Read Rampi 1 Peturuꞌ 4 Bible Online

1 Peturuꞌ 4 - Rampi bible

1 Peturuꞌ 4

¹Mewaliꞌ, Kerisitu pahuamo komaporiꞌ kolentuꞌaNa tene tuwuꞌ i duniaꞌ hieꞌe, iomo horiana hangangaa ipokarohokei woꞌo lalimi hingkeꞌna timomokei mantaha komaporiꞌ hibali Io, alaꞌ himo to pahua komaporiꞌ kolentuꞌana tene tuwuꞌ i duniaꞌ, io hamboaꞌmo hingkiꞌ nokuasaꞌi nturusi dosa.

²Mewaliꞌ, i tempomi tene tuwuꞌ i duniaꞌ hieꞌe, hawaꞌi hingkiꞌ ipetuntuikei peleihane lalimi hadoduomi. Hingkiꞌ ipetuntuikei peleihane Pueꞌ Ala,

³alaꞌ ganaꞌmo tempomi tuwuꞌ hibali toaꞌ to handoaꞌi pobahaꞌ Pueꞌ. I tempo tiꞌo, kotuwuꞌmi hawaꞌi moromiꞌ, alaꞌ mampetuntuilukei peleihana lalimi to kodake, maꞌinu-inukei wute malanu, mosusaꞌkei nturusi, masilakakei, hei menombakei pe lomoa to hawaꞌi masipatoꞌ nipenombai.

⁴Angkana hinewowoꞌena, hokomohi toaꞌ to ipoꞌawakei tempomi handoaꞌi tene pobahaꞌ Pueꞌ Ala, alaꞌ hamboaꞌmokei mampetuntui waliara to kodake. Iomo horiana ropampeꞌoꞌuwaꞌkikei lolita.

⁵Angkana hampiha tempo awami tiꞌo hangangaa metotiꞌihi i hinarona Pueꞌ Ala mampangakuꞌ waliara to kodake, alaꞌ Pueꞌ Ala hingkiꞌ mobutusi kara-karana lekiꞌ-lekiꞌna toaꞌ, moromiꞌ to tuwuꞌ tene, moromiꞌ to mahimo.

⁶Iomo horiana Kerisitu mampowutemo Kareba Moromiꞌ pe toaꞌ to mahimo hinewowoꞌena, mewaliꞌ, kehapoꞌi mahimohi hibali lekiꞌna toaꞌ bateꞌna hingkiꞌ pahua komahia, hinewowoꞌena tuwuꞌhi intu wute nantolou-louna motuntuni peleihana Pueꞌ Ala.

⁷Halali-halali, kotutuana duniaꞌ hieꞌe dodungkumo, hei lekiꞌ-lekiꞌna ohina hingkiꞌ moholi. Iomo horiana hangangaa lebaꞌ pekirimi hei majaga-jagakei, hingkeꞌna hohumbokei mekokae.

⁸To paralu mpololeke, hangangaa momepokarimakei haduo hei haduo ka kopopuhiꞌna lalimi, alaꞌ ane iwalikei hatoꞌo, hingkiꞌ ibiaꞌkei woꞌo moꞌampuni salaꞌne hangko awami.

⁹Hangangaa motanaꞌ lalimi ane uwaꞌi halali hampepoꞌohimi to mehupaꞌ meꞌohaꞌ i tambimi, hei inioꞌkei konunuꞌa.

¹⁰Ingkiꞌ lekiꞌ-lekiꞌta pahuamoki kopebahaꞌ to moꞌoriꞌ-ori motuntuni hapo to nopaꞌanikiki Pueꞌ Ala ka kopopuhiꞌna laliNa. Hangangaa topakeꞌ kopebahaꞌ tiꞌo hingkeꞌna mosulungiki toaꞌ ntaniꞌna, hei mampopatengkaꞌ moromiꞌ jama to nopaꞌaniki Pueꞌ Ala tiꞌo.

¹¹Hihimo to nipaꞌani kopebahaꞌ mololita, hangangaa mololita hintotoꞌ hante to notorimo ka Pueꞌ Ala. Hihimo to mosulungi toaꞌ ntaniꞌna, hangangaa mesulungi motuntuni kuasaꞌ to nohua ka Pueꞌ Ala. Hangangaa iwalikei mpuꞌu hatoꞌo, hingkeꞌna Pueꞌ Ala nipokodeꞌ moliu hi Yesu Kerisitu, alaꞌ Io to makuasaꞌ hei to masipatoꞌ nipokodeꞌ wute nantolou-louna! Amin.

¹²Halali-halali to kupokarima! Inioꞌ ipohelekei ane uwaꞌi komaporiꞌ to morumpakei, alaꞌ biasa tohua komaporiꞌ i lali kotuwuꞌta. Komaporiꞌ tiꞌo wadi nipandiriꞌ hibali api, alaꞌ nopakeꞌ Pueꞌ Ala mampehohongkeꞌ komarohona pepoꞌohimi.

¹³Angkana wae ipotanaꞌkei, alaꞌ pahuamokei dolaꞌ i komaporiꞌna Kerisitu. Iomo horiana, ane hupaꞌ tempone Kerisitu mampotongawa komanobaꞌna tuwuꞌNa i lekiꞌ-lekiꞌna toaꞌ, hingkiꞌ motanaꞌkei mpololeke.

¹⁴Halali-halali, ipotanaꞌlukei ane nipononaꞌakei nokomi petuntumi i Kerisitu, alaꞌ Inohaꞌ Mangkolehi to manobaꞌ to ka Pueꞌ Ala uwaꞌ nturusi i lalimi.

¹⁵Angkana inioꞌ noꞌuwaꞌ haduo ka lumbumi to pahua komaporiꞌ alaꞌ waliana merorokoꞌ ba manako ba mowali to kodake, ba mampekahi urusiana hangko awana.

¹⁶Mewaliꞌ ane nipoperima-rimakei nokomi kotoSaranimi, inioꞌ ipohilikei, angkana wae hangangaa itiꞌikei woriꞌ komoromiꞌne pe Pueꞌ Ala alaꞌ ingkei topetuntunakei Kerisitu.

¹⁷Hupaꞌmo tempone Pueꞌ Ala hingkiꞌ mobutusi kara-karana lekiꞌ-lekiꞌna toaꞌ, hei to hingkiꞌ Nobutusi medulu iomo kara-karanta ingkiꞌ toaꞌNa. Hingkoweꞌ ingkiꞌ to mepoꞌohi i Kareba Moromiꞌ Nobutusi, hapona tene toaꞌ to hawaꞌi mepoꞌohi i Kareba Moromiꞌ tiꞌo.

¹⁸I lali Suraꞌ Mangkolehi teꞌukiꞌ waheꞌe: “Hingkoweꞌ toaꞌ to mononto waliara, masusa kopahuare kosalamaꞌa, hapona tene toaꞌ to kodake waliara to hawaꞌi mengkoruꞌ pe Pueꞌ Ala!”

¹⁹Mewaliꞌ, ane uwaꞌ to pahua komaporiꞌ motuntuni peleihana Pueꞌ Ala, ipepolintarokikei kotuwuꞌmi i Pueꞌ Ala to mowali duniaꞌ hante lekiꞌ-lekiꞌna to uwaꞌ, alaꞌ Io tungkuꞌ hei hingkiꞌ mobuhoꞌi lekiꞌ-lekiꞌna dandiNa i ingkei, hei hangangaa iwalikei nturusi hapo to moromiꞌ.