Read Rampi Ibarani 6 Bible Online

Ibarani 6 - Rampi bible

Ibarani 6

¹Mewaliꞌ halali-halali, inioꞌ tohuliꞌ-huliꞌi poturuꞌ to uluꞌ-uluꞌne. Ane toaꞌ to hongkoꞌ mewali toSarani, iohi to hangangaa nipoturuꞌ i poturuꞌ to uluꞌ-uluꞌna, hingkeꞌna nohohoꞌhi ka waliara to mangkomihi pe komahia, hei mepoꞌohihi pe Pueꞌ Ala. Hangangaa nipoturuꞌhi noniuꞌ i periu hante pohini korawe mobarakati toaꞌ. Hangangaa nipoturuꞌhi noniuꞌ hapo to hingkiꞌ mewali i ando to hingkiꞌ dongkaꞌ, iomo: peꞌarona huliꞌ to mahi hante pehuku to hawaꞌi mokoꞌukoa. Angkana ingkei hangangaa kupoturuꞌkei poturuꞌ kololiuhana hingkeꞌna pampekirimi hawaꞌi uwaꞌ komakuraꞌne.

³Poturuꞌ tiꞌo hingkiꞌ topegurui ane noponiuꞌi Pueꞌ Ala,

⁴alaꞌ toaꞌ to rotungkai maꞌoruꞌ ka pepoꞌohira, hamboaꞌmohi wadi nipoturuꞌ huliꞌ hingkeꞌna nohohoꞌhi ka dosara. Hampiha, mobaro lalire alaꞌ pobahaꞌmohi Kareba Moromiꞌ, motanaꞌhi mantorimo pebarakati ka Pueꞌ Ala, hei lalira nokuasaꞌi Inohaꞌ Mangkolehi;

⁵robahaꞌ mpololeke komoromiꞌne pohawaꞌna Pueꞌ Ala hante kuasaꞌna Pueꞌ Ala to hingkiꞌ mombaha i ando to hingkiꞌ dongkaꞌ.

⁶Angkana ane uko tiꞌo, rotungkai maꞌoruꞌ ka pepoꞌohira, hamboaꞌmohi wadi nipoturuꞌ huliꞌ hingkeꞌna nohohoꞌhi ka dosara, alaꞌ nokomi posapuakara Pueꞌ Yesu, hibalihi toaꞌ to mopaku huliꞌ AnaꞌNa Pueꞌ Ala hei ropononaꞌa i hinarona toaꞌ to woriꞌ.

⁷Toaꞌ to mepoꞌohi nipandiriꞌaki hibali woiꞌ to noꞌuroni hei nokotuwuꞌi huꞌa-huꞌa to modumbuꞌ i topokineteꞌ. Alaꞌ woiꞌ tiꞌo nobarakati Pueꞌ Ala.

⁸Angkana ane woiꞌ tiꞌo nokotuwuꞌi donaꞌ hante rui, hamboaꞌmo modumbuꞌ, hingkiꞌ notundaꞌ Pueꞌ Ala, hei koꞌukoana nihunu. Hatoꞌo woꞌo toaꞌ to maꞌoruꞌ ka pepoꞌohira, hingkiꞌ nohukuhi Pueꞌ Ala.

⁹Angkana ingkei halali-halali to kupokarima, kehapoꞌi hatoꞌo lolitangka, kibahaꞌ hawaꞌkei hibali woiꞌ to notundaꞌ Pueꞌ Ala. Kibahaꞌ koꞌuwaꞌna wuaꞌmi to meliu komoromiꞌne, tiꞌomo pepoꞌohimi hante waliami to hintotoꞌ i toaꞌ to pahua kotehompoꞌ ka Pueꞌ Ala.

¹⁰Pueꞌ Ala bateꞌna mononto. Hawaꞌi hingkiꞌ Nokombulihaki jamami to ijamakei. Tongawa ipokarimakei Pueꞌ Ala, alaꞌ woriꞌ mpihakei mosulungi toaꞌna Pueꞌ Ala, moromiꞌ ka uluꞌ-uluꞌana, moromiꞌ hinewowoꞌena.

¹¹Angkana kiperapiꞌ mpololeke halali-halali, hingkeꞌna tuꞌu-tuꞌukei mampololiu walia to hatoꞌo wute i kotutuana, hingkeꞌna ihuakei mpuꞌu hapo to ipohinarukei ka Pueꞌ Ala.

¹²Inioꞌkei uwaꞌ to lohe, angkana hangangaa tuwuꞌkei hibali toaꞌ to mantorimo hapo to nodandi Pueꞌ Ala, alaꞌ mepoꞌohihi hei sabaraꞌhi mampekau hapo to Nodandikihi.

¹³Tempona Pueꞌ Ala mampowute dandiNa pe hi Burahima, hawaꞌi uwaꞌ to moliuni kokodeꞌna tuwuꞌna Pueꞌ Ala, iomo horiana Io modandi moliu konaꞌNa hadoduona, Notiꞌi:

¹⁴“Hingkiꞌ Kupopewali hapo to Kudandikiko hieꞌe: Hingkiꞌ Kubarakatiko hei hingkiꞌ Kupoworiꞌ muleꞌma wute mawunene.”

¹⁵Hi Burahima sabaraꞌ mampekau horiana io pahua hapo to nodandi Pueꞌ Ala.

¹⁶Ane rapaꞌna uwaꞌ haduo toaꞌ to modandi, biasa io mosumpa mantiꞌi konaꞌ to meliu kokodeꞌne tuwuꞌna ka io. Sumpana tiꞌo mampokaroho lolitana hingkeꞌna hawaꞌi uwaꞌ toaꞌ to mampatiꞌikiꞌi io mowuti.

¹⁷Hatoꞌo woꞌo Pueꞌ Ala: i pampowuteNa dandiNa pe hi Burahima, tepekahi lekiꞌ-lekiꞌna toaꞌ to hingkiꞌ pahua dandi tiꞌo, Nokodokoꞌi mampokaroho lalira hingkeꞌna robahaꞌ kohawaꞌna tewolihi tungkaihaNe pe iohi. Iomo horiana Nopokaroho mpololeke dandiNe moliu sumpa.

¹⁸Ane Pueꞌ Ala modandi hante sumpaNa, rolangkaꞌ tiꞌo hawaꞌi hingkiꞌ tewolihi, alaꞌ Io hawaꞌi mowuti. Iomo horiana ingkiꞌ to mepohinaru pe Pueꞌ Ala, maroho lalinte mampekau hapo to topohinaru ka Io.

¹⁹Pepohinaruanta tiꞌo hibali rante to mapokaroho pepoꞌohinta pe Pueꞌ Ala. Pepohinaruanta tiꞌo mangkomiki moliuni porindi wida to mohidaki pe kamaraꞌ to meliu komanobaꞌne i Tambina Pueꞌ Ala i suruga.

²⁰Hi Yesumola to mampodulukiki inoꞌo, hingkeꞌna metuntuki woꞌo nolou. Io to mewali Tadulako Mpenomba Ngkodeꞌ wute nantolou-louna, motuntuni konipotadulako mpenombana hi Mekisedeꞌ.