Read Rampi 1 Yohanes 5 Bible Online

1 Yohanes 5 - Rampi bible

1 Yohanes 5

¹Lekiꞌ-lekiꞌna toaꞌ to mampoꞌohi kohiYesuna Datu To Mamposalamaꞌ, iohi to mewali anaꞌne Pueꞌ Ala. Hei hihimo to mampokarima Pueꞌ Ala Umoꞌta, bateꞌna mampokarima woꞌo lekiꞌ-lekiꞌna anaꞌ-anaꞌna Pueꞌ Ala.

²Ane topokarimaꞌi Pueꞌ Ala hante topetuntui hawaꞌne, palaihana mampokarimaki woꞌo anaꞌna Pueꞌ Ala.

³Alaꞌ ane topokarimaꞌi Pueꞌ Ala, palaihana mampetuntuiki hawaꞌNa. Hei hawaꞌNa tiꞌo hawaꞌi masusa topetuntui.

⁴Alaꞌ lekiꞌ-lekiꞌna anaꞌna Pueꞌ Ala monanihi lekiꞌ-lekiꞌna to kodake i duniaꞌ hieꞌe. Nokomi pepoꞌohinta, monaniki lekiꞌ-lekiꞌna to kodake.

⁵Hihimo to monani lekiꞌ-lekiꞌna to kodake i duniaꞌ hieꞌe? Bateꞌnalu toaꞌ to mepoꞌohi kohiYesuna Anaꞌne Pueꞌ Ala.

⁶Hi Yesu Kerisitu iomo Anaꞌna Pueꞌ Ala to humei pe duniaꞌ. To nipotongawa hante koniriuNa hei konirokoꞌNa. I tempona Io humei pe duniaꞌ hieꞌe, hawaꞌi niriulu, angkana nirokoꞌ woꞌo.[1] Hei Inohaꞌ Mangkolehi mampokononto kohiYesuna Anaꞌne Pueꞌ Ala to mewali manusiaꞌ, hei hapo to notiꞌi Inohaꞌ Mangkolehi tiꞌo, bateꞌna tuꞌu mpololeke.

⁷Mewaliꞌ, uwaꞌ tolu tandaꞌ to hibobali tungkaihane to mampokonontokiki kohiYesuna Anaꞌne Pueꞌ Ala to mewali manusiaꞌ: Inohaꞌ Mangkolehi, uwai to nipakeꞌ moriu hei raꞌana hi Yesu i komahiaNa.

⁹Mewaliꞌ ane topoꞌohiꞌi posobiꞌine toaꞌ, hapo tene posobiꞌina Pueꞌ Ala. Alaꞌ Pueꞌ Ala mololita noniuꞌ i anaꞌNa hadoduoNa.

¹⁰Toaꞌ to mepoꞌohi pe Anaꞌna Pueꞌ Ala, robahaꞌ i lalira kotuꞌuna lolitane Pueꞌ Ala. Hihimolu to hawaꞌi mepoꞌohi pe Pueꞌ Ala, mampatiwutihi Pueꞌ Ala, alaꞌ hawaꞌhi mampoꞌohi hapo to notiꞌi Pueꞌ Ala noniuꞌ i AnaꞌNa.

¹¹Hieꞌemo lolitaNe noniuꞌ AnaꞌNa: Pueꞌ Ala mampaꞌaniki kotuwuꞌ to wolaꞌ to hawaꞌi mokoꞌukoa, hei kotuwuꞌ tiꞌo tohua moliu i AnaꞌNa.

¹²Hihimo to mohintuwuꞌ hante AnaꞌNa, pahuahi kotuwuꞌ to wolaꞌ, hei hihimo to hawaꞌi mohintuwuꞌ hante Anaꞌna Pueꞌ Ala, hawaꞌhi pahua kotuwuꞌ to wolaꞌ tiꞌo.

¹³Suraꞌ hieꞌe kuꞌukiꞌ pe ingkei to mepoꞌohi pe Anaꞌna Pueꞌ Ala hingkeꞌna ibahaꞌkei mpololeke kopahuamimo kotuwuꞌ to wolaꞌ to hawaꞌi mokoꞌukoa.

¹⁴Podehoꞌki mekokae pe Pueꞌ Ala, alaꞌ tobahaꞌ koNopehoromuane perapiꞌta, ane toperapiꞌ motuntuni peleihaNa.

¹⁵Hei ane tobahaꞌ koNopehoromuane perapiꞌta, tobahaꞌ woꞌo kopahuante hapo to toperapiꞌ pe Io.

¹⁶Ane iꞌokiꞌkei haduo halali hampepoꞌohimi to mowali dosa to hawaꞌi mangkomi pe komahia, hangangaa ipekokaekikei hingkeꞌna Pueꞌ Ala mampaꞌaniꞌi kotuwuꞌ. To kutungkai hieꞌe iomo toaꞌ to mowalihi dosa to hawaꞌi mangkomihi pe lali pehukua to hawaꞌi mokoꞌukoa. Angkana uwaꞌ woꞌo dosa to mangkomi toaꞌ pe pehukua to hawaꞌi mokoꞌukoa,[2] hei hawaꞌkei kurumbaꞌ mampekokaekihi to mowali dosa tiꞌo.

¹⁷Lekiꞌ-lekiꞌna walia to kodake, bateꞌna dosa. Angkana hawaꞌi lekiꞌna dosa mangkomiki pe pehukua to hawaꞌi mokoꞌukoa.

¹⁸Tobahaꞌ, lekiꞌ-lekiꞌna anaꞌna Pueꞌ Ala hawaꞌi ropobiasa mowali dosa, alaꞌ nopoꞌodaꞌhi Anaꞌna Pueꞌ Ala. Iomo horiana hawaꞌhi wadi nopahampo Belisiꞌ.

¹⁹Tobahaꞌ, ingkiꞌ hieꞌe anaꞌnaki Pueꞌ Ala, kehapoꞌi lekiꞌ-lekiꞌna toaꞌ tota mepoꞌohi i duniaꞌ hieꞌe nokuasaꞌi Belisiꞌ.

²⁰Tobahaꞌ, hupaꞌmo Anaꞌne Pueꞌ Ala pe duniaꞌ, hei Io to mampaꞌaniki kononto lali hingkeꞌna tobahaꞌi Pueꞌ Ala to tuꞌu. Mohintuwuꞌmoki hante Pueꞌ Ala to tuꞌu nokomi pohintuwuꞌta hante Yesu Kerisitu AnaꞌNa. Iomo Pueꞌ Ala to tuꞌu. Ka Io tohuamo kotuwuꞌ to wolaꞌ to hawaꞌi mokoꞌukoa.

²¹Anaꞌku, majaga-jagakei. Inioꞌkei mampenombai hapo to uwaꞌ i duniaꞌ hieꞌe hangangaa pe Pueꞌ Alalu ipenombakei.