Read Rampi 2 Peturuꞌ 1 Bible Online

2 Peturuꞌ 1 - Rampi bible

2 Peturuꞌ 1

¹Suraꞌ hieꞌe ka aku hi Simo Peturuꞌ hawiꞌna hei surona hi Yesu Kerisitu. Kupokatu suraꞌ hieꞌe pe ingkei halali-halali to mepoꞌohi pe hi Yesu Kerisitu. Hi Yesu Kerisitu iomo Pueꞌta to mampoweaꞌkiki lala mepoꞌohi pe Io, Nowali hatoꞌo nokomi waliaNa to mononto tiꞌo, Nopopewalimokei toaꞌNa to mepoꞌohi pe Io, hibali hante ingka suroNa.

²Mekokaeꞌa i Pueꞌ Ala hingkeꞌna tetambai pebarakati hante romiꞌ ngkotuwuꞌ to Nopaꞌanikikei, alaꞌ ibahaꞌmokei Pueꞌ Ala hante hi Yesu Pueꞌta.

³Moliu kuasaꞌNa, Pueꞌ Ala mampaꞌanimoki lekiꞌ-lekiꞌna to toparaluꞌi hingkeꞌna tuwuꞌki motuntuni peleihaNa. Nopaꞌanimoki lekiꞌ-lekiꞌna tiꞌo alaꞌ tobahaꞌmo Yesu Kerisitu, hei Iomo to moꞌuwiꞌki mewali toaꞌNa nokomi komanobaꞌNa hante komoromiꞌna laliNa.

⁴Moliu komanobaꞌNa hante komoromiꞌna laliNa tiꞌo, Pueꞌ Ala mampoꞌuwaꞌ dandi to kodeꞌ mpololeke dumbuꞌne i ingkiꞌ. TungkaihaNa mampoꞌuwaꞌ dandi tiꞌo i ingkei, hingkeꞌna pambiarami wadi mewali hibali hante pambiaraNa, alaꞌ kotepohintemimo ka kokodakena duniaꞌ, to rowali toaꞌ to kodake i duniaꞌ.

⁵Halali-halali, tiꞌomo komoromiꞌne Pueꞌ Ala i ingkei. Iomo horiana: pedeꞌ ipokarohokei mpuꞌu pepoꞌohimi, pepoꞌohimi hawaꞌi uwaꞌ komakuraꞌne ane iwalikei nturusi hapo to moromiꞌ. To iwalikei moromiꞌ hawaꞌi uwaꞌ komakuraꞌne ane uwaꞌ kopebahaꞌmi.

⁶Kopebahaꞌmi hawaꞌi uwaꞌ komakuraꞌne ane moriikei peleihana lalimi. Poriina peleihana lalimi hawaꞌi uwaꞌ komakuraꞌne ane moriikei komaporiꞌ. Poriimi komaporiꞌ hawaꞌi uwaꞌ komakuraꞌne ane mengkoruꞌkei pe Pueꞌ Ala.

⁷Pengkoruꞌmi pe Pueꞌ Ala hawaꞌi uwaꞌ komakuraꞌne ane mampokarimakei halali hampepoꞌohimi. Pepokarimami i halali hampepoꞌohimi hawaꞌi uwaꞌ komakuraꞌne ane marimakei pe lekiꞌ-lekiꞌna toaꞌ.

⁸Ane lekiꞌ-lekiꞌna tiꞌo pedeꞌ iwalikei, hingkiꞌ mowuaꞌ koꞌibahaꞌnemokei Pueꞌta Yesu Kerisitu, hei kotuwuꞌmi hingkiꞌ modumbuꞌ mpololeke.

⁹Angkana toaꞌ to hawaꞌi mowalia hatoꞌo, hibalihi tobilo ba toaꞌ to hawaꞌi mampekiri ngkurauꞌ, alaꞌ rokolembulihaki konipahinemo dosara.

¹⁰Mewaliꞌ, halali-halali, alaꞌ noꞌuwiꞌmokei Pueꞌ Ala hei Nopokonontomokei mewali toaꞌNa, iomo horiana hangangaa pedeꞌ ipokarohokei pentuntumi i Pueꞌ Ala, hingkeꞌna mombaha koNoꞌuwiꞌmi hante koNowowoimi. Alaꞌ ane itambaikei pepoꞌohimi hante walia to kutiꞌi hingkenia, bateꞌna hawaꞌkei hingkiꞌ maꞌoruꞌ ka pepoꞌohimi,

¹¹hei i ando to hingkiꞌ dongkaꞌ, Pueꞌ Ala hingkiꞌ mantorimokei i lali poparentana Pueꞌta Yesu Kerisitu Topohompoꞌ. Hei PoparentaNa tiꞌo hawaꞌi hingkiꞌ mokoꞌukoa.

¹²Mewaliꞌ halali-halali, kehapoꞌi ibahaꞌmokei kotuꞌuna lekiꞌ-lekiꞌna tiꞌo, hei maroho petuntumi i poturuꞌ tiꞌo, angkana kukodokoꞌi hingkeꞌna ikolowoikei nturusi.

¹³Alaꞌ kubahaꞌmo hamboaꞌmo morue hingkiꞌ mahiꞌa hintotoꞌ hante hapo to nopowutekimoꞌa Pueꞌta Yesu Kerisitu. Mewaliꞌ, kolentuꞌaku tene tuwuꞌ, hangangaa kupowutekikei hingkeꞌna ikolowoikei lekiꞌ-lekiꞌne hieꞌe.

¹⁵Iomo horiana kuhohiꞌi mampoturuꞌkei, hingkeꞌna ane kupolihimokei, hingkiꞌ ikolowoikei nturusi lekiꞌ-lekiꞌne poturuꞌku.

¹⁶Aku hante surona hi Yesu to ntaniꞌna, mampoturuꞌmokei komarohona kuasaꞌna Pueꞌta Yesu Kerisitu hante kohingkiꞌ hupaꞌNa huliꞌ i duniaꞌ moparenta. To kipoturuꞌkimokei tiꞌo, handoꞌio lolita wuti. Kibahaꞌ hapo to kipoturuꞌkikei, alaꞌ kiꞌokiꞌ mata komanobaꞌne hi Yesu.

¹⁷Hampiha, uwaꞌka woꞌo moꞌawa hi Yesu i tempoNa mantorimo peꞌadaꞌi hante komanobaꞌ ka Pueꞌ Ala UmoꞌNa to manobaꞌ mpololeke tuwuꞌNa. I tempo tiꞌo, notiꞌi Pueꞌ Ala, “Hieꞌemo AnaꞌKa to Kupokarima hei Kupotanaꞌ.”

¹⁸Ingkamo to pahori loaꞌNe Pueꞌ Ala ka suruga i tempoki uwaꞌ moꞌawa hante hi Yesu i womboꞌ biri to manobaꞌ tiꞌo.

¹⁹Mewaliꞌ, nokomi kokiꞌokiꞌna lekiꞌ-lekiꞌna tiꞌo, iomo horiana kipoꞌohi mpololeke pohawaꞌne Pueꞌ Ala to ropowute nabi-nabi hampiha. Lolitara tiꞌo hibali huluꞌ to mewanta i lali komokorindiana, iomo horiana hangangaa ipoꞌilalikei nturusi wute mehupaꞌ womo Pueꞌ Yesu i korompihana humei pe duniaꞌ hieꞌe. Kopehupaꞌna huliꞌ hi Yesu tiꞌo wadi nipandiriꞌ hibali pehupaꞌna ando ba hibali Betueꞌ Tinaꞌ i Moto Ando to mowantai duniaꞌ. Tempo tiꞌo, hi Yesu hingkiꞌ mewanta i lalimi.

²⁰To hangangaa ibahaꞌkei mpololeke: hawaꞌi uwaꞌ haduo nabi to moꞌukiꞌ lolitana Pueꞌ Ala motuntuni pekirina hadoduona,

²¹alaꞌ Kareba ka Pueꞌ to ropowute nabi-nabi hampiha hawaꞌi motuntuni peleihana toaꞌ, angkana nabi-nabi tiꞌo mampowute Kareba ka Pueꞌ Ala nokomi kuasaꞌna Inohaꞌ Mangkolehi.