Read Rampi Wahiu 16 Bible Online

Wahiu 16 - Rampi bible

Wahiu 16

¹Kuhori womo loaꞌ to mololita nopokobue ka lali Tambina Pueꞌ Ala. Notiꞌi pe malaꞌeka to pitu, “Noloumokei, ibobomokei ohi mangkuꞌ kobukotane Pueꞌ Ala i womboꞌ duniaꞌ!”

²Noloumo mpuꞌu malaꞌeka to uluꞌ-uluꞌna mobobo ohi mangkuꞌ pe duniaꞌ. Katoꞌo mehupaꞌ bihu to mekororokaꞌi hei to maporiꞌ pe toaꞌ to uwaꞌ tandaꞌ pinatuwuꞌ to kodake hei to menomba pe lentena.

³Malaꞌeka to koroduona mobobo ohi mangkuꞌ pe tahiꞌ. Uwai tahiꞌ tiꞌo mewali hibali raꞌana toaꞌ to mahi, koꞌukoana mahihi lekiꞌ-lekiꞌne to tuwuꞌ i lali tahiꞌ.

⁴Malaꞌeka to katolu mobobo ohi mangkuꞌ pe lekiꞌ-lekiꞌna uwai hei pe lekiꞌ-lekiꞌna uluna uwai, koꞌukoana lekiꞌ-lekiꞌna uwai tiꞌo mewali momeaꞌ hibali raꞌa.

⁵Uko tiꞌo, kuhori malaꞌeka to mokuasaꞌi lekiꞌna uwai tiꞌo mantiꞌi: “Pueꞌ Ala to mangkolehi, to uwaꞌmo umbiꞌ mepongka ka uluꞌ-uluꞌna, hei to uwaꞌ hinewowoꞌena. Hintotoꞌ mpololeke pehukuMa hieꞌe,

⁶alaꞌ toaꞌ to kodake i duniaꞌ morokoꞌhi toaꞌMu to woriꞌ, hei raꞌara nabiMu nibobo. Iomo horiana Iwolihimo uwai i duniaꞌ mewali hibali raꞌa, honiꞌi Ipaꞌanikihi to merorokoꞌ hingkeꞌna roꞌinuꞌi. Hintotoꞌ mpololeke pehukuMa pe iohi!”

⁷Uko tiꞌo, kuhori womo loaꞌ ka potutua popenomba to mantiꞌi, “O Pueꞌ Ala, to makuasaꞌ bateꞌna maniuꞌ hei mononto pebutusiMa!”

⁸Uko katoꞌo, malaꞌeka to kaꞌiba mobobomo ohi mangkuꞌ i ando, hei ando nipaꞌani kuasaꞌ mampomampu toaꞌ.

⁹Mampuhi toaꞌ nokomi komolahona ando to makaja, honiꞌi motundaꞌhi Pueꞌ Ala, alaꞌ Io to makuasaꞌ i kohorewuꞌ tiꞌo. Angkana kehapoꞌi hatoꞌo, hawaꞌhi mengkatobaꞌ ka dosara, hei hawaꞌhi hiniꞌ mampokodeꞌ Pueꞌ Ala.

¹⁰Malaꞌeka to kalimo mobobo ohi mangkuꞌ i pahura kodatuana pinatuwuꞌ to kodake tiꞌo, horiana i humanele kodatuana, hangkaꞌ-hangkaꞌ romo mokorindi, hei toaꞌ mangkukuꞌhi lilaꞌra nokomi komolalora.

¹¹Motundaꞌhi Pueꞌ Ala to i suruga nokomi komaporiꞌna pehorira hei komolalona bihura. Angkana kehapoꞌi hatoꞌo, handoaꞌhi tene hiniꞌ mengkatobaꞌ ka waliara to kodake.

¹²Uko tiꞌo, malaꞌeka to ka oni mobobo ohi mangkuꞌ i uwai to kodeꞌ to nikokeneꞌi uwai Epara. Katoꞌo ohimo uwai tiꞌo, horiana hohumbo ropolalai datu-datu hante surodadura to mehupaꞌ ka motoꞌando.

¹³Hei kuꞌokiꞌ womo totolu lomoa lentera hibali torokoko mehupaꞌ ka omeꞌna naga, ka omeꞌna pinatuwuꞌ to kodake, hei ka omeꞌna nabi to mepomonawuꞌ.

¹⁴Hei makuasaꞌhi mowali tandaꞌ kuasaꞌ. Noloumohi lomoa to tolu tiꞌo mampohidupaꞌkihi datu i humanele duniaꞌ hingkeꞌna morampuhi nolou moponiꞌ i ando ngkodeꞌ to nopokononto Pueꞌ Ala. I tempo tiꞌo, Pueꞌ Ala to Makuasaꞌ hingkiꞌ monani lekiꞌ-lekiꞌna poniꞌNa i duniaꞌ.

¹⁵Katoꞌo lomoa tiꞌohi morampu datu-datu i peꞌohaꞌa to rotiꞌi i wiharo Ibarani: Harmagedo. Notiꞌi Pueꞌ Yesu, “Ipehoromuakei! Hangkaꞌ-hangkaꞌ hingkiꞌ mehupaꞌA, hibali kohupaꞌna to manako. Motanaꞌhi toaꞌ to majaga-jaga hei mampatimomohi baduꞌra. Alaꞌ ane hupaꞌA, hawaꞌhi hingkiꞌ matengkaꞌ melolawa hei hawaꞌhi hingkiꞌ mohili, alaꞌ timomohi Kukohupaꞌi.”[29]

¹⁷Uko tiꞌo, malaꞌeka to kapitu mobobo ohi mangkuꞌ i raoha. Hei kuhori womo loaꞌ to kodeꞌ mololita ka pahura kodatuana Pueꞌ Ala i lali TambiNa i suruga. Notiꞌi Nopokobue, “Mewalimo!”

¹⁸Uko katoꞌo, mewiaꞌmo, meboluntuꞌ, hei meluanoko. Mepongka ka pewalina toaꞌ i duniaꞌ wute hinewowoꞌena, handoaꞌi tene uwaꞌ luanoko to makaja hibali tiꞌo.

¹⁹Kota to kodeꞌ tiꞌo to nipandiriꞌ hibali kota Babeli to mobongkaꞌ mewali tolu dolaꞌ, hei kota-kota to kodake i humanele duniaꞌ mokero woꞌo. Hawaꞌi nokolembuliki Pueꞌ Ala mohuku kota Babeli, kota to kodeꞌ tiꞌo, horiana Nohowoni dosare toaꞌ to meꞌohaꞌ itoꞌo. Nopopaꞌinumohi ka paꞌinua anggoroꞌ kobukotaNa, Nokobukotaihi mpololeke hei hawaꞌi uwaꞌ komoꞌoluane laliNa pe iohi.

²⁰Nokomi luanoko to makaja tiꞌo, hangkaꞌ-hangkaꞌ romo moholi lekiꞌ-lekiꞌne leowuta i tahiꞌ, hei hamboaꞌmo uwaꞌ biri.

²¹Wuaꞌ ura to hibali watu kokodeꞌne, monawuꞌ ka laniꞌ mopihi toaꞌ. Ane haꞌanu, kira-kira limo mpuluꞌ kilo komadorine. Iomo horiana toaꞌ motundaꞌhi Pueꞌ Ala, alaꞌ makaja mpololeke kohorewuꞌ tiꞌo.