Read Rampi Wahiu 10 Bible Online

Wahiu 10 - Rampi bible

Wahiu 10

¹Uko tiꞌo, kuꞌokiꞌ haduo malaꞌeka to makuasaꞌ mengkohou humei ka suruga. Malaꞌeka tiꞌo noputuꞌ kini, hei tutuꞌna notuleliꞌi tantoroꞌue. Liona mewanta hibali ando, kapuꞌna hibali ori to keꞌapi.

²Kapuꞌ koanana medadihaꞌ i tahiꞌ, hei kapuꞌ koirina medadihaꞌ i lorina. I koraweꞌna uwaꞌ haꞌanu suraꞌ to kokiuꞌ to tewuraꞌ.

³Mololitamo malaꞌeka tiꞌo nopokobue, hibali peꞌuona singa. Uko mololita, uwaꞌ boluntuꞌ to momoni ngkodeꞌ pitu mpiha, mololita hibali toaꞌ.

⁴Koꞌukona boluntuꞌ tiꞌo mololita, hingkiꞌ kuꞌukiꞌ lolitane, angkana hangkaꞌ-hangkaꞌlu kuhori womo loaꞌ ka suruga to mampatiꞌikiꞌa, “Inioꞌ i ukiꞌ tiꞌo! Hangangaa iwowuni hapo to notiꞌi boluntuꞌ to pitu hingkenia.”

⁵Uko tiꞌo, malaꞌeka to kuꞌokiꞌ hingkenia, to medadihaꞌ i tahiꞌ hante i lorina, mohiniꞌmo korawe koanana pe laniꞌ,

⁶honiꞌi modandi i lali konaꞌna Pueꞌ Ala to tuwuꞌ wute nantolou-louna, to mowali laniꞌ, duniaꞌ, tahiꞌ hei lekiꞌ-lekiꞌna ohina. I podandina notiꞌi waheꞌe: “Ane malaꞌeka to pitu motowuiꞌ torompeꞌna, i tempo tiꞌolumo Pueꞌ Ala hingkiꞌ mampopewali tungkaihaNa to moruemo tewuni. Tungkaihana tiꞌo bateꞌna hohiꞌ mewali, motuntuni hapo to Notiꞌikihi rumbaꞌaNa hampiha, iomo nabi-nabi to mampowute BooNa.”

⁸Uko tiꞌo, loaꞌ to kuhori ka suruga hingkenia mampatiꞌikiꞌa womo, notiꞌi, “Noloumoko moroa suraꞌ to tewuraꞌ, to uwaꞌ i koraweꞌna malaꞌeka to medadihaꞌ i tahiꞌ hante i lorina!”

⁹Noloumoꞌa mpuꞌu pe malaꞌeka tiꞌo, hei kutiꞌiki, “Paꞌanikiꞌa suraꞌ to kokiuꞌ tiꞌo.” Notiꞌikiꞌa, “Iroa hei iꞌokamo. Kehapoꞌi i omeꞌmu, moꞌowi hibali uwai koniuꞌ, angkana ane i lali hinaꞌimumoꞌi hingki' mampokolimbuaꞌ-mbuaꞌ.”

¹⁰Kuroamo mpuꞌu suraꞌ tiꞌo ka koraweꞌna malaꞌeka liu kuꞌoka. I omeꞌku moꞌowi mpololeke hibali uwai koniuꞌ, angkana kokuliominalu mampomolalo hinaꞌingku.

¹¹Uko tiꞌo, notiꞌikiꞌa, “Hangangaa ipowute womo hapo to hingkiꞌ kutidoꞌkiko noniuꞌ i toaꞌ i humanele duniaꞌ: datu-datu, kodatua, pemuleꞌa hei lekiꞌ-lekiꞌna wiharo.”