Read Rampi Yakobus 1 Bible Online

Yakobus 1 - Rampi bible

Yakobus 1

¹Suraꞌ hieꞌe kupokatu pe toSarani i imbo-imbolu. Tabea kupowute pe ingkei ka aku, hi Yakobus, hawiꞌna Pueꞌ Ala hei hawiꞌna Pueꞌ Yesu Kerisitu. Suraꞌ hieꞌe kupokatukikei toSaraeli to hampulu' meroroboꞌ to hiburereꞌ i humanele duniaꞌ.

²Halali-halali! Kehapokei norumpa molangkaꞌ-langkaꞌ komaporiꞌ, inioꞌ topomateweꞌi, aginareꞌi topotanaꞌ.

³Alaꞌ tobahaꞌ, ane mepoꞌohiki mpuꞌu pe Pueꞌ Ala, i lali komaporiꞌ hapolu hingkiꞌ tobiaꞌ.

⁴Hei hangangaa tobiaꞌ wute i koꞌukoana, hingkeꞌna pedeꞌ maroho pepoꞌohinte hei hawaꞌi uwaꞌ komasalaꞌante ba komakuraꞌta.

⁵Ane uwaꞌ tene to handoaꞌi nokobuhaꞌi pekiri agina noperapiꞌ pe Pueꞌ Ala, bateꞌna hingkiꞌ Nopaꞌanikikei. Alaꞌ Pueꞌ Ala hawaꞌi luleꞌ mampaꞌanikei hapo to iperapiꞌkei, angkana Nopaꞌaniki ka kopopuhiꞌ laliNa.

⁶Angkana ane merapiꞌki pe Pueꞌ Ala, hangangaa topoꞌohiki mpololeke, inioꞌ mororangko lalinte. Alaꞌ hihimo to mororangko lalina, wadi nipandiriꞌ hibali balumba tahiꞌ to noparowohi nolou humei.

⁷Alaꞌ toaꞌ to hatoꞌo, morodaꞌa tene lalire, hawaꞌi tinto kotuwuꞌre. Iomo hinaꞌ hawaꞌhi wadi mohinaru ba hapolu ka Pueꞌ Ala.

⁹ToSarani to merima-rima hangangaa motanaꞌhi, ane nopoꞌiwomboꞌhi Pueꞌ Ala.

¹⁰Hatoꞌo woꞌo toSarani tosugiꞌ hangangaa motanaꞌ, alaꞌ Pueꞌ Ala mampoꞌiwowoiꞌ tuwuꞌra. Toaꞌ tosugiꞌ nipandiriꞌ hibali bunga: hampihalaolu kotuwuꞌre.

¹¹Alaꞌ ane bunga tiꞌo nokohunei, bateꞌna hingkiꞌ molau wute meronaꞌ bungane, hei komarangana moholi. Hatoꞌo woꞌo toaꞌ tosugiꞌ, hingkiꞌ mahihi kolentuꞌara morewahi kosugiꞌara.

¹²Motanaꞌ toaꞌ to mantaha i lali komaporiꞌ mohinoroi topekelo, alaꞌ ane mantahahi, hingkiꞌ pahuahi kotuwuꞌ to wolaꞌ to hawaꞌi mokoꞌukoa,[1] to nodandi Pueꞌ Ala pe toaꞌ to mampokarimaꞌI.

¹³Ane uwaꞌ topekelo hingkeꞌna mowaliki dake, anioꞌ topekiriꞌi, “Pehohongkeꞌ hieꞌe ka Pueꞌ Ala.” Alaꞌ Pueꞌ Ala hawaꞌi wadi nikeloi hingkeꞌna mowaliꞌi dake, hante hawaꞌi woꞌo hingkiꞌ mokeloi toaꞌ hingkeꞌna mowalihi dake.

¹⁴Angkana lekiꞌ-lekiꞌna toaꞌ tekeloi i tempora noruiꞌ peleihana lalire to kodake.

¹⁵Ane mampetuntuiki peleihana lalinta, bateꞌna mowaliki dosa. Hei ane tiꞌo to towali nturusi, hingkiꞌ nokomiki pe komahia.

¹⁶Halalingku to kupokarima! Inioꞌkei nopokonawuꞌ!

¹⁷Lekiꞌ-lekiꞌna to moromiꞌ hei to hawaꞌi uwaꞌ komakuraꞌna tohua ka Pueꞌ Ala. Iomo to mowali lekiꞌ-lekiꞌna to mewanta i laniꞌ. Lekiꞌ-lekiꞌna to mewanta tiꞌo, uwaꞌ kotewolihiane. Angkana Pueꞌ Ala, hawaꞌi uwaꞌ kotewolihiane, hei hawaꞌi uwaꞌ komokorindiane.

¹⁸Nopopewaliki anaꞌNa alaꞌ peleihaNa hadoduona moliu i hawaꞌNa to tuꞌu, hingkeꞌna ingkiꞌ Nopokodeꞌki mpololeke ka lekiꞌ-lekiꞌna hapo to Nowali.

¹⁹Halalingku to kupokarima! Moromiꞌ ane ipoꞌilalikei lolita hieꞌe: ingkiꞌ lekiꞌ-lekiꞌna hangangaa hohiꞌki mampehoromua lolitara toaꞌ ntaniꞌna, angkana inioꞌki hohiꞌ mololita hei inioꞌki hohiꞌ bukota,

²⁰alaꞌ toaꞌ to bukota, hawaꞌhi mowali hapo to moromiꞌ hante to hintotoꞌ i hinarona Pueꞌ Ala.

²¹Iomo hinaꞌ hangangaa ipohentekei lekiꞌ-lekiꞌne walia to kodake hibali to ropobiasa toaꞌ i duniaꞌ hieꞌe. Hangangaa mengkoruꞌkei mantorimo Hawaꞌ to nopowute Pueꞌ Ala i lalimi, alaꞌ Hawaꞌ tiꞌo makuasaꞌ mohompoꞌkei ka pehuku dosami.

²²Mewaliꞌ, hawaꞌna Pueꞌ hangangaa ipetuntuikei. Inioꞌ podo nipehoromualu. Alaꞌ ane watoꞌoꞌi, mampokonawuꞌlukei wotami hadoduomi.

²³Toaꞌ to mampehoromua hawaꞌna Pueꞌ hei hawaꞌi ropetuntui, nipandiriꞌ hibali haduo toaꞌ to mampeꞌele liona hadoduona i pemororoa.

²⁴Koꞌukonalu mampeꞌele lentena hamboaꞌi nobahaꞌ hohumbo lentene liona.

²⁵Iomo hinaꞌ hangangaa ipoꞌilalikei moromiꞌ hawaꞌne Pueꞌ Ala hei ipetuntuikei nturusi. Alaꞌ hawaꞌna Pueꞌ maganaꞌ-ganaꞌ, hei uwaꞌ kuasaꞌNe mampohinteki ka dosanta. Mewaliꞌ, anioꞌ nipehoromualu hawaꞌne honiꞌi ikolombulihakikei. Hangangaa ipetuntuikei hawaꞌne, alaꞌ lekiꞌ-lekiꞌna toaꞌ to mowali hatoꞌo, bateꞌna nobarakatihi Pueꞌ Ala i hapolu to rowali.

²⁶Ane uwaꞌi haduo toaꞌ to mantiꞌi io to moꞌagama mpololeke, angkana hawaꞌi nobahaꞌ mojagai poꞌomeꞌne hingkeꞌna moromiꞌ pololitane, io mampomonawuꞌ wotana hadoduona. Poꞌagamana tiꞌo hawaꞌi uwaꞌ dumbuꞌne.

²⁷Ane mewaliki toaꞌ to moꞌagama mpololeke hei hawaꞌi uwaꞌ komasalaꞌante i pampeꞌelena Pueꞌ Ala Umoꞌta, hieꞌemo to hangangaa towali: mosulungiki oꞌanaꞌ to oꞌilu hante tobembaꞌ to merima-rima tuwuꞌra, hei inioꞌki mampetuntui waliara toaꞌ to hawaꞌi pobahaꞌ Pueꞌ Ala.