Read Rampi 1 Yohanes 1 Bible Online

1 Yohanes 1 - Rampi bible

1 Yohanes 1

¹Ohi suraꞌ hieꞌe mololita noniuꞌ Boo to mampoꞌuwaꞌ kotuwuꞌ. Boo tiꞌo, uwaꞌmo mepongka ka uluꞌ-uluꞌna. Kihorimo noniuꞌ Io, hei kiꞌokiꞌmo, kisobiꞌimo hei kitikomo. Tiꞌo to mewali ohine suraꞌ hieꞌe.

²To mampoꞌuwaꞌ kotuwuꞌ tiꞌo wutemo i lali duniaꞌ hieꞌe, hei kiꞌokiꞌmo. Iomo horiana kipokonontokikei pehupaꞌNe. Kibahaꞌ koꞌIona to mampoꞌuwaꞌ kotuwuꞌ to wolaꞌ to hawaꞌi mokoꞌukoa. Io to uwaꞌ moꞌawa-awa hante Pueꞌ Ala Umoꞌta, hei to mehupaꞌmo pe ingka.

³Hapo to kiꞌokiꞌ hei kihori, io to kipowutekikei, hingkeꞌna mohintuwuꞌkei moꞌawa-awa hante ingka i lali pohintuwuꞌta hante Pueꞌ Ala Umoꞌta hante Yesu Kerisitu AnaꞌNa.

⁴Kiꞌukiꞌkikei hieꞌe, hingkeꞌna to motanaꞌ mpololeke.

⁵Hieꞌemola kareba to kihori ka hi Yesu liu kipowutekikei, Pueꞌ Ala iomo komobaro. I Io hawaꞌi uwaꞌ komokorindi.

⁶Ane totiꞌi mohintuwuꞌki hante Pueꞌ Ala, angkana tuwuꞌki tene i lali komokorindi, mowutiki hante hawaꞌki motuntuni poturuꞌ to tuꞌu.

⁷Angkana ane tuwuꞌki i lali komobaro, hibali Pueꞌ Ala poko mowali to maniuꞌ hintotoꞌ hante komobaroNa, mohintuwuꞌki haduo hei haduo, hei Nowaheꞌmoki moliu i raꞌana hi Yesu Kerisitu ka lekiꞌ-lekiꞌna dosanta.

⁸Ane totiꞌi hawaꞌki madosa, mampowowutiki pe wotanta hadoduonta hei hawaꞌki mampoꞌilali poturuꞌ to tuꞌu noniuꞌ Pueꞌ Ala.

⁹Angkana ane topangakuꞌi dosante, Pueꞌ Ala mampobuhoꞌi dandiNa pe ingkiꞌ, hei Nowali hapo to mononto, horiana Io hingkiꞌ moꞌampuniki ka lekiꞌ-lekiꞌna dosanta, hante Nopomangkolehi lalinte ka lekiꞌ-lekiꞌna to kodake.

¹⁰Angkana ane totiꞌi hawaꞌki madosa, mampowowutiki pe Pueꞌ Ala, hei hawaꞌi topoꞌilali BooNe.