Read Rampi Yakobus 5 Bible Online

Yakobus 5 - Rampi bible

Yakobus 5

¹Hieꞌemo poturuꞌka i toaꞌ tosugiꞌ. Aginamo meꞌolakei, alaꞌ hingkiꞌ norumpakei komaporiꞌ.

²Moholimo kosugiꞌami. Baduꞌmi noꞌokamo bubuꞌ.

³Bulawa hante peraꞌmi totohiꞌamo. Totohiꞌa tiꞌo mampokononto komasalaꞌmi alaꞌ mampokodeꞌlukei kosugiꞌmi. Iomo hinaꞌ hingkiꞌ nihukukei mpuꞌu. Ingkei hingkiꞌ mewali hibali toaꞌ to noꞌoka api. Morampulukei luma i duniaꞌ hieꞌe, angkana hamboaꞌmo morue hingkiꞌ mehupaꞌ kotutuane duniaꞌ!

⁴Topajama i kineteꞌmi, hawaꞌi nibaiari harore. Hinewowoꞌena nipehoromua peroraire! Topajamahi i kineteꞌmi, mekokaehi merapiꞌ sulungi, hei pekokaera Nohorimo Pueꞌ Ala to Makuasaꞌ.

⁵I duniaꞌ hieꞌe, tuwuꞌkei hibali tokeiꞌ. Mampaliꞌlukei komotanaꞌmi. Hibalikei pinatuwuꞌ to mampomolompoꞌ wotara hadoduora wute hupaꞌ tempore nirereꞌ!

⁶Mohukukei toaꞌ to moromiꞌ waliara i pampeꞌelena Pueꞌ Ala, angkana iohi hawaꞌhi meꞌewa. Kehapoꞌi hatoꞌo, irokoꞌkei.

⁷Halali-halali! Alaꞌ nobahaꞌluꞌi Pueꞌ komaporiꞌmi, hangangaa sabaraꞌkei wute i pehupaꞌNa huliꞌ Pueꞌ Yesu. Iꞌelekei hohumbo kosabaraꞌre topokineteꞌ mampekau powuaꞌna huꞌa-huꞌara to moromiꞌ mpololeke. Sabaraꞌhi mampekau ura i tempora mantudaꞌ wute i powuaꞌna.

⁸Hatoꞌo woꞌo ingkei. Hangangaa sabaraꞌkei. Hangangaa ipotintokei lalimi, alaꞌ hamboaꞌmo morue hingkiꞌ mehupaꞌmo mpuꞌu Pueꞌ Ala.

⁹Halali-halali! Inioꞌkei mangkonunuꞌ hei momesalaꞌ-salaꞌi, hingkeꞌna hawaꞌkei nihuku. Alaꞌ Topobutusi metotiꞌimo i hinaro wambaꞌ; hamboaꞌmo morue hingkiꞌ mehupaꞌ!

¹⁰Halali-halali! Iponindimokei nabi-nabi to hampiha to mangkomi hawaꞌna Pueꞌ Ala. Sabaraꞌhi hei tinto morii komaporiꞌ. Aginamo topetuntui kosabaraꞌre.

¹¹Alaꞌ hihimoreꞌi to totiꞌi morasiꞌ? To motanaꞌ iomo toaꞌ to morii komaporiꞌ. Ibahaꞌkei mpololeke lolitonane hi Ayub to moriimo komaporiꞌ. Hei ibahaꞌlukei hapo to mewali i koukoana, io nobarakati Pueꞌ Ala, ka popuhiꞌ laliNa, hei io nopokarima mpololeke Pueꞌ Ala.

¹²Halali-halali! Ka lekiꞌ-lekiꞌna poturuꞌku, hieꞌemo to paralu mpololeke: inioꞌkei mosumpa mantiꞌi laniꞌ ba duniaꞌ ba hapolu to ntaniꞌna. Ane tungkaihami mantiꞌi ioꞌ, hangangaa itiꞌikei “Ioꞌ.” Ane tungkaihami mantiꞌi hawaꞌi, hangangaa itiꞌikei “Hawaꞌi,” Hingkeꞌ hawaꞌkei pahua pehuku.

¹³Ane uwaꞌ i lumbumi to pahua komaporiꞌ, agina mekokae. Ane uwaꞌ to motanaꞌ, agina molinga mampokodeꞌ Pueꞌ Ala.

¹⁴Ane uwaꞌ to mohakiꞌ, agina nipowowoiki hawiꞌ-hawiꞌna Pueꞌ i jumaꞌa, hingkeꞌna hawiꞌ-hawiꞌna Pueꞌ tiꞌo wadi mampekokaeki to mohakiꞌ tiꞌo hei mowau bokaꞌ i lali konaꞌna Pueꞌ Ala.

¹⁵Ane mekokaehi ka pepoꞌohi mpololeke, hangangaa moꞌoriꞌ to mohakiꞌ tiꞌo. Pueꞌ Ala hingkiꞌ mampokoꞌoriꞌ wotana to mohakiꞌ tiꞌo, hei ane uwaꞌ dosane, hangangaa hingkiꞌ Noꞌampuni woꞌo.

¹⁶Iomo hinaꞌ hangangaa ipangakuꞌkei salaꞌmi pe hangko awami, hei momepekokaekikei hingkeꞌna moꞌoriꞌkei. Makuasaꞌ mpololeke pekokaene toaꞌ to mononto waliana.

¹⁷Iponindikei lolitonane nabi Elia hampiha. Nabi Elia tiꞌo, toaꞌ biasalu hibali woꞌo ingkiꞌ. Io mekokae ka lalina mpololeke hingkeꞌna hawaꞌi ura. Hawaꞌi mpuꞌu ura i lali tolu ntoꞌa oni mbula.

¹⁸Uko tiꞌo, io mekokae womo honiꞌi ura, hante woiꞌ mampopowuaꞌ huliꞌ lekiꞌ-lekiꞌna huꞌa-huꞌa.

¹⁹Halali-halali! Ane uwaꞌ i lumbumi haduo to mengkoꞌela ka poturuꞌ to tuꞌu to ka Pueꞌ Ala, hei uwaꞌ woꞌo haduo to morandaꞌi mahuliꞌ pe Pueꞌ Ala,

²⁰ikolowoikei lolitangka hieꞌe: hihimo to mangkomi huliꞌ haduo toaꞌ to madosa ka waliana to masalaꞌ pe to moromiꞌ, iomo to mosulungi awana ka komahia tota uwaꞌ koꞌukoana, horiana dosana awana to woriꞌ teꞌampunimo.