Read Rampi 3 Yohanes 1 Bible Online

3 Yohanes 1 - Rampi bible

3 Yohanes 1

¹Halalingku Gaiu to kupokarima. Suraꞌ hieꞌe ka aku, pinatua.

²Halalingku! Mekokaeꞌa hingkeꞌna moromiꞌ-romiꞌko i lali hapo-hapolu to iwali. Kubahaꞌmo komoromiꞌne lalimu, hei kuperapiꞌ hingkeꞌna moromiꞌ-romiꞌ woꞌo kotuwuꞌma.

³Motanaꞌ mpuꞌu lalingka, alaꞌ uwaꞌ haꞌumbora duo halali hampepoꞌohinte to mehupaꞌ iseꞌe mampowute kareba noniuꞌ ingko, rotiꞌi, ipetuntui nturusi poturuꞌ to tuꞌu, hei waliamu motuntuni woꞌo poturuꞌ tiꞌo.

⁴Makaja mpololeke komotanaꞌka ane kuhoriꞌi kareba anaꞌ-anaꞌku mampetuntui nturusi poturuꞌ to tuꞌu.

⁵Halalingku! Mombahamo nipoꞌohiko alaꞌ mosulungimoko nturusi halali hampepoꞌohinta, kehapohi handoaꞌhi ibahaꞌ.

⁶Uwaꞌhi to humei iseꞌe mampowute i hinarona jumaꞌa noniuꞌ komarimamu pe halali hampepoꞌohinta. Mewaliꞌ, kupohinaru hingkiꞌ isulungihi nturusi hei ipopewotuhi moromiꞌ hingkeꞌna robiaꞌ mampololiu jamara. Iomo to mampomotanaꞌ Pueꞌ Ala.

⁷Halalinta tiꞌo mampopatengkaꞌhi jamana Pueꞌ Yesu. Hei hawaꞌhi hiniꞌ mantorimo hapo-hapo ka toaꞌ to hawaꞌhi mepoꞌohi pe Pueꞌ.

⁸Io horiana, masipatoꞌ mpololeke ane tosulungihi, alaꞌ ane towaliꞌi hatoꞌo, palaihana majamaki moꞌawa-awa i lali pajamara mampowute kareba to tuꞌu.

⁹Uwaꞌ halangkaꞌ suraꞌ to kupokatu pe jumaꞌa to itoꞌo. Angkana hi Dioterepe, mampaliꞌ konaꞌ dokoꞌ mewali tadulako jumaꞌa hei io hawaꞌi mampehoromua lolitangku.

¹⁰Io horiana, ane mehupaꞌa hantudoꞌ, hingkiꞌ kupokonontokiko waliane to kodake. Nosalaꞌika nturusi, angkana hawaꞌi tuꞌu pesalaꞌine. Hei handoꞌio tiꞌolu to nowali. Ane halalinta to mampowute Kareba Moromiꞌ holampihi i bolaꞌmi, hawaꞌhi notorimo, hei noꞌopihi woꞌo toaꞌ to rolei mantorimo. Hei himolu to mantorimo to mangkomi kareba, nopopesuwuhi ka jumaꞌa.

¹¹Halalingku! Anioꞌko mampetuntui hapo to kodake, angkana ipetuntuimo hapo to moromiꞌ. Toaꞌ to mowali romiꞌ, anaꞌnahi Pueꞌ Ala. Toaꞌ to mowali dake, hawaꞌhi pobahaꞌ Pueꞌ Ala.

¹²Ane hi Demeteriu, roperenaki lekiꞌ-lekiꞌna toaꞌ, hei masipatoꞌ mpololeke niperenaki, alaꞌ waliana motuntuni poturuꞌ to tuꞌu. Waliana hi Demeteriu, kiperenaki woꞌo, hei ibahaꞌ kotuꞌuna pepokodeꞌki.

¹³Woriꞌ tene to kukodokoꞌi kupowutekiko, angkana hawaꞌa hiniꞌ moꞌukiꞌ lekiꞌ-lekiꞌna i lali suraꞌ hieꞌe.

¹⁴Alaꞌ kupohinaru hamboaꞌi morue hingkiꞌ mohidupaꞌ womoki, hingkeꞌna uwaꞌ tempote mololita moꞌawa-awa.

¹⁵Mekokaeꞌa hingkeꞌna pahuako Romiꞌ Ngkotuwuꞌ. Tabea ka lekiꞌ-lekiꞌna awamu iseꞌe. Ipowute tabeangka pe lekiꞌ-lekiꞌna awangku haduo hei haduo.