Read Rampi Ibarani 8 Bible Online

Ibarani 8 - Rampi bible

Ibarani 8

¹Ohina poturuꞌki hieꞌe iomo: uwaꞌmo mpuꞌu Tadulako Mpenomba Ngkodeꞌ to mahura i hirina Pueꞌ Ala moparenta i pahuraha to teꞌadaꞌi i suruga.

²Io mewali Tadulako Mpenomba Ngkodeꞌ to majama i peꞌohaꞌa to mangkolehi i lali tambi penombaha to totuꞌuna to noꞌaro Pueꞌ Ala, handoꞌio to noꞌaro toaꞌ.

³Lekiꞌ-lekiꞌna Tadulako Mpenomba Ngkodeꞌ nihini hingkeꞌna mampewei pinatuwuꞌ hante popenomba to ntaniꞌna pe Pueꞌ Ala. Hatoꞌo woꞌo, hi Yesu Tadulako Mpenomba Ngkodeꞌ hangangaa mampewei popenombaNa pe Pueꞌ Ala, iomo wotaNa hadoduoNa.

⁴Rapaꞌna uwaꞌ tene hi Yesu i duniaꞌ, Io hawaꞌi hingkiꞌ mewali tadulako mpenomba, alaꞌ uwaꞌmohi tadulako mpenomba to mampewei popenomba pe Pueꞌ Ala motuntuni Aturana hi Musa.

⁵Tadulako mpenomba tiꞌo majamahi i lali tambi mpenomba to i duniaꞌ hieꞌe. Tambi mpenomba tiꞌo nipohibali hante Tambi mpenomba to uwaꞌ i suruga. Horiana hampiha, ikohandoaꞌna tene hi Musa moꞌaro Tambi mpenombaha, Pueꞌ Ala mohawaꞌmo pe io, Notiꞌi, “Ipoꞌilali! Lekiꞌ-lekiꞌna tiꞌo hangangaa iwali hibali hante hapo to Kuponoꞌokiꞌkiko i womboꞌ biri!”

⁶Angkana hinewowoꞌena Pueꞌ Ala mampaꞌani pe hi Yesu jama to meliu mpololeke komoromiꞌne ka jamara tadulako mpenomba i duniaꞌ hieꞌe. Hatoꞌo woꞌo maroho tene podandia to wolaꞌ to nopelumbui hi Yesu ka podandia to hampiha, alaꞌ dandi tiꞌomola to meliu komoromiꞌne.

⁷Ane rapaꞌna hawaꞌi uwaꞌ komakuraꞌne podandiaNa to uluꞌ-uluꞌna, iomo Aturana hi Musa, kehamboaꞌmo paralu Pueꞌ Ala mampoꞌuwaꞌ podandia to korompihana.

⁸Angkana Pueꞌ Ala mosalaꞌihi toaꞌNa alaꞌ kohawaꞌra hiniꞌ motuntuni dandiNa to uluꞌ-uluꞌna tiꞌo. Iomo horiana Notiꞌikihi waheꞌe: “Ipehoromuakei! Hampiha tempo hingkiꞌ Kupoꞌuwaꞌ podandia to wolaꞌ pe toSaraeli hante toYehuda,

⁹hawaꞌi hibali podandingKu to Kupoꞌuwaꞌ i tododulura hampiha ikoKurandara molai ka woiꞌ Masiri. Nokomi kohawaꞌra tungkuꞌ i podandingKu tiꞌo, iomo horiana Kusapuakahi.

¹⁰Mewaliꞌ, hieꞌemo podandingKa to hingkiꞌ Kupoꞌuwaꞌ hante toSaraeli i ando to hingkiꞌ dongkaꞌ: HawaꞌKu hingkiꞌ Kuporia i lali pekirira hei hingkiꞌ Kuꞌukiꞌ i lalira. Aku hingkiꞌ mewaliꞌA Pueꞌ Alara, hei iohi hingkiꞌ mewali toaꞌKu.

¹¹I tempo tiꞌo, hamboaꞌmohi paralu mampoturuꞌ halalira ba hangko awara hingkeꞌna iohi pobahaꞌA, alaꞌ iohi lekiꞌ-lekiꞌ hingkiꞌ pobahaꞌA, moromiꞌ to i wowomboꞌ tuwuꞌra moromiꞌ to i wowoiꞌ tuwuꞌra.

¹²I tempo tiꞌo, hingkiꞌ Kuꞌampuni dosare, hei hamboaꞌmo hingkiꞌ Kuponindi salaꞌre.” [22]

¹³Mewaliꞌ, i lali pohawaꞌna Pueꞌ Ala tiꞌo, Io mampololita noniuꞌ i dandiNa to wolaꞌ, hei alaꞌ dandi to wolaꞌ tiꞌo, dandi to uluꞌ-uluꞌna hohaimo hei hamboaꞌmo modumbuꞌ alaꞌ hingkiꞌ ukomoꞌi tempone.