Read Rampi Ibarani 12 Bible Online

Ibarani 12 - Rampi bible

Ibarani 12

¹Halali-halali! Ingkiꞌ hieꞌe hibaliki to notuleliꞌi toaꞌ woriꞌ to maroho pepoꞌohira hampiha. Hinamo toponindi hei totuntuni pepoꞌohire. Ingkiꞌ hieꞌe hibali toaꞌ to mosilumba mehilai, iomo horiana hangangaa totube lekiꞌ-lekiꞌne to poko mesalempori. Hangangaa totube dosante to mampomadoriki hei hangangaa mantahaki motuntuni lala to nopokonontokiki Pueꞌ Ala.

²I lali posilumba tiꞌo pekirinta hangangaa mononto nturusi pe hi Yesu, alaꞌ Io to himpodulu mobungkahi lala pepoꞌohi hei mampoganaꞌi pepoꞌohi hingkeꞌna hawaꞌi uwaꞌ komakuraꞌna pepoꞌohinta. Io to mantaha mampolala lala to mepokohili i loti momehulepe, angkana kehapoꞌi hatoꞌo, hawaꞌi Nopoꞌilali, alaꞌ Nokolowoi nturusi komotanaꞌ to hingkiꞌ Nohua ane tutumoꞌi jamaNe, horiana hinewowoꞌena Io mahura i pahura to teꞌadaꞌi i hirina pahura kodatuana Pueꞌ Ala.

³Maporiꞌ mpololeke laline hi Yesu mohinoroi toaꞌ to kodake waliana hei meꞌewa. Ingkei woꞌo noꞌewakei toaꞌ to kodake, angkana i lali poponiꞌmi moꞌewa dosa, handoaꞌkei tene nirokoꞌ hibali hi Yesu. Mewaliꞌ, halali-halali, hangangaa ipekirikei hohumbo komantahane hi Yesu i lali komaporiꞌ, hingkeꞌna ingkei woꞌo hawaꞌkei moledeꞌ hei hibali tota uwaꞌ pepohinaruami.

⁵Hei hangangaa ikolowoikei poturuꞌne pohawaꞌna Pueꞌ to mampoturuꞌkei hibali haduo umoꞌ mampoturuꞌ anaꞌna, to mantiꞌi waheꞌe: “Anaꞌku, ipoꞌilalikei mpololeke poturuꞌne Pueꞌ, hei inioꞌ masusa lalimi ane Nokamorokikei.

⁶Alaꞌ Pueꞌ Ala mokamoroki lekiꞌ-lekiꞌna toaꞌ to Nopokarima, hei molabehiꞌ lekiꞌ-lekiꞌna toaꞌ to Nopoꞌanaꞌ.” [26]

⁷Hangangaa mantahakei i lali komaporiꞌ. Alaꞌ komaporiꞌ tiꞌo iomo poturuꞌ hei pekamoroki ka Umoꞌmi to i suruga. Pueꞌ Ala mampoturuꞌkei hibali haduo umoꞌ mampoturuꞌ hei mokamoroki anaꞌna, alaꞌ umoꞌ hangangaa mokamoroki anaꞌna.

⁸Lekiꞌ-lekiꞌna toaꞌ to nopoꞌanaꞌ Pueꞌ Ala, bateꞌna Nokamoroki. Mewaliꞌ, ane rapaꞌna hawaꞌkei nokamoroki Pueꞌ Ala, palaihana handoꞌiokei anaꞌNa mpololeke.

⁹Lekiꞌ-lekiꞌta nokamorokiki todulunta i duniaꞌ, angkana kehapoꞌi hatoꞌo, bateꞌra toꞌadaꞌihi, pelumbuꞌna tene Umoꞌta to i suruga. Ane Nokamorokiki, hangangaa topengkoruꞌi mpololeke horiana pahuaki kotuwuꞌ.

¹⁰Todulunta i duniaꞌ mampoturuꞌki hampaiꞌlu komoruene. Poturuꞌra tiꞌo, uwaꞌ tampaꞌne, alaꞌ wadihi mampaꞌaniki lolita motuntuni hapo to moromiꞌ i peꞌelera, angkana Pueꞌ Ala mampoturuꞌki i koromiꞌanta, hingkeꞌna mangkolehiki woꞌo hibali hante Io.

¹¹Kolentuꞌanta ropoturuꞌ ba rokamorokiki, hawaꞌi moromiꞌ pehorinte, masusa lalinte. Angkana, ane topetuntuiꞌi poturuꞌ tiꞌo, kotuwuꞌta hingkiꞌ moromiꞌ, lolebaꞌ lalinte hei walianta hingkiꞌ mononto.

¹²Iomo horiana ipokarohokei wotami to moledeꞌ.

¹³Hangangaa ipokarohokei petuntumi pe Pueꞌ, hingkeꞌna ane uwaꞌ tene to i lumbumi to bata-bata lalira, hawaꞌhi hingkiꞌ monawuꞌ, angkana hingkiꞌ maroho huliꞌ pepoꞌohire.

¹⁴Hangangaa magegakei hingkeꞌna mohintuwuꞌkei hante lekiꞌ-lekiꞌna toaꞌ, hei magegakei woꞌo hingkeꞌna mangkolehi tuwuꞌmi, alaꞌ toaꞌ to hawaꞌi mangkolehi tuwuꞌra, hawaꞌhi hingkiꞌ pangkiꞌ Pueꞌ Ala.

¹⁵Majaga-jagakei hingkeꞌna hawaꞌi uwaꞌ halalimi to mengkoꞌela ka Pueꞌ Ala hei mosapuaka rimaNa. Moromiꞌ-romiꞌkei hingkeꞌna hawaꞌi uwaꞌ toaꞌ to mampomokero pohintuwuꞌmi, horiana woriꞌ toaꞌ tekomi pe lali dosa. Iohi merorasui i lumbumi.

¹⁶Moromiꞌ-romiꞌkei hingkeꞌna hawaꞌkei uwaꞌ to mebualosi ba mowali walia to mekokomaꞌi. Inioꞌkei hibali hi Esau hampiha to hawaꞌi moꞌadaꞌi pebarakatina Pueꞌ Ala i kotokokaꞌana. Kotokokaꞌana to hingkiꞌ nohua ka umoꞌna, nopobaluꞌ pe hineeꞌna, notopu hante pangka hantaboꞌ.

¹⁷Ibahaꞌkei mpololeke lolitonane tiꞌo. Uko tiꞌo, nokodokoꞌi pahua pebarakati ka umoꞌna, angkana hawaꞌi nipaꞌani. Kehapoꞌi meꞌola mamperapiꞌ pebarakati tiꞌo, hamboaꞌmo uwaꞌ lala mampokoromiꞌi komasalaꞌna.

¹⁸Halali-halali, ane mehupaꞌkei pe Pueꞌ Ala hinewowoꞌena, hawaꞌi hibali hante toSaraeli. Hampiha, Pueꞌ Ala mohawaꞌ pe toSaraeli ka biri Sinai i koNopaꞌanira AturaNa. Biri tiꞌo, biri biasa. Kolentuꞌara toSaraeli dodungku i biri tiꞌo, pangkiꞌmohi api to mamua mpololeke, hei kini to mokorindi, hante parowo to makaja.

¹⁹Pahorimohi moni torompeꞌ to makaja, hei Pueꞌ Ala mampololitakihi, Notiꞌi, “Hihimolu to modihaꞌ biri hieꞌe hangangaa niwatui wute mahi, moromiꞌ pinatuwuꞌ moromiꞌ toaꞌ.” Morokaꞌhi mpololeke pahori hawaꞌ to nopowute Pueꞌ Ala, horiana roperapiꞌ hingkeꞌna Pueꞌ inioꞌ womo mololita pe iohi, alaꞌ hawaꞌi ropokohori mampehoromua.

²¹Hapo to roꞌokiꞌ toSaraeli tiꞌo mekororokaꞌi mpololeke, horiana hi Musa mantiꞌi woꞌo, “Morokaꞌa mpololeke hei mororidiꞌa.”

²²Halali-halali, hawaꞌkei wute i biri tiꞌo, angkana hinewowoꞌena wutemokei i Biri Sion hante kota Yerusale to i suruga, to nopeꞌohaꞌi Pueꞌ Ala to tuwuꞌ. Mohinoroikei i sabuna malaꞌeka to morampu-rampuhi i lali komotanaꞌ-tanaꞌ.

²³Hupaꞌmokei i posusaꞌara lekiꞌ-lekiꞌna anaꞌ tokokaꞌ, to teꞌukiꞌ konaꞌra i lali suruga. Dongkaꞌmokei i Pueꞌ Ala, Io to mobutusi kara-karana lekiꞌ-lekiꞌna toaꞌ. Moꞌawamokei hante toaꞌ to moruemo mahi to mononto waliara hampiha hante to nipomangkolehimohi i peꞌelena Pueꞌ Ala.

²⁴Hupaꞌmokei i hi Yesu, to Mampelumbui to mampokononto podandi to wolaꞌ to nowali Pueꞌ Ala. Lala to nopakeꞌ Pueꞌ Ala mampokononto podandi tiꞌo, iomo moliu hi Yesu i tempona hi Yesu nirokoꞌ. Meliu podumbuꞌane raꞌaNa tiꞌo ka raꞌana hi Abeli hampiha.

²⁵Ijagaikei hingkeꞌna inioꞌkei mosapuaka Pueꞌ, alaꞌ hinewowoꞌena Pueꞌ Ala to mololita pe ingkei! ToSaraeli hampiha hawaꞌhi mampoꞌohi lolitana Pueꞌ Ala to mohawaꞌ pe iohi i Biri Sinai, hei bateꞌra nihuku. Pelumbuꞌna tene ingkiꞌ to pahori lolitana Pueꞌ Ala to mohawaꞌ pe ingkiꞌ ka suruga. Ane tosapuakaꞌi PohawaꞌNe, bateꞌna hawaꞌki hingkiꞌ hipohinte ka pehukuNa.

²⁶I tempona Pueꞌ Ala mohawaꞌ pe toSaraeli i biri Sinai, loaꞌNa mampomododua duniaꞌ. Angkana hinewowoꞌena, uwaꞌ womo dandiNe to mantiꞌi, “Hampiha tene hingkiꞌ Kudua duniaꞌ hieꞌe horiana mokero. Hei handoꞌiolu duniaꞌ to hingkiꞌ Kudua, angkana laniꞌ woꞌo.”

²⁷PohawaꞌNa to mantiꞌi “Hampiha tene”, palaihana: Pueꞌ Ala hingkiꞌ modua hei mokero duniaꞌ to Nowali hieꞌe. Horiana to melobi romo iomo to hawaꞌi mododua.

²⁸Mewaliꞌ, halali-halali, nokomi kohingkiꞌ pahuanta dolaꞌta i lali poparentana Pueꞌ Ala to hawaꞌi wadi nidua, iomo horiana hangangaa totiꞌi woriꞌ komoromiꞌ i Pueꞌ Ala, hei hangangaa menombaki mpuꞌu pe Io motuntuni peleihaNa. Hangangaa toꞌadaꞌi hei topengkoruꞌi mpololeke,

²⁹alaꞌ Pueꞌ Ala to topenombai, hibali api to mamporopuꞌ lekiꞌ-lekiꞌna to Nohuku.