Read Rampi Ibarani 3 Bible Online

Ibarani 3 - Rampi bible

Ibarani 3

¹Halali-halali to mewali toaꞌna Pueꞌ Ala to Nowowoi mekahi pe suruga! Ipekokirikei kohihimona hi Yesu. Iomo Rumbaꞌana Pueꞌ Ala hante Tadulako Mpenomba Ngkodeꞌ to topoꞌohi.

²Hi Yesu tungkuꞌ mampopatengkaꞌ jamaNa to norumbaꞌkiꞌi Pueꞌ Ala, hibali hi Musa hampiha tungkuꞌ mampopatengkaꞌ jamana morewahi tambina Pueꞌ Ala; iomo morewahi toaꞌ-toaꞌNa.

³Angkana masipatoꞌ mpololeke hi Yesu pahua peꞌadaꞌi to meliu ka hi Musa, hibali toaꞌ to moꞌaro tambi bateꞌna meliu koniꞌadaꞌine ka tambi to noꞌaro.

⁴Lekiꞌ-lekiꞌna tambi, bateꞌna uwaꞌ to mowali. Angkana to mowali lekiꞌ-lekiꞌna to uwaꞌ, bateꞌnalu Pueꞌ Ala.

⁵Hi Musa wadi nipandiriꞌ hibali haduo toporewahi tambi. Io nipoꞌohi mampopatengkaꞌ jamana morewahi toaꞌna Pueꞌ Ala. Hei hapo to nowali hi Musa tiꞌo, mampokonontokiki Kareba Moromiꞌ to hingkiꞌ ropowute i tempo to hingkiꞌ dongkaꞌ moliu i Kerisitu.

⁶Angkana Kerisitu, handoꞌiolu toperewahi. Iomo AnaꞌNe Pueꞌ Ala to mampopatengkaꞌ nturusi jamaNa hibali haduo tadulako to morewahi lekiꞌ-lekiꞌna tambina Pueꞌ Ala, hante ingkiꞌmo hieꞌe tambine Pueꞌ Ala, asalana maroho nturusi pepoꞌohinte hante mepohinaruki pe Pueꞌ Yesu to topokodeꞌ.

⁷Mewaliꞌ, halali-halali, hangangaa ipehoromuakei moromiꞌ poturuꞌne Inohaꞌ Mangkolehi to teꞌukiꞌ i lali Suraꞌ Mangkolehi waheꞌe: “Ando hieꞌe, ane ihorikei loaꞌne Pueꞌ Ala,

⁸inioꞌ ipomorintodikei lalimi hibali komorintodina lalira tododulumi hampiha. Tododulumi tiꞌo moꞌewahi Pueꞌ Ala, hante mohohongkeꞌihi nturusi kosabaraꞌNa i popada lori.

⁹Notiꞌi Pueꞌ Ala: ‘Tododulumi mampehohongkeꞌA hante ropampeꞌelei mpuꞌu kosabaraꞌKa, hantarowae pangkiꞌmohi woriꞌ tandaꞌ kuasaꞌ to Kupomombahakimohi i lali iba mpuluꞌ ntoꞌa komoruene.

¹⁰Iomo horiana bukotaꞌA mpololeke pe iohi, alaꞌ pokohi motuntuni lala ntaniꞌ, hante hawaꞌhi hiniꞌ mampetuntui peleihangKu.

¹¹Iomo horiana bukotaꞌA hei Kudandi waheꞌe: Hawaꞌhi hingkiꞌ mekahi pe peꞌohaꞌa to Kupatimomokimohi umbiꞌ, iomo woiꞌ to Kudandikihi.’” [11]

¹²Halali-halali, majaga-jagakei hingkeꞌna hawaꞌi uwaꞌ i lumbumi to kodake lalina hei hamboaꞌmo mepoꞌohi pe Pueꞌ alaꞌ mampolihi pepoꞌohira pe Pueꞌ Ala to tuwuꞌ!

¹³Angkana wae momepokaroho lalikei nturusi i ando-andona, hingkeꞌna hawaꞌkei uwaꞌ to nipokonawuꞌ i dosa wute morintodi lalimi. Momepokaroho lalikei haduo hei haduo kolentuꞌana tene tuwuꞌki i tempo hieꞌe.

¹⁴Majamaki moꞌawa hante Kerisitu, ane hapo to topoꞌohi ka uluꞌana, totiko mpololeke wute i kotutuana.

¹⁵Alaꞌ hieꞌemo to teꞌukiꞌ i lali Suraꞌ Mangkolehi, to mantiꞌi waheꞌe: “Ando hieꞌe, ane ihorikei loaꞌne Pueꞌ Ala, inioꞌ ipomorintodikei lalimi hibali komorintodina lalira tododulumi hampiha to moꞌewahi Pueꞌ Ala.” [12]

¹⁶Himo to mampoꞌuwaꞌ kobukotana Pueꞌ Ala, kehapohi pahorimohi loaꞌNa? Handoꞌioreꞌi tododulumi toSaraeli to nokomi nabi Musa mesuwu ka woiꞌ Masiri?

¹⁷Hei himo to nokobukotai Pueꞌ Ala iba mpuluꞌ ntoꞌa komoruene? Handoꞌioreꞌi tododulumi toSaraeli to madosahi hingkeꞌna mahihi i popada lori?

¹⁸Hei himo to nopokononto Pueꞌ Ala moliu i sumpaNa, hingkeꞌna hawaꞌhi wadi mekahi pe peꞌohaꞌa to Nopatimomokihi, iomo woiꞌ to Nodandikihi? Handoꞌioreꞌi toSaraeli to hawaꞌhi mampetuntui hawaꞌNa?

¹⁹Mewaliꞌ tobahaꞌmo: kohawaꞌra wadi mekahi pe woiꞌ to nodandikihi Pueꞌ Ala hante meꞌohaꞌ moꞌawa hante Io, alaꞌ hawaꞌhi mepoꞌohi pe Io.