Read Rampi Wahiu 1 Bible Online

Wahiu 1 - Rampi bible

Wahiu 1

¹I lali suraꞌ hieꞌe, Pueꞌ Ala morumbaꞌ hi Yesu Kerisitu hingkeꞌna Io mampowute pe hawiꞌ-hawiꞌNa, hapo to hangangaa hohiꞌ mewali. Hi Yesu morumbaꞌ malaꞌekaNa nolou mampetidoꞌki lekiꞌ-lekiꞌna to hingkiꞌ mewali tiꞌo pe hi Yohanes, hawiꞌNa.

²Lekiꞌna to noꞌokiꞌ hi Yohanes noꞌukiꞌ hingkeꞌna nopowutekiki pohawaꞌne Pueꞌ Ala hante hapo to notidoꞌkiꞌi hi Yesu Kerisitu.

³Motanaꞌ toaꞌ to mampobasakihi suraꞌ hieꞌe to mampowute hapo to hingkiꞌ mewali, hei motanaꞌhi woꞌo to mampehoromua hei mampetuntui hapo to teꞌukiꞌ i lali suraꞌ hieꞌe, alaꞌ hamboaꞌmo morue lekiꞌ-lekiꞌna hieꞌe hangangaa mewali.

⁴Suraꞌ hieꞌe ka aku hi Yohanes, kupakatukihi tosarani to meꞌohaꞌ i pitu jumaꞌa to uwaꞌ i poropensi Asia. Hinamo Pueꞌ Ala mobarakatikei hante Rima ngkotuwuꞌ hei romiꞌ ngkotuwuꞌ. Kuperapiꞌ hingkeꞌna ihuakei pebarakati hieꞌe ka Pueꞌ Ala to uwaꞌmo umbiꞌ ka uluꞌ-uluꞌna, hei to uwaꞌ hinewowoꞌena, hei to hingkiꞌ uwaꞌ wute nantolou-louna. Hei pebarakati hieꞌe ihuakei woꞌo ka Inohaꞌna Pueꞌ Ala to pitu,[1] to uwaꞌ i hinarona pahura kodatuana Pueꞌ Ala,

⁵hei ka hi Yesu Kerisitu to uluꞌ-uluꞌna nipopeꞌaro ka lumbuna toaꞌ to mahi. Hi Yesu Kerisitu iomo to nipoꞌohi i lali lekiꞌna to notiꞌi noniuꞌ Pueꞌ Ala, hei Iomo Tadulako to moparentai lekiꞌ-lekiꞌna datu i duniaꞌ. Hei Io to mampokarimaki, hante mampewei wotaNa nirokoꞌ hingkeꞌna tepohenteki ka pehuku dosa,

⁶hei Nopopewaliki toaꞌNa i lali poparentaNa hingkeꞌna mewaliki tadulako mpenomba pe Pueꞌ Ala, UmoꞌNa. Hi Yesu Kerisitumo to manobaꞌ tuwuꞌNa hei to makuasaꞌ wute nantolou-louna. Amin!

⁷Iꞌele romokei! Ane hi Yesu mehupaꞌ humei noputuꞌ kini, lekiꞌ-lekiꞌna toaꞌ hingkiꞌ pangkiꞌI, wute-wute i toaꞌ to mohakuꞌI hampiha. Hei lekiꞌ-lekiꞌna toaꞌ i duniaꞌ hingkiꞌ meꞌolahi alaꞌ koꞌIona. Tiꞌomo to hingkiꞌ mewali! Amin!

⁸Notiꞌi Pueꞌ Ala, “Akumo hieꞌe Alpa hei Omega. Akumo pepongkana hei koꞌukoana. UwaꞌmoꞌA umbiꞌ mepongka ka uluꞌ-uluꞌna, uwaꞌA hinewowoꞌena, hei bateꞌna hingkiꞌ uwaꞌA nturusi wute nantolou-louna. Kodeꞌ kuasaꞌKa ka lekiꞌ-lekiꞌna.”

⁹Aku hieꞌe hi Yohanes halalimi i lali konaꞌna hi Yesu. Hibobali konipoperima-rimante alaꞌ hi Yesu mewali datunta, hibobali woꞌo kosabaraꞌte morii poperima-rima tiꞌo. Ane aku hieꞌe, nitubeꞌa i leowuta to nikokeneꞌi Patmos alaꞌ mampowuteꞌa pohawaꞌna Pueꞌ Ala hei mampowuteꞌa noniuꞌ hi Yesu.

¹⁰I ando penombaha, nokuasaꞌiꞌa Inohaꞌ Mangkolehi, hei kuhori loaꞌ i tunduku. Makaja mpololeke loaꞌ tiꞌo, hibali monina torompeꞌ.

¹¹Notiꞌikiꞌa waheꞌe: “Hapo to iꞌokiꞌ, iꞌukiꞌmo i suraꞌ hei ipokatukihi pe pitu jumaꞌa iomo: Epesu, Simirna, Pergamus, Tiatira, Sardis, Piladepia hei Laodikia.”

¹²Mehahiliꞌa pe tundungku hingkeꞌna kuꞌokiꞌi himo to mololita pe aku, hei kuꞌokiꞌ pobuntahana huluꞌ to pitu onu to niwali ka bulawa.

¹³I lumbuna pobuntahana huluꞌ tiꞌo, kuꞌokiꞌ haduo toaꞌ lentena hibali Anaꞌ Manusiaꞌ. Komandoena jubaNa wute i kapuꞌNa, hei bobariꞌNa nowiwiꞌ salupiꞌ bulawa.

¹⁴WiloluNa bobala hibali wilolu gimba ba kapaꞌ. MataNa mewanta hibali makiꞌ api.

¹⁵KapuꞌNa manakiꞌ hibali tembaga to hongkoꞌ nihowui i lali makiꞌna api. LoaꞌNa makaja mpololeke hibali uwai to makehiꞌ.

¹⁶Korawe kuanaNa motiko pitu onu betueꞌ, hei ka omeꞌNa mesuwu hamato piho to motari motimali. LioNa mewanta hibali pewantana ando.

¹⁷Kokuꞌokiꞌna, kaliuꞌ hipotumpapaꞌa i kapuꞌNa, hibaliꞌa toaꞌ to mahi. Angkana Nolule korawe kuanaNe i wotangku hei Notiꞌikiꞌa, “Hampoliꞌmoko morokaꞌ. Akumo hieꞌe to Pepongkana hei to Koꞌukoana,

¹⁸hei to tuwuꞌ. Aku mahiꞌA hampiha, angkana iꞌokiꞌmo tuwuꞌA huliꞌ, hei hingkiꞌ tuwuꞌA nturusi wute nantolou-louna. Aku to motiko pegili to wadi moweaꞌ peꞌohaꞌana to mahi, hei mampopeꞌarohi huliꞌ.

¹⁹Io horiana, hinewowoꞌena hangangaa iꞌukiꞌmo hapo to iꞌokiꞌ hingkenia, hapo to mewali i tempo hieꞌe, hei hapo to hingkiꞌ mewali uko hieꞌe.

²⁰Hingkiꞌ Kupokonontokiko palaihane pitu onu betueꞌ to iꞌokiꞌ i korawe koanangKu hante pobuntahana huluꞌ bulawa to pitu onu: betueꞌ to pitu onu tiꞌo, iomo malaꞌeka to morewahi to pitu jumaꞌa,[2] hei pobuntahana huluꞌ to pitu onu tiꞌo, iomo to pitu jumaꞌa.”