Read Rampi 1 Peturuꞌ 1 Bible Online

1 Peturuꞌ 1 - Rampi bible

1 Peturuꞌ 1

¹Halali-halali, suraꞌ hieꞌe ka aku hi Peturuꞌ, surona hi Yesu Kerisitu. Kupokatu suraꞌ hieꞌe pe ingkei halalingku to noꞌuwiꞌmokei Pueꞌ Ala, to tehaworimokei hei meꞌohaꞌkei hibali to mehupaꞌ i poropensi Pontu, Galatia, Kapadokia, Asia hei Bitinia.

²Mepongka ka uluꞌ-uluꞌna Pueꞌ Ala Umoꞌta moꞌuwiꞌmokei mewali toaꞌNa hintotoꞌ hante to Nopokonontomo umbiꞌ. Hingkeꞌna mewalikei toaꞌNa Pueꞌ Ala to mangkolehi moliu i pajamana Inohaꞌ Mangkolehi. Iomo horiana mengkoruꞌkei pe Yesu Kerisitu hei nopomangkolehikei hante raꞌaNa. Tabea! Kuperapiꞌ hingkeꞌna Pueꞌ Ala mobarakatikei hei mampaꞌanikei romiꞌ ngkotuwuꞌ.

³ Topokodeꞌmo Pueꞌ Ala, Umoꞌna hi Yesu Kerisitu, Pueꞌta! Nokomi komarimaNa Pueꞌ Ala pe ingkiꞌ, Nopaꞌanimoki kotuwuꞌ to wolaꞌ, hei kotuwuꞌ to wolaꞌ tiꞌo tohua ka kotuwuꞌna huliꞌ hi Yesu Kerisitu. Iomo to mampomaroho pepohinaruante,

⁴hei tobahaꞌ hingkiꞌ pahuaki manaꞌ to nopatimomokimoki Pueꞌ Ala,[1] hei manaꞌ tiꞌo hawaꞌi hohumbo marugi ba mewali kodake ba mabaliꞌ, to Nopatimomokimoki i suruga.

⁵Lekiꞌna tiꞌo nopepaꞌanikimo Pueꞌ Ala alaꞌ pepoꞌohimi. Pueꞌ Ala mampoꞌodaꞌkei hante kuasaꞌNa ka lekiꞌ-lekiꞌna to kodake, wute hupaꞌ tempone hingkiꞌ ihuakei kosalamaꞌa ka Pueꞌ Ala, to timomomo nipomombaha i tempo koꞌukoana duniaꞌ.

⁶Iomo horiana hangangaa motanaꞌkei nturusi. Hinewowoꞌena masusa tene lalimi alaꞌ uwaꞌ woriꞌ langkaꞌ komaporiꞌ to morumpakei. Angkana komaporiꞌ tiꞌo hampaiꞌlu.

⁷Norumpakei komaporiꞌ hingkeꞌna mombaha komarohone pepoꞌohimi. Pepoꞌohimi tiꞌo wadi nipandiriꞌ hibali bulawa to niparesaꞌ hei nitunu hante api. Angkana masuliꞌ tene pepoꞌohimi hintina bulawa, alaꞌ bulawa hawaꞌi hingkiꞌ uwaꞌ wute nantolou-louna. Hatoꞌo woꞌo pepoꞌohimi hangangaa niparesaꞌ moliu komaporiꞌ. Mewaliꞌ ane mantahakei i lali komaporiꞌ, palaihana maroho mpololeke pepoꞌohimi, hei ingkei hingkiꞌ niꞌadaꞌi hei nipokodeꞌ ikohupaꞌana huliꞌ hi Yesu Kerisitu i duniaꞌ.

⁸Kehapoꞌi handoaꞌi kahampiha iꞌokiꞌkei hi Yesu Kerisitu, angkana ipokarimakei. Hatoꞌo woꞌo, kehapoꞌi hinewowoꞌena hawaꞌkei iꞌokiꞌ hi Yesu, bateꞌna ipoꞌohikei. Iomo horiana masana mpololeke lalimi, hei komasanami tiꞌo hawaꞌi mokotiꞌia.

⁹Motanaꞌkei, alaꞌ ihuamokei hapo to ipoꞌohimokei, iomo kosalamaꞌ to ka Pueꞌ Ala.

¹⁰Kosalamaꞌ to ihuakei, tiꞌomo to ropekokiri nabi-nabi hampiha hei ropaliꞌ palaihane. Ropowute hohumbo Pueꞌ Ala hingkiꞌ mampotongawa komarimaNa pe ingkei.

¹¹Iomo horiana roparesaꞌ mpololeke hapo to teꞌukiꞌ, alaꞌ rokodokoꞌi robahaꞌ himo to rotungkai hei hiwaꞌimbo kohingkiꞌ pewaline. Nokomi perandana Inohaꞌna Kerisitu to uwaꞌ i lalira, Noponobahaꞌihi hohumbo komakajane komaporiꞌ to hangangaa morumpa wotana Kerisitu, hei Nopowutekihi woꞌo hohumbo komanobaꞌNe ane tutumoꞌi komaporiꞌ tiꞌo.

¹²Hei Pueꞌ Ala mamponobahaꞌihi nabi-nabi hampiha, kareba to ropowute tiꞌo hawaꞌi mewali dolaꞌra. Angkana kareba tiꞌo mewali dolaꞌta. Hei hinewowoꞌena uwaꞌmohi toaꞌ to mampowutekikei Kareba Moromiꞌ, hei hapo to ropowute tiꞌo, moliu kuasaꞌna Inohaꞌ Mangkolehi to ka Pueꞌ Ala. Alaꞌ nokomi komakajana Kareba Moromiꞌ tiꞌo malaꞌeka dokoꞌhi woꞌo pobahaꞌ noniuꞌ Kareba tiꞌo.

¹³Halali-halali, nokomi lekiꞌ-lekiꞌna to nowalimo Pueꞌ Ala tiꞌo, iomo horiana kutiꞌikikei: ipatimomokei pekirimi, iriikei peleihane lalimi hadoduomi, hei ipokarohokei pepohinarumi i pebarakati to hingkiꞌ nipaꞌanikikei ikohupaꞌana huliꞌ hi Yesu Kerisitu.

¹⁴Ipetuntuikei peleihane Pueꞌ Ala. Inioꞌmokei mampetuntui peleihana lalimi hadoduomi hibali hampiha i tempomi handoaꞌi tene pobahaꞌ Pueꞌ Ala.

¹⁵Angkana wae, hangangaa mangkolehikei i lalimi hei i lekiꞌ-lekiꞌna waliami ando-andona, alaꞌ Pueꞌ Ala to mangkolehi tuwuꞌNa to moꞌuwiꞌmokei hingkeꞌna ipetuntuikei waliaNe,

¹⁶alaꞌ uwaꞌ teꞌukiꞌ i lali Suraꞌ Mangkolehi to mantiꞌi: “Hangangaa mangkolehi tuwuꞌmi, alaꞌ Aku hieꞌe mangkolehiꞌA.”

¹⁷Halali-halali, Pueꞌ Ala to iwowoikei Umoꞌ, Iomo to mobutusi kara-karare lekiꞌ-lekiꞌna toaꞌ motuntuni waliara, hei Io hawaꞌi mampopoꞌoriꞌori toaꞌ. Nokomi koꞌIona Umoꞌmi hante Topobutusi, iomo horiana hangangaa iꞌadaꞌikei hei mengkoruꞌkei pe Io kolentuꞌami tene meꞌohaꞌ hibali topolilo i duniaꞌ hieꞌe.

¹⁸Hangangaa mengkoruꞌkei pe Pueꞌ Ala, alaꞌ ibahaꞌkei hohumbo pehompoꞌne Pueꞌ Ala. Io mampolohoꞌkei ka lala kotuwuꞌmi hampiha to hawaꞌi modumbuꞌ, to ihuakei ka tododulumi. Hei to nopakeꞌ Pueꞌ Ala mohompoꞌkei, handoꞌio bulawa ba peraꞌ to hingkiꞌ moholilu,

¹⁹angkana to Nopakeꞌ mohompoꞌkei meliu komasuliꞌne, iomo raꞌana Kerisitu hadoduoNa. Kerisitu mahi mewali popenomba hibali hambaꞌa gimba to hawaꞌi uwaꞌ dakena ba komakuraꞌna.

²⁰Ikohandoaꞌana tene duniaꞌ niwali, hi Yesumo to nopokononto Pueꞌ Ala hingkeꞌna mewali Topohompoꞌ. Hinewowoꞌena i tempo kotutuana, Io hupaꞌmo hingkeꞌna salamaꞌkei.

²¹Moliu hi Yesu horiana ingkei mepoꞌohikei pe Pueꞌ Ala to mampotuwuꞌ huliꞌ hi Yesu ka komahia, hei mampomanobaꞌ tuwuꞌNa, horiana mepoꞌohikei hei mepohinarukei pe Pueꞌ Ala.

²²Hinewowoꞌena, mangkolehikei alaꞌ mampetuntuikei poturuꞌ to tuꞌu, ibahaꞌmokei mampokarima halali hampepoꞌohimi ka kopopuhiꞌna lalimi. Iomo horiana momepokarimakei haduo hei haduo ka lalimi mpololeke.

²³Hangangaa tiꞌo to iwalikei, alaꞌ pahuamokei kotuwuꞌ to wolaꞌ. Hei kotuwuꞌ to wolaꞌ tiꞌo hawaꞌkei ihua ala nopoꞌanaꞌkikei manusiaꞌ to hampaiꞌlu tuwuꞌ, angkana alaꞌ kuasaꞌna Boona Pueꞌ Ala, to tuwuꞌ hei to hawaꞌi mokoꞌukoa.

²⁴Uwaꞌ teꞌukiꞌ i lali Suraꞌ Mangkolehi to mantiꞌi waheꞌe: “Kotuwuꞌna toaꞌ hibali kora, hei komarangana toaꞌ hampaiꞌlu hibali bungana kora. Kora bateꞌna molau, hei bungana hingkiꞌ meronaꞌ,

²⁵angkana pohawaꞌna Pueꞌ hingkiꞌ uwaꞌ nturusi wute nantolou-louna.” [2] Hei pohawaꞌna Pueꞌ Ala tiꞌo, iomo Kareba Moromiꞌ to nipowutemokikei.