Read Rampi Ibarani 11 Bible Online

Ibarani 11 - Rampi bible

Ibarani 11

¹To nitiꞌi pepoꞌohi, palaihana: hapo to topohinaru pe Pueꞌ Ala, tobahaꞌ bateꞌna hingkiꞌ mewali. Kehapoꞌi handoaꞌi tene toꞌokiꞌ hapo to totopekau, mononto i lalinta hingkiꞌ mewali.

²Nokomi pepoꞌohira toaꞌ hampiha, nopomotanaꞌhi Pueꞌ Ala.

³Nokomi pepoꞌohinta, tobahaꞌ koPueꞌ Alana to mowali to handoaꞌi uwaꞌ ka uluꞌana iomo duniaꞌ hante lekiꞌ-lekiꞌna ohina.

⁴Nokomi pepoꞌohina hi Abeli, io mampewei pe Pueꞌ Ala popenombana to meliu komoromiꞌne ka popenombana hi Kai kokaꞌna. Tobahaꞌmo koꞌuwaꞌna pepoꞌohina, alaꞌ motanaꞌ laline Pueꞌ Ala mantorimo popenombana. Hei alaꞌ pepoꞌohina, hi Abeli norekeꞌ Pueꞌ Ala toaꞌ to mononto i pampeꞌeleNa. Kehapoꞌi mahimo, angkana nokomi pepoꞌohina, hi Abeli mewali pandiri' i ingkiꞌ to tuwuꞌ hinewowoꞌena.

⁵Nokomi pepoꞌohina hi Henoꞌ, io hawaꞌi mahi, angkana niꞌoreꞌ ka duniaꞌ hieꞌe i tempona tene tuwuꞌ. Hawaꞌi uwaꞌ to pahua wotana, alaꞌ Pueꞌ Ala moroaꞌi ka duniaꞌ hieꞌe. I lali Suraꞌ Mangkolehi teꞌukiꞌ ikohandoaꞌana tene hi Henoꞌ niꞌoreꞌ, io mampomotanaꞌ lalina Pueꞌ Ala.

⁶Mewaliꞌ tobahaꞌ mpololeke: hawaꞌi uwaꞌ toaꞌ to mampomotanaꞌ Pueꞌ Ala ane hawaꞌhi mepoꞌohi pe Io. Alaꞌ toaꞌ to mangkododungkui Pueꞌ Ala hangangaa robahaꞌ i lalira: Io bateꞌna uwaꞌ, hante bateꞌna hingkiꞌ mampaꞌani howonina to moromiꞌ pe hihimolu to tuꞌu-tuꞌu mangkodokoꞌi mpololeke pobahaꞌ Pueꞌ Ala.

⁷Nokomi pepoꞌohina hi Nohoꞌ, io mampetuntui hapo to nohawaꞌ Pueꞌ Ala, alaꞌ Pueꞌ Ala mampatiꞌiki kohingkiꞌ uwaꞌna uwai to molobuꞌi duniaꞌ. Mewaliꞌ, kehapoꞌi handoaꞌi tene noꞌokiꞌ to mewali angkana nopetuntui mpuꞌu hawaꞌne Pueꞌ Ala horiana mowali duanga to kodeꞌ hingkeꞌna io moꞌawa hante hantambina hei anaꞌna hawaꞌhi hingkiꞌ mahi podu. Lekiꞌ-lekiꞌna toaꞌ ntaniꞌna i duniaꞌ nihuku, angkana nokomi pepoꞌohina, hi Nohoꞌ norekeꞌ Pueꞌ Ala toaꞌ to mononto i pampeꞌeleNa.

⁸Nokomi pepoꞌohina hi Burahima, io mampetuntui hawaꞌna Pueꞌ Ala. Pueꞌ Ala mowowoiꞌi hei morumbaꞌi nolou pe woiꞌ to moꞌela, Notiꞌi woiꞌ to Notidoꞌki tiꞌo hingkiꞌ mewali dolaꞌna hi Burahima hei dolaꞌra muleꞌna. Mewaliꞌ kehapoꞌi hawaꞌi nobahaꞌ hi Burahima i imbo koꞌakoane, io molai motuntuni hawaꞌna Pueꞌ Ala.

⁹Ikohupaꞌna i woiꞌ tiꞌo, nopoꞌohi nturusi dandine Pueꞌ Ala tiꞌo. Hi Isaki anaꞌna, hante hi Akoꞌ oꞌuweꞌna, mantorimohi woꞌo dandina Pueꞌ Ala tiꞌo. Kehapoꞌi woiꞌ tiꞌo hingkiꞌ mewali dolaꞌra, angkana meꞌohaꞌhi itoꞌo mewaliluhi to mehupaꞌ, hawaꞌi uwaꞌ tambire hadoduo, meꞌohaꞌluhi i lali bambaruꞌ,

¹⁰alaꞌ hi Burahima mampekau haꞌanu kota to hingkiꞌ nopopewali hei noꞌaro Pueꞌ Ala. Kota tiꞌo hingkiꞌ uwaꞌ nturusi wute nantolou-louna.

¹¹Nokomi pepoꞌohina hi Burahima, io hante hi Sara moꞌanaꞌhi kehapoꞌi io toꞌamamo hei hi Sara hantambina lalo. Tiꞌo mewali alaꞌ nopoꞌohi i lalina hi Burahima kohingkiꞌ nobuhoꞌine Pueꞌ Ala dandiNe.

¹²I tempo tiꞌo, hi Burahima toꞌamamo alaꞌ liumo tempone mamuleꞌ. Angkana kehapoꞌi hatoꞌo, alaꞌ pepoꞌohina, hi Burahima mampemuleꞌki woriꞌ toaꞌ to hawaꞌi mokoꞌihaꞌa. Koworiꞌra hibali koworiꞌna betueꞌ i laniꞌ hei hibali woꞌoni i bota ntahiꞌ, mepongka ka haduolu, iomo hi Burahima.

¹³Lekiꞌ-lekiꞌna toaꞌ to mepoꞌohi tiꞌo, mepoꞌohihi i dandina Pueꞌ Ala wutehi mahi, angkana handoaꞌi tene pahua hapo to nodandikihi Pueꞌ Ala. Wadi totiꞌi: roꞌele ngkoꞌoꞌelalu pewaline. Robahaꞌ, morue tene honiꞌi mewali, angkana tontora motanaꞌ mpololeke mampekau hapo to Nodandikihi, iomo horiana rotiꞌi: tuwuꞌhi i duniaꞌ hieꞌe hibaliluhi to mehupaꞌ ba topolilo.

¹⁴Toaꞌ to mantiꞌi hatoꞌo, mombaha ka lolitara hapo to ropohinaru. To ropohinaru tiꞌo, iomo woiꞌ to wadi mewali woiꞌra hadoduo.

¹⁵Handoꞌio woiꞌ to ropolihi hampiha to ropaliꞌ, alaꞌ ane kewoiꞌ tiꞌo to ropohinaru, kehampakaꞌluhi tene mahuliꞌ itoꞌo.

¹⁶Angkana peꞌohaꞌa to ropohinaru, iomo peꞌohaꞌa to meliu komoromiꞌne, to nopatimomokimohi Pueꞌ Ala, iomo haꞌanu kota to uwaꞌ i suruga. Iomo horiana Io hawaꞌi mohili ane rotiꞌi Io Pueꞌra.

¹⁷Nokomi pepoꞌohina hi Burahima, i tempona nopampeꞌelei Pueꞌ Ala, io nolou mampewei hi Isaki anaꞌna to hadoduona hingkiꞌ nowali popenombana. Ka uluꞌ-uluꞌna, notiꞌikimo Pueꞌ Ala pe io, “Moliu anaꞌmu tiꞌo, hingkiꞌ pahuako woriꞌ muleꞌmu motuntuni hapo to Kudandikiko.” Angkana kehapoꞌi uwaꞌmo dandi tiꞌo, hi Burahima bateꞌnalu mampatimomo anaꞌna to hadoduona hingkiꞌ norereꞌ,

¹⁹alaꞌ i tempo tiꞌo notiꞌi hi Burahima i lalina, kehapoꞌi anaꞌna hingkiꞌ mahi, makuasaꞌ mpololeke Pueꞌ Ala wadi mampotuwuꞌi huliꞌ. Hei wadi totiꞌi: io pahua huliꞌ anaꞌna ka komahia.

²⁰Nokomi pepoꞌohina hi Isaki, io mobarakati hi Akoꞌ hante hi Esau anaꞌnahi hei mampokonontokihi hapo to hingkiꞌ mewali i lali kotuwuꞌra.

²¹Nokomi pepoꞌohina hi Akoꞌ, ikohandoaꞌana tene mahi, io mobarakati oꞌuweꞌna, anaꞌnahi hi Yusuf to roduo. I tempo tiꞌo io mebantutuꞌ i doe lolaiꞌna, menomba pe Pueꞌ Ala.

²²Nokomi pepoꞌohina hi Yusuf, i tempona hingkiꞌ mahi, io mampololita kohingkiꞌ polaira muleꞌna toSaraeli ka woiꞌ Masiri. Hei io meꞌowili, hingkeꞌna ane molaihi ka woiꞌ Masiri, ane mahiꞌi intu wukuna hangangaa rokomi mahuliꞌ nolou pe woiꞌ Kanaꞌa.

²³Nokomi pepoꞌohira tomotodina, iomo horiana ikonipoꞌanaꞌkina hi Musa, io hawaꞌi nitube angkana niwuni tolu mbula komoruene, alaꞌ niꞌokiꞌ oꞌanaꞌ tiꞌo manihoiꞌ mpololeke, hei hawaꞌhi morokaꞌ molungkaꞌi hawaꞌna datura toMasiri hingkeꞌna motubehi lekiꞌ-lekiꞌna oꞌanaꞌ tomaꞌani pe uwai Nil.

²⁴Nokomi pepoꞌohina hi Musa, i temponamo kodeꞌ, hawaꞌi nolei nitiꞌi oꞌuweꞌna datu toMasiri.

²⁵Hawaꞌi nolei tuwuꞌ i komotanaꞌ-tanaꞌ to hampaiꞌlu to hingkiꞌ mangkomiꞌi pe lali dosa, angkana nolei tene tuwuꞌ i lali komaporiꞌ moꞌawa hante toaꞌna Pueꞌ Ala.

²⁶Meliu tene konopotanaꞌne hi Musa nipariwoiꞌ nokomi pepoꞌohina pe Datu Topohompoꞌ hintina pahua komanobaꞌna kodatua i Masiri, alaꞌ io mepohinaru mpololeke hingkeꞌna nohua howonine to kodeꞌ ka Pueꞌ Ala.

²⁷Hi Musa mampolihi woiꞌ Masiri alaꞌ pepoꞌohina, hei hawaꞌi morokaꞌ ka kobukotana datura toMasiri. Io tungkuꞌ nturusi i tungkaihana, hibalimo to pangkiꞌ Pueꞌ Ala to hawaꞌi wadi noꞌokiꞌ toaꞌ.

²⁸Nokomi pepoꞌohina, io mampetuntui hawaꞌna Pueꞌ Ala, hingkeꞌna mowali adaꞌ Ando Posusaꞌ Pokalintora toYahudi to uluꞌ-uluꞌna, hante norumbaꞌhi toSaraeli mampewewuiki raꞌana anaꞌ gimba i wambaꞌ tambira, hingkeꞌna ane moliuꞌi malaꞌeka to merorokoꞌ, anaꞌra tokokaꞌ hawaꞌi hingkiꞌ nirokoꞌ hibali anaꞌra toMasiri tokokaꞌ.

²⁹Nokomi pepoꞌohira, toSaraeli mewutehi i Tahiꞌ Momeaꞌ hibaliluhi matengkaꞌ i lorina. Angkana toMasiri to mepodapaꞌ mahihi podu kolentuꞌara mewute i tahiꞌ tiꞌo.

³⁰Nokomi pepoꞌohira, toSaraeli motuleiꞌihi bente kota Yeriko pitu ando komoruene. Koꞌukoana mokero bente tiꞌo i ando kapitu.

³¹Nokomi pepoꞌohina hi Raha, kehapoꞌi io to mampobaluꞌ wotana, angkana io hawaꞌi nirokoꞌ moꞌawa hante tohabobolaꞌna i Yeriko to hawaꞌhi mengkoruꞌ pe Pueꞌ Ala. Tiꞌo mewali alaꞌ io mantorimo mata-matara toSaraeli i tambina, hei nosulungihi.

³²Kotuꞌuana woriꞌ tene hibali to kutiꞌikikei, angkana hamboaꞌmo ganaꞌ tempoka motunturakakikei, rapaꞌna noniuꞌ hi Gideo, hi Bara, hi Simson, hi Eta, hi Daudi, hi Semuel hei nabi-nabi ntaniꞌna.

³³Nokomi pepoꞌohira: Monanihi kodatua-kodatua uwaꞌ to moparenta hante mononto, horiana pahuahi to nodandikihi Pueꞌ Ala. Uwaꞌ to hawaꞌi nopahampo singa,

³⁴uwaꞌ to hawaꞌi mahi tempora nitube pe lali api to makiꞌ, uwaꞌ to himpolohoꞌ ka toaꞌ to mangkodokoꞌi merorokoꞌ, uwaꞌ to moledeꞌ wotara, angkana mewalihi maroho mpololeke, uwaꞌ to wurani moponiꞌ, hei uwaꞌ to monani surodadu poniꞌra ka woiꞌ ntaniꞌna.

³⁵Nokomi pepoꞌohira, uwaꞌhi towoweꞌe to pahua huliꞌ halalira alaꞌ nipatuwuꞌhi huliꞌ. Angkana uwaꞌhi woꞌo toaꞌ ntaniꞌne to nipoperima-rima alaꞌ pepoꞌohira wutehi mahi. Rolei tene nirokoꞌ hintina mosapuaka Pueꞌ Ala, alaꞌ mangkodokoꞌihi nipatuwuꞌ huliꞌ hingkeꞌna pahuahi kotuwuꞌ to meliu komoromiꞌne.

³⁶Uwaꞌhi to nipononaꞌa hei nikondo, uwaꞌhi woꞌo to nihiluꞌ hante rante hei nitarungkuꞌ.

³⁷Uwaꞌhi to niwatui wutehi mahi, to nirereꞌ hante garagaji, nirokoꞌ hante piho. Uwaꞌhi to merima-rima mpololeke tuwuꞌra. Moliloluhi hei baduꞌra ka koliꞌ gimba romo hante koliꞌ bekeꞌ hei nipoperima-rimahi.

³⁸Mehilaihi nolou pe popada lori hante pe biri-biri, hei meꞌohaꞌhi i woloꞌ watu. Kotuꞌuana, hawaꞌhi hintotoꞌ meꞌohaꞌ i duniaꞌ to kodake hieꞌe.

³⁹Nokomi pepoꞌohira, nopotanaꞌ Pueꞌ Ala, kehapoꞌi handoaꞌhi tene pahua hapo to Nodandikimohi.

⁴⁰To nopatimomo Pueꞌ Ala meliu komoromiꞌne, hingkeꞌna i tempora moꞌawa hante ingkiꞌ, hingkiꞌ Nopaꞌanihi woꞌo kosalamaꞌa.