Read Rampi 2 Yohanes 1 Bible Online

2 Yohanes 1 - Rampi bible

2 Yohanes 1

¹Suraꞌ hieꞌe to ka aku pinatua, kupokatu pe Inoꞌ to noꞌuwiꞌ Pueꞌ Ala, hante lekiꞌ-lekiꞌra anaꞌmu to kupokarima mpololeke. Handoꞌio akulu to mampokarimakei, angkana lekiꞌ-lekiꞌra woꞌo toaꞌ to pobahaꞌ poturuꞌ to tuꞌu mampokarimakei.

²Kupokarimakei alaꞌ mampoꞌohikei poturuꞌ to tuꞌu, hei poturuꞌ to tuꞌu tiꞌo topoꞌilali wute nantolou-louna.

³Pueꞌ Ala umoꞌta, hante Yesu Kerisitu AnaꞌNa mobarakatiki ka kopopuhiꞌna laliNa, mampatidoꞌkiki rimaNa, hei mampaꞌaniki Romiꞌ Ngkotuwuꞌ. Lekiꞌ-lekiꞌna tiꞌo totorimo hante lali to mononto hei lali to marima.

⁴Motanaꞌ mpololeke lalingka alaꞌ kupohidupaꞌkimohi haꞌumbora duo anaꞌma iseꞌe, hei waliara motuntuni poturuꞌ to tuꞌu, hibali to nohowoꞌikiki Pueꞌ Ala Umoꞌta.

⁵Mewaliꞌ, kuperapiꞌ pe ingko Inoꞌ, hingkeꞌna momepokarimaki haduo hei haduo. To kuꞌukiꞌ hieꞌe, handoꞌio hawaꞌ to wolaꞌ, angkana hawaꞌ hieꞌe iomo hawaꞌ to tohorimo mepongka ka uluꞌ-uluꞌna.

⁶Hieꞌemola palaihane rima, iomo mampetuntuiki hawaꞌna Pueꞌ Ala. Hei hawaꞌna hieꞌe ihorimokei mepongka ka uluꞌ-uluꞌna, hangangaa momepokarimaki.

⁷I humanele duniaꞌ woriꞌ topeꞌakalai to mampowute poturuꞌ to mepowewoꞌ. Hawaꞌhi mampoꞌohi kohiYesuna Datu to Mamposalamaꞌ to mewali manusiaꞌ. Toaꞌ to hatoꞌo, to peꞌakokalai hante poniꞌna Kerisitu.

⁸Iomo horiana majaga-jagakei, alaꞌ ane ipohentekei pepoꞌohimi pe Pueꞌ Yesu, hawaꞌi uwaꞌ dumbuꞌne pajamangki mampowute Kareba Moromiꞌ pe ingkei. Hangangaa mepoꞌohikei nturusi pe Pueꞌ, hingkeꞌna i ando pobutusiNa hingkiꞌ ihuakei lekiꞌ-lekiꞌne howonina pepoꞌohimi.

⁹Lekiꞌ-lekiꞌna toaꞌ to mekoꞌela ka poturuꞌ to tuꞌu hei hawaꞌhi motuntuni poturuꞌna Kerisitu, toaꞌ tiꞌo hawaꞌhi mohintuwuꞌ hante Pueꞌ Ala. Toaꞌ to motuntuni nturusi poturuꞌna Kerisitu, iomohi to mohintuwuꞌ hante Pueꞌ Ala Umoꞌta, hei hi Yesu anaꞌNa.

¹⁰Io horiana, ane uwaꞌ haduo topeꞌakalai to mehupaꞌ i porampuami to mampowute poturuꞌ to mosisalaꞌ hante poturuꞌ hieꞌe, inioꞌhi nipoliu mekahi i lali tambimi. Howeꞌ nikamorokihi inioꞌ.

¹¹Alaꞌ hihimo to mokamorokihi, hibalimo hante mosulungihi woꞌo i lali jamara to kodake tiꞌo.

¹²Woriꞌ tene to kukodokoꞌi kupowutekikei, angkana hawaꞌi kulei moꞌukiꞌ lekiꞌ-lekiꞌna i lali suraꞌ hieꞌe. Alaꞌ tungkaihangku hingkiꞌ akokei kukadoroꞌi, hei lekiꞌ-lekiꞌna tiꞌo hingkiꞌ kupowutekikei, hingkeꞌna makaja komotanaꞌte.

¹³Halalimu towoweꞌe iseꞌe to noꞌuwiꞌ woꞌo Pueꞌ Ala, anaꞌnahi mopakatuhi tabea pe ingkei.