Read Rampi Ibarani 7 Bible Online

Ibarani 7 - Rampi bible

Ibarani 7

¹Hi Mekisedeꞌ tiꞌo, iomo haduo datu i kota Salem hampiha hei io woꞌo haduo tadulako mpenomba to mampopatengkaꞌ jama mpenomba pe Pueꞌ Ala to i suruga. Ipahuliꞌna hi Burahima ka poponiꞌa monani haꞌumbo duo datu, hi Mekisedeꞌ nolou mampohidupaꞌki hi Burahima hei mobarakatiꞌi.

²Uko tiꞌo, hi Burahima modolaꞌ-dolaꞌ luma to nohua i lali poponiꞌa, hei mampaꞌani hadolaꞌ hampuluꞌ pe hi Mekisedeꞌ. Konaꞌna hi Mekisedeꞌ palaihana: “Datu to mononto,” hei alaꞌ koꞌiona datu i Salem, wadi woꞌo nitiꞌi, “Datu to mangkomi romiꞌ ngkotuwuꞌ,” alaꞌ palaihana lolita Salem iomo romiꞌ ngkotuwuꞌ.

³Noniuꞌ hi Mekisedeꞌ, hawaꞌi uwaꞌ to teꞌukiꞌ noniuꞌ i umoꞌna ba inoꞌna ba peꞌuluana. Hawaꞌi woꞌo uwaꞌ to teꞌukiꞌ noniuꞌ i pongkana tuwuꞌna ba kotutuana tuwuꞌna. Wadi totiꞌi hi Mekisedeꞌ mewali pandiri' alaꞌ uwaꞌ kohibaliane hante AnaꞌNa Pueꞌ Ala: konipotadulakona menomba hingkiꞌ uwaꞌ nturusi wute nantolou-louna.

⁴Mewaliꞌ, i lolitonana tiꞌo tobahaꞌ kokodeꞌne tuwuꞌna hi Mekisedeꞌ. Ane hi Burahima, kodeꞌ woꞌo tuwuꞌne, alaꞌ io to nipoꞌumoꞌ lekiꞌ-lekiꞌna toYahudi. Angkana kehapoꞌi hatoꞌo, hi Burahima moꞌadaꞌi hi Mekisedeꞌ hei mampewei pe io hadolaꞌ hampuluꞌ ka luma to nohua i lali poponiꞌa.

⁵Motuntuni atura agama Yahudi, lekiꞌ-lekiꞌna toYahudi hangangaa mampewei hadolaꞌ hampuluꞌ ka pahuara pe muleꞌna hi Lewi to mewalihi tadulako mpenomba. Tadulako mpenomba tiꞌo, pahuahi dolaꞌra ka hangko toYahudira, kehapohi lekiꞌ-lekiꞌna muleꞌna hi Burahima.

⁶Hi Mekisedeꞌ handoꞌio muleꞌna hi Lewi, angkana kehapoꞌi hatoꞌo, pahua woꞌo hadolaꞌ hampuluꞌ ka hi Burahima. Hei kehapoꞌi hi Burahima pahua dandi ka Pueꞌ Ala, handoꞌio hi Burahima to mobarakati hi Mekisedeꞌ, angkana wuliha hi Mekisedeꞌ to mobarakati hi Burahima.

⁷Hei tobahaꞌ mpololeke: toaꞌ to nibarakati, i wowoiꞌ tene ka tomebarakati.

⁸Hatoꞌo woꞌo, meliu koꞌiwowomboꞌne tuwuꞌna hi Mekisedeꞌ ka muleꞌna hi Lewi to mewalihi tadulako mpenomba. Tadulako-tadulako mpenomba tiꞌo, pahua mpuꞌu hadolaꞌ hampuluꞌ ka hangko toYahudira, angkana bateꞌna mahihi woꞌo hibali toaꞌ biasa. Hi Mekisedeꞌ pahua hadolaꞌ hampuluꞌ ka hi Burahima, angkana hawaꞌi uwaꞌ teꞌukiꞌ i lali Suraꞌ Mangkolehi noniuꞌ ikomahina.

⁹Muleꞌna hi Lewi to mewalihi tadulako mpenomba pahua mpuꞌu hadolaꞌ hampuluꞌ ka halalira. Angkana wadi totiꞌi: muleꞌna hi Lewi mampewei hadolaꞌ hampuluꞌ pe hi Mekisedeꞌ moliu hi Burahima,

¹⁰alaꞌ hi Lewi tiꞌo, oꞌuweꞌ ngkotuꞌna hi Burahima. Ikohumeina hi Mekisedeꞌ mampohidupaꞌki hi Burahima, hi Lewi handoaꞌi tene uwaꞌ; angkana hibalimo uwaꞌ alaꞌ io hingkiꞌ nopoꞌoꞌuweꞌ ngkotuꞌ hi Burahima. Mewaliꞌ, meliu koꞌiwowomboꞌne tuwuꞌna hi Mekisedeꞌ ka hi Burahima hante muleꞌnahi hi Lewi.

¹¹Konopeweina Pueꞌ Ala AturaNe pe toYahudi, Io mohini muleꞌna hi Lewi Nopopewalihi tadulako mpenomba to mampohawaꞌki toaꞌ to woriꞌ hingkeꞌna motuntunihi AturaNa tiꞌo. Angkana toaꞌ hawaꞌi mewali mononto i peꞌelena Pueꞌ Ala alaꞌ pajamara tadulako mpenomba tiꞌo. Iomo horiana hangangaa mehupaꞌ haduo tadulako mpenomba to ntaniꞌna to motuntuni konipotadulako mpenombana hi Mekisedeꞌ, handoꞌio ka muleꞌna hi Harun toLewi.[19]

¹²Muleꞌnalu hi Lewi to wadi mewali tadulako mpenomba. Mewaliꞌ, ane nipohawaꞌi hante haduo tadulako mpenomba to ntaniꞌna, palaihana, Aturana hi Musa woꞌo hangangaa nipohawa.

¹³Tadulako Mpenomba Ngkodeꞌ to rotungkai iseꞌe, Iomo Pueꞌta Pueꞌ Yesu, to handoꞌio ka muleꞌna hi Lewi, angkana ka muleꞌna to ntaniꞌna to hawaꞌi howeꞌ hampiha mampopatengkaꞌ jamana tadulako mpenomba. Tobahaꞌ hi Yesu ka muleꞌna hi Yehuda, hei hi Musa hawaꞌi howeꞌ hampiha modandi noniuꞌ i muleꞌna hi Yehuda tempona mampololita noniuꞌ i tadulako mpenomba.

¹⁵Tongawa muleꞌna hi Lewi hangangaa nipohawa i lali pajamara mewali tadulako mpenomba, alaꞌ mehupaꞌmo Tadulako Mpenomba Ngkodeꞌ to hibali hante hi Mekisedeꞌ, angkana Io handoꞌio ka muleꞌna hi Lewi.

¹⁶Hei Io hawaꞌi woꞌo mewali tadulako mpenomba motuntuni aturana manusiaꞌ. Angkana wae Io mewali tadulako mpenomba alaꞌ kotuwuꞌNa to hawaꞌi mokoꞌukoa mampotongawa komakuasaꞌNa.

¹⁷Hibali to teꞌukiꞌ i lali Suraꞌ Mangkolehi: “Ingkomo Tadulako Mpenomba wute nantolou-louna, motuntuni konipotadulako mpenombana hi Mekisedeꞌ.” [20]

¹⁸Aturana hi Musa noniuꞌ pampewei popenomba moliu Tadulako Mpenomba Ngkodeꞌ nipohentemo, alaꞌ lala tiꞌo woriꞌ komakuraꞌne hei hamboaꞌmo modumbuꞌ.

¹⁹Atura tiꞌo hawaꞌi mangkomi toaꞌ pe Pueꞌ Ala. Iomo horiana atura tiꞌo nipohawa hante lala to meliu tene komoromiꞌne. Ane topetuntui lala to wolaꞌ tiꞌo, uwaꞌ pepohinaruante to maroho hei wadiki mangkododungkui Pueꞌ Ala.

²⁰Peꞌoꞌuwaꞌna tene, hi Yesu mewali tadulako mpenomba motuntuni dandina Pueꞌ Ala. Ane tadulako mpenomba to ntaniꞌna, hawaꞌhi nihini mewali tadulako mpenomba motuntuni dandi, angkana motuntunilu atura.

²¹Ikonihinina hi Yesu mewali Tadulako Mpenomba, Pueꞌ Ala to modandi hante sumpa, Notiꞌi: “Akumo hieꞌe Pueꞌ Ala to modandi hei mosumpa, hawaꞌi hingkiꞌ Kuwolihi lolitangKa: Ingkomo Tadulako Mpenomba wute nantolou-louna.” [21]

²²Alaꞌ tiꞌo, tongawa podandia wolaꞌ maroho tene ka podandia to nopoꞌuwaꞌ Pueꞌ Ala pe toSaraeli hampiha alaꞌ hi Yesumo to mewali pampokaroho podandia wolaꞌ tiꞌo.

²³Uwaꞌ womo halangkaꞌ poꞌoriane: muleꞌna hi Lewi, woriꞌmohi to mewali tadulako mpenomba, alaꞌ ane mahi haduo, nopohawa to haduona. Alaꞌ komahia tiꞌo, haduo tadulako mpenomba hawaꞌi hingkiꞌ mewali tadulako mpenomba wute nantolou-louna.

²⁴Angkana hi Yesu, konipotadulakoNa menomba hawaꞌi hingkiꞌ mokoꞌukoa hei hawaꞌi hingkiꞌ uwaꞌ to mampohawaꞌi, alaꞌ Io tuwuꞌ nturusi wute nantolou-louna.

²⁵Iomo horiana Nobiaꞌ mampohenteki ka pehuku dosanta hei mampaꞌaniki kosalamaꞌa to hawaꞌi uwaꞌ komakuraꞌne, kosalamaꞌa tiꞌo rotorimo toaꞌ to mekododungku pe Pueꞌ Ala moliu i hi Yesu. Alaꞌ Io to tuwuꞌ nturusi hei mosulewotaiki mekokae pe Pueꞌ Ala.

²⁶Mewaliꞌ, hintotoꞌ mpololeke hi Yesu to mewali Tadulako Mpenomba Ngkodeꞌ, alaꞌ Iolu to wadi mosulungiki. Mangkolehi tuwuꞌNe, hawaꞌi uwaꞌ salaꞌNe ba komakuraꞌNa. Hei kehapoꞌi mewali toaꞌ, Io hawaꞌi madosa hibali toaꞌ, horiana hinewowoꞌena Io nipopahura i pahura to i tanti ka lekiꞌ-lekiꞌna to uwaꞌ i suruga.

²⁷Hi Yesu tiꞌo hawaꞌi hibali tadulako mpenomba ngkodeꞌ to ntaniꞌna, to ando-andona hangangaa mampeweihi popenomba hingkeꞌna mampohawa dosara hadoduo, hei uko tiꞌo mampeweihi popenomba to mampohawa dosara toaꞌ to woriꞌ. Angkana hi Yesu, ganaꞌlu hampiha mampewei popenombaNa pe Pueꞌ Ala. Tiꞌo Nowali i tempona mampewei wotaNa hadoduona hingkeꞌna nirokoꞌI.

²⁸Toaꞌ to mewali tadulako mpenomba ngkodeꞌ motuntuni Poturuꞌna hi Musa, iohi toaꞌ biasaluhi to buhaꞌ komakuraꞌ. Angkana morue ka konipopatengkaꞌna Aturana hi Musa tiꞌo, Pueꞌ Ala modandi hingkiꞌ mohini AnaꞌNa to hadoduona mewali Tadulako Mpenomba Ngkodeꞌ. Hei AnaꞌNa tiꞌo mewali Topohompoꞌ to hawaꞌi uwaꞌ komakuraꞌNa hei to tuwuꞌ nturusi wute nantolou-louna.