Read Rampi 1 Peturuꞌ 5 Bible Online

1 Peturuꞌ 5 - Rampi bible

1 Peturuꞌ 5

¹Uwaꞌ woꞌo perapiꞌka pe ingkei to mewali pinatua i jumaꞌa-jumaꞌa. Kuꞌukiꞌkikei hieꞌe alaꞌ aku woꞌo haduo pinatua to motadulakoi toSarani, hei kuꞌokiꞌ mata komaporiꞌ to morumpa Kerisitu hampiha. Ane hupaꞌ Kerisitu i lali komanobaꞌNa, komanobaꞌNa tiꞌo hingkiꞌ nipomombaha i lekiꞌ-lekiꞌna toaꞌ, hei hingkiꞌ pahuaꞌa woꞌo dolaꞌku i lali komanobaꞌNa tiꞌo.

²Kuperapiꞌ hingkeꞌna nirewahihi moromiꞌ toaꞌne Pueꞌ Ala to uwaꞌ i jumaꞌami, alaꞌ iohi tiꞌo hibalihi gimba to nopoꞌohikikei Pueꞌ Ala hingkeꞌna nilambaꞌhi. Nirewahihi ka lalimi mpololeke, alaꞌ tiꞌo peleihane Pueꞌ Ala; inioꞌ ijamakei hibali to niparuku. Nisulungihi ka kopopuhiꞌna lalimi. Inioꞌkei mampaliꞌlu rasiꞌmi hadoduomi.

³Inioꞌkei mohawaꞌ hibali topoparenta to dokoꞌ mokuasaꞌi toaꞌna. Angkana wae hangangaa mewalikei pandiri' i iohi,

⁴horiana ane mehupaꞌi huliꞌ Tadulako Topolambaꞌ, hingkiꞌ Nopaꞌanikei howonina pajamami, iomo totali to manobaꞌ tandaꞌ peꞌadaꞌi wute nantolou-louna.

⁵Hatoꞌo woꞌo ingkei to moleaꞌ tene, hangangaa mengkoruꞌkei pe tomotodi. Hei ingkei lekiꞌ-lekiꞌna to mepoꞌohi, hangangaa momesulungikei hante mampeꞌiwowoiꞌkei alaꞌ i lali Suraꞌ Mangkolehi teꞌukiꞌ waheꞌe: “Pueꞌ Ala moꞌewahi toaꞌ to mampokokodeꞌ, angkana Io mampokarima toaꞌ to mengkaꞌiwowoiꞌ.” [13]

⁶Iomo horiana halali-halali, hangangaa mengkaꞌiwowoiꞌkei, hei mengkoruꞌkei pe Pueꞌ Ala to makuasaꞌ, hingkeꞌna ane hupaꞌmo tempoNe, hingkiꞌ Nopoꞌiwomboꞌ kotuwuꞌmi.

⁷Ipepolintarokikei kotepemi hei lekiꞌ-lekiꞌna kotuwuꞌmi i Io, alaꞌ Io to morewahikei.

⁸Hangangaa lebaꞌ pekirimi hei majaga-jagakei, alaꞌ poniꞌmi Belisiꞌ matengkaꞌ nturusi. Io hibali hambaꞌa singa to bilora, timomo hingkiꞌ mehokiꞌ.

⁹Belisiꞌ hangangaa iꞌewakei mpololeke moliu pepoꞌohimi to maroho, alaꞌ ibahaꞌkei, i humanele duniaꞌ, halali hampepoꞌohimi pahuahi woꞌo komaporiꞌ hibali to ihuakei.

¹⁰Hei ane liumoꞌi komaporiꞌ to hampaiꞌlu tiꞌo, Pueꞌ Ala hingkiꞌ mampoganai hapo to makuraꞌ tene i ingkei. Palaihana, Io hingkiꞌ mampokaroho woꞌo pepoꞌohimi, mampokononto kotuwuꞌmi hei mampolebaꞌ lalimi. Alaꞌ Pueꞌ Ala to buhaꞌ rima, Io to moꞌuwiꞌkei mewali anaꞌNa moliu Kerisitu, hingkeꞌna pahuakei dolaꞌmi i lali komanobaꞌaNa to hawaꞌi mokoꞌukoa.[14]

¹¹Topokodeꞌmo Pueꞌ Ala alaꞌ Io to makuasaꞌ i lekiꞌ-lekiꞌna wute nantolou-louna. Amin!

¹²Suraꞌku to hangkokotu hieꞌe kuꞌukiꞌ, hante hi Silas[15] iomo to mampororuiꞌa moꞌukiꞌ. Io woꞌo halali hampepoꞌohinta to wadi nipoꞌohi. I lali suraꞌku hieꞌe, kupowutemokikei i kotuꞌu-tuꞌuana hohumbo kokodeꞌne rimana Pueꞌ Ala i ingkiꞌ. Kuꞌukiꞌ hatoꞌo hingkeꞌna maroho lalimi. Hangangaa metatikokei maroho i lali komarimaNa tiꞌo.

¹³Tabea ka halali hampepoꞌohimi to uwaꞌ i kota Babilon[16]. Iohi noꞌuwiꞌhi Pueꞌ Ala, hibali hante ingkei. Hi Markus to kupoꞌanaꞌ,[17] mampakatu woꞌo tabea pe ingkei.

¹⁴Kuperapiꞌ hingkeꞌna mometabeꞌ-tabeꞌmokei haduo hei haduo tandaꞌ komarimami i halali hampepoꞌohimi. Kuperapiꞌ woꞌo i Pueꞌ Ala hingkeꞌna Nopaꞌaniki romiꞌ ngkotuwuꞌ nokomi pohintuwuꞌmi hante Kerisitu.