Read Rampi 1 Yohanes 3 Bible Online

1 Yohanes 3 - Rampi bible

1 Yohanes 3

¹Kodeꞌ mpuꞌu rimane Pueꞌ Ala Umoꞌta i ingkiꞌ, iomo hinaꞌ Nopoꞌanaꞌki, hei ingkiꞌ tuꞌu-tuꞌuki anaꞌna Pueꞌ Ala. Toaꞌ to hawaꞌi mepoꞌohi pe hi Yesu hawaꞌhi pobahaꞌ koꞌingkiꞌne anaꞌne Pueꞌ Ala, alaꞌ hawaꞌhi mpuꞌu pobahaꞌ Pueꞌ Ala.

²Halali-halali to kupokarima! Hinewowoꞌena, anaꞌnaki Pueꞌ Ala. Angkana hawaꞌi tene tobahaꞌ hohumbo kotuwuꞌte i ando to hingkiꞌ dongkaꞌ, alaꞌ handoaꞌki tene niponobahaꞌi. Angkana to tobahaꞌ, i tempoNa mehupaꞌ huliꞌ Kerisitu, hingkiꞌ mewaliki hibali Io, alaꞌ hingkiꞌ pangkiꞌmoki hohumbo lenteNe to mpololeke.

³Hei lekiꞌ-lekiꞌna toaꞌ to mohinaru pe kohupaꞌana Kerisitu hingkiꞌ mampomoꞌelahi lekiꞌ-lekiꞌna dosa ka wotara hingkeꞌna mangkolehi tuwuꞌre hibali komangkolehina Kerisitu.

⁴Lekiꞌ-lekiꞌna toaꞌ to mowali dosa molungkaꞌihi hawaꞌna Pueꞌ Ala. Alaꞌ lekiꞌna dosa iomo polungkaꞌi noniuꞌ hawaꞌna Pueꞌ Ala.

⁵Hei ibahaꞌkei mpololeke halali-halali, tungkaihane hi Yesu mehupaꞌ i duniaꞌ hieꞌe hingkeꞌna humei mampolohoꞌ dosana toaꞌ. Alaꞌ Io hawaꞌi madosa.

⁶Mewaliꞌ, lekiꞌ-lekiꞌna toaꞌ to mohintuwuꞌ hante Io, hamboaꞌmohi mowali dosa. Lekiꞌ-lekiꞌna toaꞌ to mowalihi nturusi dosa, hawaꞌhi mpuꞌu pangkiꞌ ba pobahaꞌ hi Yesu.

⁷Anaꞌku, inioꞌhi nipotedehi toaꞌ mampomonawuꞌkei. Toaꞌ to mowali peleihana Pueꞌ Ala, iohi to mononto hibali komonontona hi Yesu.

⁸Toaꞌ to mowali nturusi dosa, iomo anaꞌna Belisiꞌ. Alaꞌ Belisiꞌ iomo to mowali dosa ka uluꞌana. Hieꞌemo tungkaihana Anaꞌna Pueꞌ Ala mehupaꞌ i duniaꞌ, hingkeꞌna mokero jamana Belisiꞌ.

⁹Lekiꞌ-lekiꞌna anaꞌna Pueꞌ Ala hamboaꞌmohi mowali dosa, alaꞌ kotuwuꞌ to wolaꞌ to ka Pueꞌ Ala uwaꞌ nturusi i lalira. Hamboaꞌmohi mowali dosa, alaꞌ anaꞌnahi Pueꞌ Ala.

¹⁰Hieꞌemo to mampotongawa kohihimona anaꞌne Pueꞌ Ala hante kohihimona anaꞌne Belisiꞌ, lekiꞌ-lekiꞌna toaꞌ to hawaꞌi mowali hapo to mononto, handoꞌiohi anaꞌna Pueꞌ Ala. Hatoꞌo woꞌo, lekiꞌ-lekiꞌna toaꞌ to hawaꞌi mampokarima halali hampepoꞌohina, handoꞌiohi woꞌo anaꞌna Pueꞌ Ala.

¹¹Alaꞌ hieꞌemo kareba to ihorimokei ka uluꞌ-uluꞌna, hangangaa momepokarimaki haduo hei haduo.

¹²Inioꞌki mampetuntui waliana hi Kai hampiha. Hi Kai tiꞌo anaꞌna Belisiꞌ, koꞌukoana morokoꞌ hineeꞌna hi Abeli. Mahamporeꞌi hinaꞌ io morokoꞌ hineeꞌna? Alaꞌ kodake waliane, angkana waliana hineeꞌna mononto.

¹³Mewaliꞌ, halali-halali, inioꞌ nipowuliꞌi ane toaꞌ to hawaꞌi mepoꞌohi pe hi Yesu mokabiriꞌkei.

¹⁴Ane topokarimahi halali hampepoꞌohinte, tobahaꞌ kohipohintente ka komahia hei pahuaki kotuwuꞌ to wolaꞌ to hawaꞌi mokoꞌukoa. Toaꞌ to hawaꞌi mampokarima halali hampepoꞌohina, handoaꞌhi tene hipohinte ka komahia.

¹⁵Himo to mampokoiꞌ halalina hampepoꞌohina, io hibali to merorokoꞌ. Hei ibahaꞌkei mpololeke halali, hawaꞌi uwaꞌ toaꞌ to merorokoꞌ to pahua kotuwuꞌ to wolaꞌ to hawaꞌi mokoꞌukoa.

¹⁶Hi Yesu mampeweimo kotuwuꞌNa pe ingkiꞌ, iomo to mampotongawa rimaNa to tuꞌu, horiana ingkiꞌ woꞌo hangangaa mampeweiki kotuwuꞌta hingkeꞌna mosulungiki halali hampepoꞌohinta.

¹⁷Rapaꞌna, ane uwaꞌ haduo toaꞌ tosugiꞌ tuwuꞌna, hei noꞌokiꞌhi halaline to merima-rima tuwuꞌna to paralu nosulungi, angkana hawaꞌi nosulungi, palaihana rimana Pueꞌ Ala hawaꞌi uwaꞌ i lalina toaꞌ tiꞌo.

¹⁸Anaꞌku, inioꞌki marima i lalintalu. Hangangaa topotongawa komarimante tiꞌo i walianta, alaꞌ tiꞌomo rima to tuꞌu.

¹⁹Ane mampokarimaki halali hampepoꞌohinta, mononto koꞌingkiꞌna anaꞌne Pueꞌ Ala, koꞌukoana lebaꞌ lalinte mehinaro pe Pueꞌ Ala.

²⁰Kehapoꞌi uwaꞌ tempone lalinte hawaꞌi tinto alaꞌ tobahaꞌi salaꞌte, inioꞌki morokaꞌ, alaꞌ nobahaꞌmo Pueꞌ Ala lekiꞌ-lekiꞌna tuwuꞌta, hei komarimaNa pe ingkiꞌ meliu ka hapo to topekiri i lalinta.

²¹Io horiana, halali-halali to kupokarima, ane hawaꞌki nosalaꞌi lalinta, podehoꞌmoki mehinaro pe Pueꞌ Ala,

²²hei hapo to toperapiꞌ pe Io, bateꞌna Nopaꞌaniki, alaꞌ mampetuntuiki hawaꞌNa hei mowaliki hapo to mampomotanaꞌ laliNa.

²³Hieꞌemo hawaꞌNe pe ingkiꞌ, hangangaa mepoꞌohiki pe hi Yesu Kerisitu AnaꞌNa, hei hangangaa momepokarimaki haduo hei haduo. Iomo to nopaturuꞌkiki Pueꞌ Yesu.

²⁴Toaꞌ to motuntuni hawaꞌna Pueꞌ Ala, mohintuwuꞌhi nturusi hante Io, hei Pueꞌ Ala mohintuwuꞌ woꞌo hante iohi. Tobahaꞌ kopohintuwuꞌte hante Pueꞌ Ala, alaꞌ Nopaꞌanimoki InohaꞌNa.