Read Rampi Ibarani 13 Bible Online

Ibarani 13 - Rampi bible

Ibarani 13

¹Hangangaa momepokarimakei nturusi hibalikei topohalali.

²Hangangaa popuhiꞌ lalimi mantorimo tolori to maweo i tambimi, alaꞌ tobahaꞌ uwaꞌmohi toaꞌ to mampotolori malaꞌeka, angkana hawaꞌi robahaꞌ komalaꞌekara.[27]

³Iponindikei halali hampepoꞌohimi to nitarungkuꞌ, alaꞌ hibalimokei woꞌo to nitarungkuꞌ. Hei isulungikei toaꞌ to nipoperima-rima nokomi pepoꞌohira, alaꞌ hibalimokei woꞌo to nipoperima-rima.

⁴Lekiꞌ-lekiꞌna toaꞌ hangangaa moꞌadaꞌi kohamoko to nipangakuꞌmo i hinarona Pueꞌ Ala. Hangangaa tungkuꞌkei i kohamokomi, alaꞌ toaꞌ to mebualosi hei to mowali walia to mekokomaꞌi, bateꞌra hingkiꞌ nohukuhi Pueꞌ Ala.

⁵Kotuwuꞌmi inioꞌ nopohawiꞌ doiꞌ, angkana ipotanaꞌkei hapolu to uwaꞌ i ingkei. Alaꞌ uwaꞌ lolitane Pueꞌ Ala to mantiꞌi: “Hawaꞌko howeꞌ hampiha hingkiꞌ Kupolihi, hei hawaꞌko howeꞌ hampiha hingkiꞌ Kupotedehi.”

⁶Iomo horiana maroho lalinte, hei totiꞌi: “Hawaꞌa morokaꞌ, alaꞌ Pueꞌ to mosulungiꞌa. Hawaꞌi kukorokaꞌ hapo to hingkiꞌ rowali toaꞌ i aku.” [28]

⁷Hangangaa iponindikei tadulakomi hampiha to mampoturuꞌkei Pohawaꞌna Pueꞌ Ala. Iꞌelekei hohumbo kotuwuꞌre. Pepoꞌohira wadi mewali pandiri' i ingkei.

⁸Hi Yesu Kerisitu hawaꞌi mabaliꞌ; Io tontonalu hibobali mepongka ka uluꞌ-uluꞌna, hinewowoꞌena, hei wute nantolou-louna.

⁹Mewaliꞌ inioꞌkei mampetuntui poturuꞌ to hawaꞌi tuꞌu to mampomonawuꞌkei. Aginamo mampoꞌilalikei kokodeꞌna rimana Pueꞌ Ala, alaꞌ iomo to mampokaroho pepoꞌohimi. Ane mampetuntuiki adaꞌ kopangka, hawaꞌi modumbuꞌ i lali kotuwuꞌta.

¹⁰Uwaꞌmo i ingkiꞌ meja potutua popenomba to wolaꞌ to topakeꞌ mampewei popenomba pe Pueꞌ Ala iomo hi Yesu Kerisitu. Tadulako-tadulako mpenomba to majama i Bambaruꞌ Penombaha, hawaꞌhi wadi mangka to ka meja to wolaꞌ tiꞌo.

¹¹Motuntuni atura agamara toYahudi, Tadulako Mpenomba Ngkodeꞌ morereꞌ pinatuwuꞌ hingkeꞌna mampohawa dosa, hei raꞌana nokomi pe lali Kamaraꞌ to Meliu Komanobaꞌne, angkana wotana rokomi nolou pe howali kota horiana nihunu wute mewali awu.

¹²Hatoꞌo woꞌo hi Yesu Kerisitu rokomi mesuwu pe howali kota. Itoꞌo Io pahua komaporiꞌ hei nirokoꞌ, hingkeꞌna raꞌaNa mampomangkolehi toaꞌNa.

¹³Mewaliꞌ, halali-halali, hibali konikomina hi Yesu mesuwu pe howali kota, watoꞌo woꞌo pesuwunte ka atura-atura agama toYahudi. Aginamo mepoꞌohiki pe hi Yesu, kehapoki ropononaꞌa toaꞌ hibali koropononaꞌana hi Yesu.

¹⁴Kotuwuꞌta i duniaꞌ hieꞌe buhaꞌ hante komaporiꞌ, angkana handoꞌio duniaꞌ hieꞌe to hingkiꞌ mewali peꞌohaꞌanta wute nantolou-louna. Hinewowoꞌena mepohinaruki pe peꞌohaꞌanta i suruga to hingkiꞌ uwaꞌ nturusi wute nantolou-louna.

¹⁵Mewaliꞌ, halali-halali, nokomi konopelumbuinta hi Yesu, wadiki mampewei nturusi popenombanta pe Pueꞌ Ala. Popenombanta tiꞌo handoꞌiomo pinatuwuꞌ, angkana pepokodeꞌ to totiꞌi mampokodeꞌ konaꞌNa.

¹⁶Inioꞌkei lemuli mowali hapo to moromiꞌ. Hangangaa mosulungikei halalimi, alaꞌ tiꞌomo popenomba to mampomotanaꞌ Pueꞌ Ala.

¹⁷Ipetuntuimokei poturuꞌre tadulakomi hei nipengkoruꞌihi, alaꞌ iohi to morandakei i lali pepoꞌohimi, hei iohi to hangangaa mehoniꞌ pe Pueꞌ Ala noniuꞌ i pajamara. Ipetuntuikei poturuꞌre hingkeꞌna motanaꞌhi mampopatengkaꞌ jamara. Ane hawaꞌi ipetuntuikei hawaꞌre, hingkiꞌ mampomasusakei lalira, hei hawaꞌkei hingkiꞌ morasiꞌ.

¹⁸Kuperapiꞌ hingkeꞌna nipekokaekika nturusi. Kibahaꞌ kopopuhiꞌna lalingki, alaꞌ i langkaꞌ-langkaꞌna kikodokoꞌi mowali nturusi to moromiꞌ.

¹⁹Hei kuperapiꞌ mpololeke hingkeꞌna nipekokaekiꞌa, hingkeꞌna mahuliꞌa hohiꞌ pe ingkei.

²⁰Moliu raꞌana Pueꞌta Yesu to nirokoꞌ, Pueꞌ Ala mampokononto dandiNa to mampohintuwuꞌki hante Io wute nantolou-louna. Hei Pueꞌ Ala mampotuwuꞌ huliꞌ hi Yesu ka komahia, horiana Nohini mewali Topolambaꞌ to meliu komoromiꞌne, hei ingkiꞌ hieꞌe gimbaNa, alaꞌ Pueꞌ Ala pongkane Romiꞌ Ngkotuwuꞌ.

²¹Kuperapiꞌ hingkeꞌna Nopaꞌaniki lekiꞌ-lekiꞌna to moromiꞌ, hingkeꞌna wadiki mampetuntui peleihaNa. Kuperapiꞌ hingkeꞌna moliu kuasaꞌna hi Yesu Kerisitu, Pueꞌ Ala majama i lalimi wute hapo to iwalikei hingkiꞌ mampomotanaꞌ mpololeke Pueꞌ Ala. Topokodeꞌmo Pueꞌ Yesu wute nantolou-louna. Amin.

²²Halali-halali, kuperapiꞌ hingkeꞌna ipoꞌilalikei poturuꞌ to teꞌukiꞌ i lali suraꞌ hieꞌe, kehapoꞌi ohina suraꞌku hieꞌe hangkokotulu.

²³Hingkeꞌna ibahaꞌkei woꞌo: halalinta hi Timotius nipolohoꞌmo ka petarungkuꞌa. Ane hupaꞌi iseꞌe, hingkiꞌ kupoꞌawa nolou mokadoroꞌikei.

²⁴Ipowutekei tabeangki pe lekiꞌ-lekiꞌna tadulakomi hante lekiꞌ-lekiꞌna halali hampepoꞌohimi. Tabea ka halalimi to ka Italia.

²⁵Hinamo Pueꞌ mobarakatikei lekiꞌ-lekiꞌmi.