Read Rampi Ibarani 9 Bible Online

Ibarani 9 - Rampi bible

Ibarani 9

¹Podandia to ka Pueꞌ Ala to uluꞌ-uluꞌna iomo to nopowute hi Musa pe toSaraeli hampiha. I lali podandia tiꞌo woriꞌ atura mpenomba hei atura i tambi penombaha to rowali toaꞌ.

²Tambi penombahara tiꞌo nikokeneꞌi Bambaruꞌ Penombaha. I lali tambi tiꞌo, uwaꞌ roꞌonu kamaraꞌ. Kamaraꞌ to i hinaro nikokeneꞌi Kamaraꞌ Mangkolehi. I lali kamaraꞌ tiꞌo, uwaꞌ: pamporideꞌa huluꞌ, meja pamporideꞌa roti, hei roti to ropopenomba pe Pueꞌ Ala.

³Kamaraꞌ koroꞌonuna uwaꞌ i lali mpololeke. Meroꞌonu kamaraꞌ tiꞌo nikohelaꞌi hampepaꞌ wida. Kamaraꞌ to i lali mpololeke nikokeneꞌi Kamaraꞌ to Meliu Komanobaꞌne.

⁴I lali kamaraꞌ tiꞌo uwaꞌ: potutua dupaꞌ to rowali ka bulawa, hei uwaꞌ woꞌo haꞌanu petiꞌ to nikokeneꞌi Petiꞌ Podandi, to nilopihi hante bulawa, moromiꞌ i howalina, moromiꞌ i lalina. I lali petiꞌ tiꞌo, uwaꞌ: roꞌonu watu to nipoꞌukiꞌi Hawaꞌ Hampuluꞌ to ka Pueꞌ Ala, uwaꞌ butoloꞌ bulawa to niꞌohii roti manna, hei uwaꞌ woꞌo laiꞌne hi Harun to modaꞌa.

⁵I womboꞌ petiꞌ tiꞌo, uwaꞌ roꞌonu lente Kerubi. Kepaꞌra teꞌonaꞌ i womboꞌ potutuꞌina petiꞌ, tandaꞌ komanobaꞌna Pueꞌ Ala uwaꞌ itoꞌo. Potutuꞌina tiꞌo nikokeneꞌi Potutuꞌi Petiꞌ peꞌampuni dosa. Angkana lekiꞌ-lekiꞌna tiꞌo hamboaꞌmo hampakaꞌ topololita ba toparesaꞌ moromiꞌ iseꞌe.

⁶Hatoꞌomo konipatimomone Bambaruꞌ penombaha hampiha. Ando-ando tadulako-tadulako mpenomba mekahi pe kamaraꞌ to i hinaro mampopatengkaꞌ jamara.

⁷Angkana to wadi mekahi pe kamaraꞌ to i lali mpololeke, bateꞌnalu Tadulako Mpenomba Ngkodeꞌ. Hampihalu i lali hantoꞌa io mekahi, hei hangangaa mangkomi raꞌa pinatuwuꞌ to nopopenomba pe Pueꞌ Ala, howonina dosana hadoduona hante dosara toaꞌ to woriꞌ to hawaꞌi rotungkai.

⁸Nokomi koꞌuwaꞌna atura to hatoꞌo, Inoha' Mangkolehi mampokonontokiki komakuraꞌna atura tiꞌo, alaꞌ ane uwaꞌ tene Kamaraꞌ to i hinaro, lala mekahi pe Kamaraꞌ to Meliu Komanobaꞌne handoaꞌi tene teweaꞌ.

⁹Lekiꞌ-lekiꞌna tiꞌo mewali pandiri' pe ingkiꞌ to tuwuꞌ hinewowoꞌena. Palaihana: lekiꞌ-lekiꞌna popenomba hante pinatuwuꞌ to topewei mewali popenomba pe Pueꞌ Ala, hawaꞌi wadi mampomangkolehi lalinta.

¹⁰Atura-atura to hohai tiꞌo, iomo i adaꞌ pangka hante paꞌinu, hante adaꞌ pewaheꞌ; lekiꞌ-lekiꞌna tiꞌo hawaꞌi mampomangkolehi lalinta, ropopatengkaꞌlu nturusi kolentuꞌana mampekau dandi to wolaꞌ.

¹¹Hupaꞌmo Kerisitu mewali Tadulako Mpenomba Ngkodeꞌ to mangkomi kotuwuꞌ to moromiꞌ to tohua hinewowoꞌena. Io mekahi pe lali Bambaruꞌ mpenombaha i suruga to meliu komoromiꞌne hante komanobaꞌna ka Bambaruꞌ penombaha to noꞌaro toaꞌ. Palaihana, Io mekahi pe Bambaruꞌ penombaha to handoꞌio ka duniaꞌ hieꞌe.

¹²IpekahiNa tiꞌo, Io loliu nolou pe lali Kamaraꞌ to Meliu Komanobaꞌne mohinoroi Pueꞌ Ala. Raꞌa to Nokomi, handoꞌio raꞌa bekeꞌ laki ba raꞌa anaꞌ gapiꞌ, angkana raꞌaNa hadoduoNa. PekahiNa tiꞌo, hampihalu, hei hamboaꞌmo paralu Nohuliꞌ, alaꞌ nokomi raꞌaNa to Nokomi tiꞌo, Io mampohenteki ka pehuku dosanta wute nantolou-louna.

¹³Motuntuni Aturana hi Musa, ane uwaꞌhi toaꞌ to mokomaꞌ motuntuni atura agama, bekeꞌ laki ba gapiꞌ laki hangangaa nirokoꞌ, hei raꞌana nipopotampiraihi. Hatoꞌo woꞌo hambaꞌa anaꞌ gapiꞌ hangangaa nihunu wute mewali awu, hei awuna hangangaa nipopohaworikihi. Mewaliꞌ raꞌa hante awu tiꞌo wadi nipakeꞌ mampomangkolehi toaꞌ i howalinalu,

¹⁴pelumbuꞌna tene raꞌana Kerisitu! Io mampewei wotaNa hadoduoNa pe Pueꞌ Ala moliu Inohaꞌ Mangkolehi to tuwuꞌ wute nantolou-louna, hingkeꞌna mewali popenomba to hawaꞌi uwaꞌ komakuraꞌNa. RaꞌaNa tiꞌo mampomangkolehiki ka walianta to mangkomiki pe komahia, hingkeꞌna popuhiꞌ huliꞌ lalinte horiana wadiki menomba pe Pueꞌ Ala to tuwuꞌ.

¹⁵Kerisitu mahi mohompoꞌ toaꞌ ka pehuku dosa to rowali tempona dandi to uluꞌ-uluꞌna nipakeꞌ tene. Nokomi popenombaNa to hawaꞌi uwaꞌ komakuraꞌNa tiꞌo, Kerisitu mampelumbui dandi to wolaꞌ to mampohaꞌanu toaꞌ hante Pueꞌ Ala. Tiꞌo Nowali hingkeꞌna lekiꞌ-lekiꞌna toaꞌ to noꞌuwiꞌ Pueꞌ Ala hingkiꞌ pahua pebarakati, to hawaꞌi mokoꞌukoa hintotoꞌ hante hapo to nodandikihi Pueꞌ Ala. Pebarakati tiꞌo hibali manaꞌta.

¹⁶Alaꞌ ane uwaꞌ suraꞌ peꞌowili, hangangaa uwaꞌ to mosobiꞌi komahina toaꞌ to meꞌowili tiꞌo,

¹⁷alaꞌ ane handoaꞌi tene mahi, suraꞌ peꞌowili tiꞌo hawaꞌi tene wadi nipakeꞌ.

¹⁸Hatoꞌo woꞌo podandi to uluꞌ-uluꞌna hawaꞌi wadi nipakeꞌ ane handoaꞌi uwaꞌ raꞌa.

¹⁹Waheꞌe lalane: koꞌukona hi Musa mampowute pe lekiꞌ-lekiꞌna toSaraeli hawaꞌ-hawaꞌ to uwaꞌ i lali Aturana Pueꞌ Ala, noroamo raꞌa anaꞌ gapiꞌ hante raꞌa bekeꞌ laki katoꞌo nokalo hante uwai. Uko tiꞌo, noroamo woꞌo daꞌane hisop to rohiluꞌ hante wilolu gimba to momeaꞌ, nilomiꞌ i lali raꞌa, horiana nopetampiraki i Suraꞌ Aturana Pueꞌ Ala hante pe toaꞌ to woriꞌ.

²⁰Kolentuꞌana hi Musa motampira, notiꞌi waheꞌe: “Hieꞌemo raꞌa to mampokononto dandina Pueꞌ Ala pe ingkei, hei hangangaa ipetuntuikei dandi hieꞌe.”

²¹Hi Musa motampirai woꞌo Bambaruꞌ penombaha hante lekiꞌ-lekiꞌna luma to nipakeꞌ menomba pe Pueꞌ Ala.

²²Kotuꞌuana, motuntuni Aturana hi Musa, langkaꞌ-langkaꞌna hangangaa nipomangkolehi hante raꞌa. Ane hawaꞌi uwaꞌ raꞌa ka to nirokoꞌ, dosa hawaꞌi hingkiꞌ teꞌampuni.

²³Ane Bambaruꞌ penombaha to i duniaꞌ hieꞌe hante luma to uwaꞌ i lalina, lekiꞌ-lekiꞌna tiꞌo nipohibali hante hapo to uwaꞌ i suruga, iomo horiana hangangaa nipomangkolehi hante raꞌa pinatuwuꞌ to ropopenomba pe Pueꞌ Ala. Angkana ane tambi penombaha to i suruga, hangangaa uwaꞌ popenomba to meliu tene komoromiꞌne.

²⁴Alaꞌ tambi penombaha to nopekahii Kerisitu, handoꞌio bambaruꞌ mangkolehi to rowali toaꞌ to nipohibobalilu hante to i suruga. Ukonawae, tambi penombaha ba to nopekahii Kerisitu iomo suruga. Hei hinewowoꞌena, Io mampelumbuiki i hinarona Pueꞌ Ala.

²⁵Ane Tadulako Mpenomba Ngkodeꞌ agama Yahudi, toaꞌ-toꞌana io mekahi pe lali Kamaraꞌ to Meliu Komanobaꞌne mangkomi raꞌa pinatuwuꞌ. Angkana Kerisitu hawaꞌi mohuliꞌ-huliꞌ mampewei wotaNa pe Pueꞌ Ala.

²⁶Alaꞌ ane Io hibali Tadulako Mpenomba Ngkodeꞌ i duniaꞌ, mepongka ka pewalina duniaꞌ, keworiꞌ mpiha hangangaa morii komaporiꞌ wute mahi. Angkana i tempo hinewowoꞌena, hampihalu Io hupaꞌ hingkeꞌna mopahi dosa moliu pampeweiNa wotaNa hingkeꞌna nirokoꞌI.

²⁷Pueꞌ Ala mampokonontomo, toaꞌ hangangaa mahi hampihalu, hei uko tiꞌo hingkiꞌ nibutusi waliare.

²⁸Hatoꞌo woꞌo Kerisitu, hampihalu mampewei wotaNa mewali popenomba pe Pueꞌ Ala hingkeꞌna malentu dosana toaꞌ. Hei hampiha tempo, Io hingkiꞌ mahuliꞌ humei i korompihana pe duniaꞌ hieꞌe. Tempo tiꞌo, Io hamboaꞌmo hingkiꞌ malentu dosanta, angkana Io hingkiꞌ mangkomi kosalamaꞌa i toaꞌ to mampekau kohupaꞌaNa.