Read Rampi Ibarani 2 Bible Online

Ibarani 2 - Rampi bible

Ibarani 2

¹Mewaliꞌ, alaꞌ komakuasaꞌna Pueꞌ Yesu, iomo horiana hangangaa tuꞌu-tuꞌuki mpololeke mampetuntui lekiꞌ-lekiꞌna poturuꞌ to nipowutemokiki, hingkeꞌna hawaꞌki mampolihi pepoꞌohinta.

²Aturana Pueꞌ Ala to ropowute malaꞌeka hawaꞌi uwaꞌ kotewolihiane, hante toaꞌ to hawaꞌhi motuntuni ba mampoꞌohi atura tiꞌo pahuahi pehuku hintotoꞌ hante waliara,

³meliu tene komakajane pehukuna Pueꞌ Ala pe ingkiꞌ ane moroa nangkoꞌki kareba kotehompoꞌ. Hei kareba kotehompoꞌ tiꞌo kodeꞌ mpololeke kuasaꞌne, alaꞌ Pueꞌ Yesu hadoduona to uluꞌ-uluꞌna mampowute kareba tiꞌo. Hei toaꞌ to uluꞌ-uluꞌna pahori lolitana hi Yesu hampiha, mampowutekiki kotuꞌuna kareba tiꞌo.

⁴Pueꞌ Ala mampokaroho pampowutera hante Nopaꞌanihi kuasaꞌ mowali woriꞌ langkaꞌ tandaꞌ kuasaꞌ to mepohele. Hei Io mampaꞌanihi woꞌo komapande to molangkaꞌ-langkaꞌ ka Inoha' Mangkolehi hintotoꞌ hante peleihaNa.

⁵Handoꞌio malaꞌeka to hingkiꞌ pahua kuasaꞌ ka Pueꞌ Ala hingkeꞌna moparenta duniaꞌ to wolaꞌ to hingkiꞌ mehupaꞌ to topololita hieꞌe,

⁶angkana toaꞌna wae Pueꞌ Ala to hingkiꞌ pahua kuasaꞌ tiꞌo. Tiꞌo nipokononto i lali Suraꞌ Mangkolehi to mantiꞌi waheꞌe: “O Pueꞌ, hawaꞌi masipatoꞌ Manusiaꞌ Ikolowoi! Hawaꞌi masipatoꞌ Anaꞌ Manusiaꞌ Irewahi!

⁷I tempo to hampaiꞌlu, Ipopewali tuwuꞌne hingkeꞌna i wowoiꞌ ka malaꞌeka. Uko tiꞌo, Ipokodeꞌ hante ipaꞌani pahura to manobaꞌ to teꞌadaꞌi.

⁸Ipopengkoruꞌ lekiꞌ-lekiꞌne pe Io.” [8] Mewaliꞌ, Pueꞌ Ala mampaꞌanimo kuasaꞌ pe Manusiaꞌ hingkeꞌna moparenta lekiꞌ-lekiꞌna. Palaihana, hawaꞌi uwaꞌ halangkaꞌ to hawaꞌi nokuasaꞌi Manusiaꞌ. Kehapoꞌi hinewowoꞌena komakuasaꞌna Manusiaꞌ tiꞌo pe lekiꞌ-lekiꞌna handoaꞌi tene mombaha pe ingkiꞌ.

⁹Angkana kuasaꞌ tiꞌo mambahamo i hi Yesu. KolentuꞌaNa tene tuwuꞌ i duniaꞌ hieꞌe, tuwuꞌNa i wowoiꞌ hangkiuꞌ ka malaꞌeka angkana hampaiꞌlu. Nokomi kopopuhiꞌna lalina Pueꞌ Ala pe ingkiꞌ, Nopokononto hingkeꞌna hi Yesu nirokoꞌ mewali sulewotana lekiꞌ-lekiꞌna toaꞌ. Hei alaꞌ koNopeweina wotaNe nirokoꞌ, hinewowoꞌena Io nipokodeꞌ hante nipaꞌani pahuraha to manobaꞌ hante teꞌadaꞌi.

¹⁰Pueꞌ Ala mowali lekiꞌ-lekiꞌna ohina duniaꞌ motuntuni pobutusiNa, hingkeꞌna lekiꞌ-lekiꞌna toaꞌ hingkiꞌ pahua tungkaihaNa. Hei tungkaihaNa tiꞌo hingkeꞌna woriꞌ toaꞌ Nopopewali anaꞌNa hante Nopomanobaꞌhi. Iomo horiana Pueꞌ Ala mampokononto hingkeꞌna hi Yesu mewali Tomamposalamaꞌ to hawaꞌi uwaꞌ komakuraꞌNa, moliu komaporiꞌ to Nohua wute mahi. Io to mepaꞌani lala hingkeꞌna pahuaki kotuwuꞌ to manobaꞌ hibali hante Io.

¹¹Hi Yesu to mampomangkolehi toaꞌ, hei toaꞌ to Nopomangkolehi, haduolu Umoꞌre. Iomo horiana hi Yesu hawaꞌi mohili mantiꞌi iohi tiꞌo halaliNa.

¹²Notiꞌi hi Yesu pe Pueꞌ Ala waheꞌe: “Hingkiꞌ Kupekarebaiki konaꞌMa i lumbura halalingKu, hante hingkiꞌ Kupokodeꞌ konaꞌMa i lumbura toaꞌMu.” [9]

¹³Notiꞌi womo hi Yesu: “MepohinaruꞌA mpololeke pe Pueꞌ Ala.” Hei hampiha womo hi Yesu mantiꞌi: “HieꞌemoꞌA mpuꞌu, moꞌawa hante anaꞌ-anaꞌna Pueꞌ Ala to NopaꞌanikiꞌA.” [10]

¹⁴Toaꞌ to nopoꞌanaꞌhi Pueꞌ Ala, iomo toaꞌ biasa to bateꞌna mahi. Iomo horiana hi Yesu mewali woꞌo toaꞌ hei kotuwuꞌNa hibali woꞌo kotuwuꞌ toaꞌ biasa, hingkeꞌna moliu komahiNa Io mokero kuasaꞌna Belisiꞌ to mangkomiki pe komahia.

¹⁵Moliu komahiNa tiꞌo, hi Yesu mampohenteki ka komotehuꞌta i komahia. Alaꞌ hampiha tuwuꞌki mewali hawiꞌna Belisiꞌ, alaꞌ tokorokaꞌi komahia.

¹⁶Mewaliꞌ, tobahaꞌ mpololeke: handoꞌio malaꞌeka to Nosulungi Pueꞌ Yesu, angkana ingkiꞌ muleꞌna hi Burahima to Nosulungi.

¹⁷Iomo horiana hi Yesu hangangaa mewali toaꞌ biasa hibali hante ingkiꞌ halaliNa i langkaꞌ-langkaꞌna, hingkeꞌna Io mewali Tadulako Mpenomba Ngkodeꞌ, to marima mpuꞌu laliNe hante Io tungkuꞌ mampopatengkaꞌ jamaNa pe Pueꞌ Ala hingkeꞌna dosana toaꞌ teꞌampuni.

¹⁸Tempona hi Yesu uwaꞌ tene i duniaꞌ hieꞌe, Io pahua komaporiꞌ hei nohohongkeꞌi Belisiꞌ, iomo horiana hi Yesu wadi mosulungi toaꞌ to nikeloi.