Read Rampi Wahiu 14 Bible Online

Wahiu 14 - Rampi bible

Wahiu 14

¹Uko tiꞌo, kuꞌokiꞌ Anaꞌ Gimba metotiꞌi i womboꞌ Biri Sion i Yerusale moꞌawa hante topetuntuNa to 144.000. I rouꞌra, teꞌukiꞌ konaꞌna Anaꞌ Gimba hante konaꞌna UmoꞌNa.

²Hei kuhori moni to makaja ka suruga, hibali peroruuna uwai to kodeꞌ, hei hibali monina boluntuꞌ. Moni to kuhori tiꞌo, hibali woꞌo monina katapi to rokadoꞌ toaꞌ.

³Molingamohi halangkaꞌ linga to wolaꞌ i hinaro pahura kodatuana Pueꞌ Ala hei i hinarona halangkaꞌ to tuwuꞌ to iba hante tadulako-tadulako to motuleliꞌi pahura kodatua tiꞌo. Lingara hawaꞌi hohumbo ropegurui toaꞌ ntaniꞌna. Topobahaꞌ, bateꞌralu to 144.000 tiꞌo. Ka lumbura toaꞌ i duniaꞌ, iomohi to nohompoꞌ Anaꞌ Gimba ka pehuku dosara.

⁴Kotuwuꞌra mangkolehi hibalihi to hawaꞌi howeꞌ hampiha moruntui towoweꞌe, hei hawaꞌhi woꞌo howeꞌ hampiha menomba i lentena lomoa. I imbo koꞌakoana Anaꞌ Gimba, itoꞌohi woꞌo metuntu. Iohi to nohompoꞌ hi Yesu Anaꞌ Gimba tiꞌo ka lumbura lekiꞌ-lekiꞌna toaꞌ i duniaꞌ, hei nipeweihi hibali popenomba to uluꞌ-uluꞌna pe Pueꞌ Ala hante pe hi Yesu Anaꞌ Gimba.

⁵Hawaꞌhi mowuti, hei hawaꞌi woꞌo uwaꞌ komasalaꞌre.

⁶Hei kuꞌokiꞌ womo haduo malaꞌeka to ntaniꞌna to meloka i raoha. Malaꞌeka tiꞌo mampowute Kareba Moromiꞌ to hawaꞌi tewolihi wute nantolou-louna. Kareba Moromiꞌ tiꞌo hingkiꞌ nopekarebaiki pe toaꞌ to meꞌohaꞌ i humanele duniaꞌ: pe lekiꞌ-lekiꞌna kodatua, lekiꞌ-lekiꞌna pemuleꞌa hei lekiꞌ-lekiꞌna wiharo.

⁷Malaꞌeka tiꞌo mololita nopokobue, notiꞌi, “Mengkoruꞌmokei pe Pueꞌ Ala, hei nipokodeꞌ konaꞌNe, alaꞌ hupaꞌmo tempo pehukuNe. Menombamokei pe Pueꞌ Ala to mowali laniꞌ, woiꞌ, tahiꞌ hei lekiꞌ-lekiꞌna kotimiana uwai.”

⁸Uko katoꞌo, uwaꞌ woꞌo malaꞌeka koroduona to metuntu pe malaꞌeka to uluꞌ-uluꞌna, notiꞌi, “Mokeromo! Mokeromo kota Babeli, kota to kodeꞌ mpololeke! Waliara toBabeli tiꞌo mekokomaꞌi, mokeloi toaꞌ i humanele duniaꞌ, hibalihi mampaꞌani toaꞌ maꞌinu anggoroꞌ to melolanu. Mokeromo kota tiꞌo.”

⁹Uko tiꞌo, malaꞌeka to katolu metuntu woꞌo i malaꞌeka to roduo tiꞌo, hei mololitamo nopokobue, notiꞌi, “Himolu to menomba pe pinatuwuꞌ to kodake hante lentena pinatuwuꞌ tiꞌo, hei himolu to mantorimo tandaꞌ pinatuwuꞌ tiꞌo i rouꞌra ba i korawera,

¹⁰toaꞌ tiꞌo hingkiꞌ maꞌinu angoroꞌ kobukotana Pueꞌ Ala, hawaꞌi hingkiꞌ uwaꞌ komoꞌoluane laliNa pe iohi. Toaꞌ tiꞌo hingkiꞌ nipoperima-rimahi i lali api belerang. Malaꞌekana Pueꞌ Ala hante Anaꞌ Gimba to i suruga hingkiꞌ mopopanto konipoperima-rimara tiꞌo.

¹¹Oroꞌ ka api to mampoperima-rimahi hingkiꞌ mengkaꞌoreꞌ nturusi wute nantolou-louna. Moromiꞌ ando ba wini, toaꞌ tiꞌo hingkiꞌ nipoperima-rimahi nturusi, alaꞌ menombamohi pe pinatuwuꞌ to kodake hante pe lentena to rowali, hei mantorimohi tandaꞌ konaꞌna pinatuwuꞌ tiꞌo.”

¹²Iomo horiana toaꞌna Pueꞌ tontora mepoꞌohi pe hi Yesu hingkeꞌna wadihi mampetuntui nturusi hawaꞌna Pueꞌ Ala hei mantaha i lali komaporiꞌ.

¹³Uko tiꞌo, kuhori womo loaꞌ ka lali suruga to mantiꞌi, “Iꞌukiꞌ womo hieꞌe: mepongka hinewowoꞌena, motanaꞌhi toaꞌ to mepoꞌohi nturusi pe hi Yesu wutehi mahi.” Mehoniꞌ Inohaꞌ Mangkolehi, “Tuꞌu mpololeke! Alaꞌ toaꞌ tiꞌo, bateꞌra hingkiꞌ meꞌohaꞌ ka lali pajamara hei komaporiꞌ alaꞌ lekiꞌna rasiꞌna waliara hingkiꞌ rotorimo.”

¹⁴Uko katoꞌo, kuꞌokiꞌ womo kini to popuhiꞌ. Hei i womboꞌ kini tiꞌo, mahura haduo toaꞌ, lentena hibali Anaꞌ Manusiaꞌ.[26] I tutuꞌNa uwaꞌ totali bulawa, hei koraweNa motiko hamato sangki to motari.

¹⁵Uko tiꞌo, uwaꞌ haduo malaꞌeka to ntaniꞌna to mesuwu ka Tambina Pueꞌ Ala. Io mololita nopokobue pe toaꞌ to mahura i womboꞌ kini tiꞌo, notiꞌi, “Iꞌaromo sangkiMa alaꞌ hupaꞌmo tempone mekina. Mangkemo ohine duniaꞌ.”

¹⁶Uko katoꞌo, Toaꞌ to mahura i womboꞌ kini tiꞌo moꞌaromo mpuꞌu sangkiNa mampekina ohi duniaꞌ.

¹⁷Uko tiꞌo, malaꞌeka to ntaniꞌna mesuwu ka lali Tambina Pueꞌ Ala to i suruga, motiko woꞌo sangki to motari.

¹⁸Hupaꞌ womo haduo malaꞌeka to ntaniꞌna ka potutua popenomba, iomo to mampoꞌodaꞌ api. Malaꞌeka tiꞌo mololita nopokobue pe malaꞌeka to motiko sangki to motari, notiꞌi, “Iꞌaromo sangkima hei irentehimo wuaꞌ anggoroꞌ to i duniaꞌ, alaꞌ mangkemo wuaꞌne.”

¹⁹Malaꞌeka tiꞌo moꞌaromo sangkina pe duniaꞌ, morentehi wuaꞌ anggoroꞌ ka karuna, hei notube pe lali popiꞌia anggoroꞌ to kodeꞌ. Popiꞌia anggoroꞌ tiꞌo, palaihana kobukotana Pueꞌ Ala.

²⁰Katoꞌo, wuaꞌ anggoroꞌ[27] tiꞌo nipiꞌi i howali kota, hei ka popiꞌia tiꞌo, moꞌilimo raꞌa hibali poꞌilina uwai to kodeꞌ. Komoꞌelana poꞌiliana kira-kira tolu natu kilometeꞌ. Hei ane uwaꞌ nara to mewute i raꞌa tiꞌo, kokuladuna wute i omeꞌna.