Read Rampi Yakobus 2 Bible Online

Yakobus 2 - Rampi bible

Yakobus 2

¹Halali-halali! Pueꞌta Yesu Kerisitu, manobaꞌ mpuꞌu tuwuꞌNe. Mewaliꞌ, ane mepoꞌohikei mpuꞌu pe Pueꞌ Yesu, inioꞌkei mampopoꞌoriꞌori toaꞌ.

²Rapaꞌna, uwaꞌ roduo toaꞌ to mehupaꞌ pe porampu-rampuanta, haduo to mehangkokoliꞌ bulawa hei mebaduꞌ to maranga, honiꞌi haduo to merima-rima tuwuꞌna hei mebaduꞌ to merantaꞌ.

³Ane peꞌadaꞌimi pe toaꞌ to maranga baduꞌna, itiꞌikikei: “Humeiki mahura i pahuraha to moromiꞌ hieꞌe,” angkana pe toaꞌ to merima-rima tuwuꞌna itiꞌikikei: “Metotiꞌimoko itoꞌo,” ba itiꞌikikei: “Mahuramoko i lobo,”

⁴mopalaiha, mampopoꞌoriꞌorikei hangko awami hei mampeloliolukei motuntuni pekirimi to kodake.

⁵Halalingku to kupokarima! Ipehoromuakei moromiꞌ: toaꞌ to merima-rima tuwuꞌra i duniaꞌ hieꞌe noꞌuwiꞌ Pueꞌ Ala hingkeꞌna mewalihi sugiꞌ i pepoꞌohira. Iohi pahua pebarakati i lali poparentana Pueꞌ Ala motuntuni dandiNa pe toaꞌ to Nopokarima.

⁶Angkana ingkei wuliha mampariwoiꞌkei toaꞌ to towuꞌra merima-rima! Kotuꞌuana, toaꞌ tosugiꞌ, tiꞌo to modihaꞌ-dihaꞌkei hei mangkomikei pe hinarona topobutusi.

⁷Iomohi to motaloleuꞌ konaꞌna Pueꞌ Yesu to teꞌadaꞌi hei to mewali Pueꞌta.

⁸Angkana ane ipetuntuikei hawaꞌne Datunta to tobasa i lali Suraꞌ Mangkolehi to mantiꞌi, “Ipokarimakei awami hibalikei mampokarima wotami hadoduomi” Ane hatoꞌoꞌi mowalikei to mononto.

⁹Angkana ane mampopoꞌoriꞌorikei toaꞌ motuntuni tuwuꞌra ba lentera, tiꞌo niposalaꞌ. Tongawamo komadosami, alaꞌ molungkaꞌimokei Aturana Pueꞌ Ala.

¹⁰Ane uwaꞌ haduo to hawaꞌi motuntuni lekiꞌ-lekiꞌna hawaꞌ to teuꞌkiꞌ i lali hawaꞌna Pueꞌ Ala, kehapoꞌi halangkaꞌlu to nolungkaꞌi, hibali hante molungkaꞌimo lekiꞌ-lekiꞌna hawaꞌ.

¹¹Alaꞌ notiꞌi Pueꞌ Ala: “Inioꞌ mebualosi,” hei Notiꞌi woꞌo: “Inioꞌ merorokoꞌ.” Mewaliꞌ, kehapokei hawaꞌi mebualosi, angkana ane merorokoꞌkei, bateꞌna molungkaꞌimokei Aturana Pueꞌ Ala.

¹²Hinamo ikororomiꞌikei mowiharo hei mowalia hibali haduo toaꞌ to nikomi ako nihuroni motuntuni Aturana Pueꞌ Ala to mangkomiki pe kohimpolohoꞌa pehuku dosanta.

¹³Pueꞌ Ala hawaꞌi hingkiꞌ mampetidoꞌki komarimaNa pe toaꞌ to hawaꞌi nobahaꞌ marima. Angkana toaꞌ to mampokarima awana hampoliꞌmo motehuꞌ i ando pebutusiana Pueꞌ Ala, alaꞌ Pueꞌ Ala mampokarimahi.

¹⁴Halali-halali! Hapomo dumbuꞌne ane totiꞌi mepoꞌohiki pe Pueꞌ, angkana walianta hawaꞌi motuntuni peleihaNa? Ane hatoꞌoꞌi pepoꞌohinte, hawaꞌki hingkiꞌ tepohente ka pehuku dosa.

¹⁵Ane uwaꞌ haduo halalinta to mamparaluꞌi parewa, hei hawaꞌi woꞌo ganaꞌ kopongkonane ando-andona.

¹⁶Angkana itiꞌilukikei waheꞌe: “Moromiꞌ-romiꞌko i lala! Woi-woina pahuako baduꞌ to moromiꞌ hei mangkako wute wohu!” Mewaliꞌ, ane hawaꞌkei ipaꞌani hapo to noparaluꞌi, hapomo dumbuꞌne?

¹⁷Hatoꞌo woꞌo hante pepoꞌohinta. Ane totiꞌi mepoꞌohiki pe Pueꞌ, angkana waliante hawaꞌi motuntuni peleihaNa, palaihana hawaꞌi modumbuꞌ pepoꞌohinte. Wadi woꞌo nitiꞌi mahi pepoꞌohinte.

¹⁸Angkana uwaꞌ to hingkiꞌ mantiꞌi waheꞌe: “Uwaꞌ haduo toaꞌ to mamperohoꞌ i pepoꞌohina, hei haduo maperohoꞌ i waliana.” Io hingkiꞌ kuhoniꞌ, “Itidoꞌkiꞌa hohumbo pepoꞌohima, ane hawaꞌi uwaꞌ waliama. Hei hingkiꞌ kutidoꞌkiko pepoꞌohingka ka waliangku.”

¹⁹Ba ipoꞌohikei kohadoduonalu Pueꞌ Ala? Moromiꞌ ane hatoꞌoꞌi. Ngkohoweꞌhi lomoa ropoꞌohi woꞌo kohadoduonelu Pueꞌ Ala. Iomo hinaꞌ mororidiꞌhi nokomi komorokaꞌra.

²⁰Bebekei! Pantiꞌimi ganaꞌmo pepoꞌohimi pe Pueꞌ Ala, kehapoꞌi hawaꞌi uwaꞌ waliami to moromiꞌ? Ane hatoꞌo pepoꞌohimi, hawaꞌi uwaꞌ dumbuꞌna!

²¹Hangangaa ikolowoikei lolitonane hi Burahima, io tepekahi toaꞌ to mononto alaꞌ komoromiꞌna waliana, i tempona io mampopenomba anaꞌna hi Isaki, pe Pueꞌ Ala i womboꞌ potutua popenomba.

²²I lolitonana tiꞌo, tongawamo pepoꞌohine hi Burahima i waliana. Mewaliꞌ, alaꞌ waliana to moromiꞌ, tepobuhoꞌimo pepoꞌohine.

²³Iomo hinaꞌ tebuhoꞌi hapo to teuꞌkiꞌ i lali Suraꞌ Mangkolehi to mantiꞌi waheꞌe: “Hi Burahima mepoꞌohi pe Pueꞌ Ala, iomo hinaꞌ tepekahi toaꞌ to mononto lalina i hinarona Pueꞌ Ala.” [2] Mewaliꞌ, hi Burahima nitiꞌi awana Pueꞌ Ala.

²⁴Toꞌokiꞌmo toaꞌ to moromiꞌ waliare, norekeꞌ Pueꞌ Ala mononto i pampeꞌeleNa, angkana toaꞌ to mepoꞌohilu {hei waliara hawaꞌi hintotoꞌ hante i pepoꞌohira,} hawaꞌi Norekeꞌ Pueꞌ Ala to mononto i pampeꞌeleNa.

²⁵Hatoꞌo woꞌo lolitonana hi Raha hampiha, haduo towoweꞌe to bantomaꞌania. Bahaꞌumbohi toSaraeli rorumbaꞌ nolou mongongawu bolaꞌna poniꞌra. Hi Raha tiꞌo to mowunihi i tambina hei mosulungihi ikopolaira motuntuni lala to ntaniꞌna. Nokomi waliana to moromiꞌ tiꞌo, iomo hinaꞌ norekeꞌ Pueꞌ Ala toaꞌ to mononto.

²⁶Winoro toaꞌ to mahi, wotalokaꞌna uwaꞌ angkana tanuanaꞌna hawaꞌi uwaꞌ. Hatoꞌo woꞌo, ane pepoꞌohinta pe Pueꞌ Ala hawaꞌi tongawa i walianta, palaihana mahi pepoꞌohinte, hawaꞌi uwaꞌ dumbuꞌna.