Read Rampi Ibarani 4 Bible Online

Ibarani 4 - Rampi bible

Ibarani 4

¹Dandina Pueꞌ Ala pe ingkiꞌ uwaꞌ tene hingkeꞌna wadiki pahua peꞌohaꞌa moꞌawa hante Io. Iomo horiana hangangaa majaga-jagaki mpololeke, hingkeꞌna hawaꞌi uwaꞌ haduo ka lumbunta to hawaꞌi pahua hapo to Nodandimo tiꞌo.

²Alaꞌ ingkiꞌ hieꞌe, nipowutemokiki woꞌo Kareba Moromiꞌ, hibali toSaraeli hampiha. Angkana pohawaꞌna Pueꞌ Ala to rohori tiꞌo hawaꞌi mangkomi pebarakati pe iohi, hei hawaꞌi modumbuꞌ, alaꞌ hawaꞌhi mepoꞌohi.

³Bateꞌnalu ingkiꞌ to mepoꞌohi to pahua peꞌohaꞌa moꞌawa hante Pueꞌ Ala. Ane toaꞌ to hawaꞌi mepoꞌohi, hawaꞌhi pahua peꞌohaꞌa tiꞌo. Tiꞌo tobahaꞌ ka Pohawaꞌna Pueꞌ Ala to mantiꞌi waheꞌe: “Nokomi kobukotangKu horiana Kudandi waheꞌe: Hawaꞌhi mpuꞌu hingkiꞌ mekahi pe peꞌohaꞌangKu meꞌohaꞌ moꞌawa hante Aku.” [13] Kehapoꞌi uwaꞌmo peꞌohaꞌa to nopatimomo Pueꞌ Ala ka Pewaliana duniaꞌ, alaꞌ ukomo jamaNe tiꞌo.

⁴Uwaꞌ teꞌukiꞌ i lali Suraꞌ Mangkolehi noniuꞌ ando kapitu waheꞌe: “I ando kapitu, Pueꞌ Ala meꞌohaꞌ ka lekiꞌ-lekiꞌna jamaNa.” [14]

⁵Hei uwaꞌ woꞌo teꞌukiꞌ i Pohawaꞌna Pueꞌ Ala to mantiꞌi waheꞌe: “Hawaꞌhi mpuꞌu hingkiꞌ mekahi i peꞌohaꞌangKu hei meꞌohaꞌ moꞌawa hante Aku.” [15]

⁶Mewaliꞌ iohi to uluꞌ-uluꞌna pahori Kareba Moromiꞌ, hawaꞌhi pahua peꞌohaꞌa moꞌawa hante Pueꞌ Ala, alaꞌ hawaꞌhi motuntuni hawaꞌNa. Ane hatoꞌoꞌi toaꞌ ntaniꞌna to pahua peꞌohaꞌa tiꞌo.

⁷Iomo horiana Pueꞌ Ala mampokononto ando ntaniꞌ hingkeꞌna toaꞌ wadi pahua peꞌohaꞌa moꞌawa hante Io. Ando to Nopokononto iomo “Ando hieꞌe”. Haꞌumbora natu ntoꞌa mepongka toSaraeli uwaꞌ i popada lori, datu Daudi moꞌukiꞌ Pohawaꞌna Pueꞌ Ala to mantiꞌi waheꞌe: “Ando hieꞌe, ane pahorikei loaꞌna Pueꞌ Ala, inioꞌ ipomorintodikei lalimi.” [16]

⁸Ane rapaꞌna hi Yosua mangkomimo toYahudi pe peꞌohaꞌa to nodandi Pueꞌ Ala, bateꞌna Pueꞌ Ala hamboaꞌmo mololita ando ntaniꞌ.

⁹Mewaliꞌ, uwaꞌ tene koholangkoa i toaꞌna Pueꞌ Ala hingkeꞌna pahuahi peꞌohaꞌa moꞌawa hante Io. Peꞌohaꞌa tiꞌo, hibali hante Pueꞌ Ala meꞌohaꞌ i ando kapitu,

¹⁰alaꞌ ane meꞌohaꞌki moꞌawa hante Pueꞌ Ala, palaihana, meꞌohaꞌki woꞌo ka jamanta hibali Pueꞌ Ala meꞌohaꞌ ka jamaNa i ando kapitu.

¹¹Mewaliꞌ halali-halali, hangangaa magegaki hingkeꞌna pahuaki peꞌohaꞌa moꞌawa hante Pueꞌ Ala, hante inioꞌki maꞌoruꞌ ka pepoꞌohinta, hibali toSaraeli hampiha to hawaꞌi mampetuntui hawaꞌNa.

¹²Alaꞌ Pohawaꞌna Pueꞌ Ala iomo lolita to tuwuꞌ hante makuasaꞌ. Meliu komotarine ka piho to kemata mpotimali. Piho tiꞌo wadi metotohu wute i kololengkeꞌa wuku hante itiꞌ wuku. Angkana Pohawaꞌna Pueꞌ Ala metotohu wute pe lalinta. Hei PohawaꞌNa tiꞌo nopakeꞌ Pueꞌ Ala moparesaꞌ pekirinta hante tungkaihana lalinta.

¹³Hawaꞌi uwaꞌ halangkaꞌ to tuwuꞌ to tewowuni i pampeꞌeleNa. Lekiꞌ-lekiꞌna to uwaꞌ mombaha hante mobaro i Io. Hei hangangaa topangakuꞌ i hinaroNa lekiꞌ-lekiꞌna walianta.

¹⁴Uwaꞌmo haduo Tadulako Mpenomba Ngkode to mewali Tadulako Mpenomba Ngkodeꞌte: Iomo hi Yesu AnaꞌNa Pueꞌ Ala. Io mengkaꞌoreꞌmo mekahi pe lali suruga hante nolou pe hinarona Pueꞌ Ala. Iomo horiana hangangaa topoꞌohi hei topangakuꞌ nturusi kohiYesuna Pueꞌte.

¹⁵Iomo Tadulako Mpenomba Ngkodeꞌte to pobahaꞌ hei mampolala komoledeꞌta. Nobahaꞌ mpololeke, alaꞌ Io nihohongkeꞌimo woꞌo i langkaꞌ-langkaꞌna hibali hante ingkiꞌ, angkana Io hawaꞌi madosa.

¹⁶Iomo horiana, hawaꞌki paralu morokaꞌ mangkododungkui Pueꞌ Ala to meparenta hante kokodeꞌna rimaNa, hingkeꞌna tobahaꞌ mpololeke komarimaNe i ingkiꞌ, hante i tempo to toparalu, hingkiꞌ Nosulungiki ka kopopuhiꞌna laliNa.