali hapo to hintotoꞌ, alaꞌ nopaꞌaniꞌa Kerisitu kuasaꞌ tiꞌo.

⁹Angkana kuponindi rimama, iomo hinaꞌ hawaꞌko kuparentai. Kupowutelu perapiꞌku pe ingko. Aku hi Paulu to motodimoꞌa hei hinewowoꞌena nitarungkuꞌa alaꞌ pajamangku i Yesu Kerisitu.

¹⁰Mewaliꞌ kuperapiꞌ hingkeꞌna itorimoꞌi moromiꞌ hieꞌe anaꞌka hi Onesimu. Kupoꞌanaꞌ, alaꞌ kolentuꞌangku nitarungkuꞌ iseꞌe, aku to mampaguruꞌi horiana mepoꞌohi pe Pueꞌ Yesu.

¹¹Hampiha hi Onesimu tiꞌo hawaꞌi modumbuꞌ alaꞌ mehilaiꞌi ka ingko, angkana hinewowoꞌena, hingkiꞌ modumbuꞌ mpololeke,[3] hei handoꞌiolu pe ingko Pilemon, angkana pe aku woꞌo.

¹²Mewaliꞌ hinewowoꞌena, anaꞌku to kupokarima hieꞌe, kurumbaꞌ mahuliꞌ nolou pe ingko.

¹³Kotuꞌuana, kukodokoꞌi tene kutaha iseꞌe moꞌawa-awa hante aku, alaꞌ hibalimo sulewotamu to mosulungiꞌa kolentuꞌangku nitarungkuꞌ alaꞌ pajamangku mampowute Kareba Moromiꞌ.

¹⁴Angkana hawaꞌi tuꞌu lalingka motahaꞌi iseꞌe, alaꞌ handoaꞌi tene kupesabiꞌki pe ingko. Peleihangku hingkeꞌna hapo to iwali, iwali ka lalimu mpololeke. Hawaꞌko kuparuku mampetuntui peleihangku.

¹⁵Hi Onesimu mokaꞌa ka ingko hampaiꞌ, wora tiꞌo lalane Pueꞌ hingkeꞌna hi Onesimu itorimoꞌi wute nantolou-louna.

¹⁶Iomo hinaꞌ inioꞌ irekeꞌ hibali hawiꞌmu hampiha, alaꞌ hinewowoꞌena meliumo tuwuꞌne ka konipohawiꞌna. Hei hangangaa irekeꞌ hibali halali hampepoꞌohimu to ipokarima. Io modumbuꞌ mpololeke i aku, hapona tene i ingko, kehapoꞌi hawiꞌmu angkana io halalimu i lali konaꞌna Pueꞌ Yesu.

¹⁷Mewaliꞌ, ane irekeꞌa awamu to hampepoꞌohi, kuperapiꞌ hingkeꞌna itorimoꞌi huliꞌ hi Onesimu hibali koꞌitorimongku.

¹⁸Ane uwaꞌ salaꞌne ba indana i ingko, aku to mampohorunga.

¹⁹Korawe hadoduongku moꞌukiꞌ suraꞌ hieꞌe: aku hi Paulu, hingkiꞌ kubaiari lekiꞌ-lekiꞌna indana. Kotuꞌuana maꞌindako woꞌo i aku, alaꞌ akumo to mampowutekimoko Kareba Moromiꞌ. Angkana hawaꞌko kutuntuꞌki.

²⁰Alaꞌ pohaꞌanunta hante Pueꞌ, kuperapiꞌ hingkeꞌna ipetuntuiꞌi wokaia perapiꞌka hieꞌe: nokomi pohalalinta i lali Kerisitu, itorimomo huliꞌ hi Onesimu, hingkeꞌna motanaꞌ lalingka.

²¹Kuꞌukiꞌ suraꞌ hieꞌe, alaꞌ kupoꞌohi mpololeke kohingkiꞌ ipetuntuine. Hei kubahaꞌ bateꞌna hingkiꞌ meliu to iwali ka hapo to kuperapiꞌ.

²²Hei kuperapiꞌ woꞌo hingkeꞌna ipatimomokiꞌa koturuangka i tambimu, alaꞌ kupohinaru Pueꞌ Ala hingkiꞌ mohoniꞌ pekokaemi, hingkeꞌna himpolohoꞌa ka petarungkuꞌa hieꞌe, hei hohumbo womoꞌa nolou mokadoroꞌikei.

²³Tabea ka hi Epara, to morii komaporiꞌ moꞌawa-awa hante aku i tarungkuꞌ alaꞌ pajamana mampowute kareba noniuꞌ Yesu Kerisitu.

²⁴Tabea woꞌo ka halali hampajojamangku, iomo hi Markus, hi Aritaku, hi Demaꞌ hante hi Lukas.

²⁵Hinamo Pueꞌta Yesu Kerisitu mobarakatikei lekiꞌ-lekiꞌmi.