Read Rampi Ibarani 1 Bible Online

Ibarani 1 - Rampi bible

Ibarani 1

¹Woriꞌ mpiha Pueꞌ Ala mohawaꞌ pe tododulunta i tempo hampiha. PohawaꞌNa tiꞌo ropowute nabi-nabi pe tododulunta, hante woriꞌ langkaꞌ lala Nopakeꞌ mampoturuꞌhi.

²Angkana i tempo hinewowoꞌena ikohingkiꞌ ukona duniaꞌ, Pueꞌ Ala mampowute pohawaꞌNa pe ingkiꞌ moliu AnaꞌNa hadoduona. Moliu AnaꞌNa tiꞌo Io mowali duniaꞌ hante lekiꞌ-lekiꞌna ohina. Iomo to nopokononto Pueꞌ Ala moꞌompui lekiꞌ-lekiꞌna to uwaꞌ.

³Io to mampetidoꞌki komanobaꞌna Pueꞌ Ala i ingkiꞌ. Io hibobali hante Pueꞌ Ala. Waliana hante kuasaꞌNa hibali hante waliana hei kuasaꞌna Pueꞌ Ala. Io to morewahi lekiꞌ-lekiꞌna to uwaꞌ moliu i BooNa to makuasaꞌ. Io to mampewei wotaNa nirokoꞌ hingkeꞌna mampomangkolehi toaꞌ ka dosara, uko tiꞌo, Io mengkaꞌoreꞌmo nolou pe suruga mahura i tinaꞌ koanana Pueꞌ Ala to Makuasaꞌ mpololeke i lali PoparentaNa to teꞌadaꞌi.

⁴Komahurana Pueꞌ Yesu i tinaꞌ koanana Pueꞌ Ala, mampotongawa komeliuna kuasaꞌNa ka lekiꞌ-lekiꞌna malaꞌeka, hei meliu koteꞌadaꞌine konaꞌNa to nopaꞌaniki Pueꞌ Ala pe Io ka konaꞌ to nipaꞌaniki pe malaꞌeka.

⁵Lolita hieꞌe hawaꞌi howeꞌ hampiha nopowute Pueꞌ Ala pe malaꞌeka: “Ingkomo AnaꞌKa. Mepongka ando hieꞌe, KupopewaliKo AnaꞌKu.” [1] Hei Pueꞌ Ala hawaꞌi woꞌo mololita noniuꞌ haduo malaꞌeka waheꞌe: “Aku NopoꞌUmoꞌA, hante Io Kupoꞌanaꞌ.” [2]

⁶Hei ikonorumbaꞌna Pueꞌ Ala AnaꞌNa to kokokaꞌ humei pe duniaꞌ, Notiꞌi waheꞌe: “Lekiꞌ-lekiꞌna malaꞌekangKu hangangaa menomba pe Io.” [3]

⁷Noniuꞌ malaꞌeka, Pueꞌ Ala mantiꞌi waheꞌe: “Pueꞌ Ala mampopewali malaꞌekaNa mewali parowo hei hawiꞌ-hawiꞌNa mewali api.” [4]

⁸Angkana noniuꞌ i AnaꞌNa notiꞌi Pueꞌ Ala: “O Pueꞌ Ala! KodatuaMu wute nantolou-louna. Ingko to moparenta hante mononto.

⁹Ilei walia to mononto, hante Ipokoiꞌ walia to kodake. Iomo horiana Aku Pueꞌ Ala, Pueꞌmu, KuparilangkaꞌKo hante minyaꞌ-minyaꞌ to mewowau, alaꞌ KuꞌuwiꞌKo. KuꞌadaꞌiKo meliu ka awaMuhi, hingkeꞌna motanaꞌ laliMa.” [5]

¹⁰Notiꞌi womo Pueꞌ Ala pe AnaꞌNa: “O Pueꞌ, ka uluꞌ-uluꞌna, Ingkomo to mowali woiꞌ hieꞌe, hei Ingkomo to mowali laniꞌ.

¹¹Lekiꞌ-lekiꞌna tiꞌo bateꞌna hingkiꞌ tituꞌ, hibali baduꞌ to hingkiꞌ tutu. Angkana Ingko, uwaꞌKo nturusi.

¹²Baduꞌ to hohai hingkiꞌ nitube, hatoꞌo woꞌo duniaꞌ, hampiha tempo hingkiꞌ nitube. Hei hingkiꞌ Ipohowoni hante duniaꞌ to wolaꞌ. Angkana Ingko, hawaꞌi uwaꞌ komabaliꞌaMa, hei kotuwuꞌMu hawaꞌi mokoꞌukoa.” [6]

¹³Hei uwaꞌ woꞌo halangkaꞌ lolita to hawaꞌi howeꞌ hampiha nopowute Pueꞌ Ala pe malaꞌeka, alaꞌ lolitana hieꞌe Nopowutelu pe AnaꞌNa, Notiꞌi: “MahuramoKo tinaꞌ i koanangKu, wute Kupopengkoruꞌhi lekiꞌ-lekiꞌne poniꞌMu pe Ingko.” [7]

¹⁴Mewaliꞌ hapo to tobahaꞌ noniuꞌ i lekiꞌ-lekiꞌna malaꞌeka? Iomohi topajamana Pueꞌ Ala i suruga. Norumbaꞌhi mosulungi toaꞌ to hingkiꞌ pahua kotuwuꞌ to wolaꞌ to hawaꞌi mokoꞌukoa.