Read Rampi 1 Yohanes 2 Bible Online

1 Yohanes 2 - Rampi bible

1 Yohanes 2

¹Anaꞌku, kuꞌukiꞌ hieꞌe, hingkeꞌna inioꞌkei mowali dosa. Angkana ane uwaꞌ to mowali dosa, uwaꞌ Haduo to mampelumbuiki i hinarona Pueꞌ Ala Umoꞌta, Iomo Yesu Kerisitu to tuꞌu.

²Hei Io to mahi mewali podame hingkeꞌna Pueꞌ Ala moꞌampuniki ka dosanta. Hei handoꞌiolu dosanta to Noꞌampuni, angkana dosara woꞌo toaꞌ i humanele duniaꞌ.

³Ane topetuntuiꞌi hawaꞌne Pueꞌ Ala tiꞌo, monontomo mpuꞌu kotobahaꞌne Pueꞌ Ala.

⁴Toaꞌ to mantiꞌi, “Kubahaꞌmo Pueꞌ Ala,” angkana hawaꞌhi mampetuntui hawaꞌNa, mowutihi hei hawaꞌhi mampoꞌilali poturuꞌ to tuꞌu noniuꞌ Pueꞌ Ala.

⁵Toaꞌ to motuntuni Boona Pueꞌ Ala, toaꞌ tiꞌo mampokarima Pueꞌ Ala, horiana pomepokarimana toaꞌ tiꞌo hante Pueꞌ Ala mewali buhaꞌ, iomo to mopotongawa pohintuwuꞌne hante Pueꞌ Ala.

⁶Hihimolu to mantiꞌi mohintuwuꞌ hante Pueꞌ Ala, waliara hangangaa hibali hante waliana Yesu Kerisitu.

⁷Halali-halali to kupokarima. Pohawaꞌ to kuꞌukikikei hieꞌe, handoꞌio pohawaꞌ to wolaꞌ. Pohawaꞌ hieꞌe, moruemo nipowute pe ingkei mepongka ka uluꞌ-uluꞌna. Pohawaꞌ hieꞌe iomo Boo to moruemo ihorimokei hei to mampoturuꞌkei hingkeꞌna momepokarimakei haduo hei haduo.

⁸Angkana kehapoꞌi hatoꞌomo, bateꞌna kuꞌukikikei pohawaꞌ hieꞌe hibali pohawaꞌ to wolaꞌ, alaꞌ mombahamo kotuꞌuna hawaꞌ hieꞌe i lali kotuwuꞌna hi Yesu hei i lali kotuwuꞌmi. Alaꞌ komokorindi hingkiꞌ liumo, hei komobaro to tuꞌu mepongkamo mewanta.

⁹Toaꞌ to mantiꞌi tuwuꞌhi i lali komobaro, angkana mampokoiꞌhi halali hampepoꞌohina, bateꞌna tuwuꞌ tene i lali komokorindi.

¹⁰Toaꞌ to mampokarima halali hampepoꞌohina, tuwuꞌ i lali komobaro, hei hawaꞌi uwaꞌ to mampomonawuꞌi.

¹¹Toaꞌ to mampokoiꞌ halali hampepoꞌohina, uwaꞌ tene i lali komokorindi hei hawaꞌi nobahaꞌ pe imbo koꞌakoane, alaꞌ komokorindi tiꞌo mampobiloꞌi.

¹²Anaꞌku, kuꞌukikikei suraꞌ hieꞌe, alaꞌ Pueꞌ Yesu, moꞌampuni dosami.

¹³Umoꞌ-umoꞌ, kuꞌukikikei suraꞌ hieꞌe, alaꞌ ibahaꞌmokei himo to uwaꞌ mepongka ka uluꞌana. Anaꞌntomaꞌani hei anaꞌntowowalo, kuꞌukikikei suraꞌ hieꞌe, alaꞌ ninanimo Belisiꞌ.

¹⁴Kuꞌukiꞌ pe ingkei anaꞌku, alaꞌ ibahaꞌmokei Umoꞌte. Kuꞌukiꞌ pe ingkei umoꞌ-umoꞌ, alaꞌ ibahaꞌmokei himo to uwaꞌ mepongka ka uluꞌana. Kuꞌukiꞌ pe ingkei anaꞌntomaꞌani hei anaꞌntowowalo, alaꞌ marohomo pepoꞌohimi, hei ipoꞌilalikei pohawaꞌne Pueꞌ Ala, hei ninanimo Belisiꞌ.

¹⁵Inioꞌkei mampokodeꞌ duniaꞌ hieꞌe hante hapo to uwaꞌ i duniaꞌ hieꞌe. Himo to mampokodeꞌ duniaꞌ hieꞌe, palaihana hawaꞌhi mampokarima Pueꞌ Ala Umoꞌta.

¹⁶Alaꞌ lekiꞌ-lekiꞌna to uwaꞌ i lali duniaꞌ hieꞌe, iomo peleihana lalinta to kodake, hapo to toꞌokiꞌ hei to tokohoka, hante hapo to mampoꞌuwaꞌ pampokokodeꞌta, lekiꞌ-lekiꞌna tiꞌo handoꞌio ka Umoꞌta, bateꞌna ka duniaꞌ.

¹⁷Hei duniaꞌ hieꞌe hingkiꞌ mokero moꞌawa-awa hante lekiꞌ-lekiꞌna to nolei toaꞌ. Angkana toaꞌ to motuntuni peleihana Pueꞌ Ala bateꞌna tuwuꞌ wute nantolou-louna.

¹⁸Anaꞌku, hamboaꞌmo morue hingkiꞌ mehupaꞌ koꞌukoane duniaꞌ. Hei hingkiꞌ hupaꞌ haduo to rotiꞌi Poniꞌna Kerisitu. Hinewowoꞌena woriꞌmo mehupaꞌ poniꞌne Kerisitu. Iomo hinaꞌ mombahamo mpuꞌu kohingkiꞌ mehupaꞌne koꞌukoane duniaꞌ.

¹⁹Poniꞌna Kerisitu tiꞌo uwaꞌ i lumbunta hampiha, angkana kotuꞌuana handoꞌiohi awanta. Iomo hinaꞌ molaihi mampotaniꞌ ka ingkiꞌ. Ane rapaꞌna iohi tuꞌu-tuꞌu awanta, ketuwuꞌhi nturusi moꞌawa-awa hante ingkiꞌ. Angkana mokaꞌamohi ka ingkiꞌ, mewaliꞌ monontomo mpuꞌu kohawaꞌre tuꞌu-tuꞌu moꞌawa-awa hante ingkiꞌ.

²⁰Angkana ingkei, halali-halali, itorimomokei Inohaꞌ Mangkolehi to ka Kerisitu. Iomo horiana ibahaꞌmokei poturuꞌ to tuꞌu.

²¹Io tungkaihangka horiana kuꞌukiꞌkikei suraꞌ hieꞌe handoꞌio nokomi kohawaꞌna ibahaꞌkei poturuꞌ to tuꞌu. Kuꞌukiꞌkikei suraꞌ hieꞌe, alaꞌ ibahaꞌmokei poturuꞌ to tuꞌu, hei ibahaꞌmokei hawaꞌi uwaꞌ to salaꞌ ka poturuꞌ tiꞌo.

²²Himo to mowuti? To mowutihi iomo toaꞌ to mosapuaka kohiYesuna Datu to Mamposalamaꞌ. Iomohi poniꞌne Kerisitu, alaꞌ mosapuakahi Pueꞌ Ala Umoꞌta hante hi Yesu anaꞌNa.

²³Toaꞌ to mosapuaka Anaꞌna Pueꞌ Ala, hawaꞌi uwaꞌ pohintuwuꞌre hante Pueꞌ Ala Umoꞌta. Toaꞌ to mopangakuꞌ kohiYesuna Anaꞌne Pueꞌ Ala, mohintuwuꞌhi woꞌo hante Pueꞌ Ala Umoꞌta.

²⁴Mewaliꞌ, halali-halali, poturuꞌ to ihorimokei ka uluꞌana, tiꞌo to hangangaa ipoꞌilalikei nturusi. Ane ipoꞌilalikei nturusi poturuꞌ tiꞌo, hingkiꞌ mohituwuꞌkei hante Pueꞌ Ala Umoꞌta hante hi Yesu anaꞌNa.

²⁵Hieꞌemo dandine Pueꞌ Yesu pe ingkiꞌ, kotuwuꞌ to wolaꞌ to hawaꞌi mokoꞌukoa.

²⁶Kuꞌukiꞌkikei suraꞌ hieꞌe noniuꞌ i toaꞌ to dokoꞌhi mampomonawuꞌkei.

²⁷Angkana halali-halali, itorimokei Inohaꞌ Mangkolehi to ka Kerisitu, hei Inohaꞌ tiꞌo uwaꞌ nturusi i lalimi. Hamboaꞌmokei paralu ropaguru toaꞌ ntaniꞌ, alaꞌ Inohaꞌ Mangkolehi tiꞌo to mopagurukei i lekiꞌ-lekiꞌna. Monontomo lekiꞌ-lekiꞌna poturuꞌne, handoꞌio poturuꞌ to wuti. Mewaliꞌ, mohintuwuꞌmokei nturusi hante Kerisitu motuntuni hapo to Nopoturuꞌkikei.

²⁸Kololiuhana anaꞌku, hangangaa mohintuwuꞌkei nturusi hante Kerisitu, hingkeꞌna ane hupaꞌI huliꞌ, podehoꞌki mampomehinoroikiꞌI, hei hamboaꞌmoki mohili Nokohupaꞌi.

²⁹Ibahaꞌkei mpololeke halali, Kerisitu mowali nturusi peleihana Pueꞌ Ala. Iomo horiana ibahaꞌkei woꞌo, lekiꞌ-lekiꞌna toaꞌ to mowali nturusi peleihana Pueꞌ Ala, iomo anaꞌna Pueꞌ Ala.