Read Rampi Wahiu 17 Bible Online

Wahiu 17 - Rampi bible

Wahiu 17

¹Uko tiꞌo, haduo ka malaꞌeka to pitu to motiko pitu mangkuꞌ tiꞌo humei pe aku hi Yohanes, Notiꞌikiꞌa, “Humeiko, hingkiꞌ kutidoꞌkiko hohumbo konohukune toaꞌ to kodake to meꞌohaꞌ i kota to kodeꞌ to nipandiriꞌ hibali towoweꞌe to mekokomaꞌi mpololeke waliana. Kota tiꞌo uwaꞌ i peꞌohaꞌa to woriꞌ uwaine.

²Datu-datu i duniaꞌ mowalihi walia to mekokomaꞌi moꞌawa hante towoweꞌe tiꞌo, hei lekiꞌ-lekiꞌna toaꞌ to meꞌohaꞌ i duniaꞌ nopopaꞌinuhi inua to melolanu, palaihana: io mowonahi mampetuntui waliana to hawaꞌi masipatoꞌ.”

³Nokuasaꞌiꞌa Inohaꞌ Mangkolehi, honiꞌi malaꞌeka tiꞌo mangkomiꞌa nolou pe popada lori. Itoꞌo kuꞌokiꞌ haduo towoweꞌe to mahura i hambaꞌa pinatuwuꞌ. Pinatuwuꞌ to nopahurai tiꞌo, momeaꞌ mpololeke, hei i humanele wotana teꞌukiꞌ lolita to mampokokeniꞌa Pueꞌ Ala; tutuꞌna pitu hei tanduꞌna hampuluꞌ onu.

⁴Baduꞌna towoweꞌe tiꞌo mangkononowa hei momeaꞌ mpololeke, hei nibunga-bungai hante bulawa, mutiara hei watu paramata to masuliꞌ hiline. Io motiko haꞌanu mangkuꞌ to niwali ka bulawa to buhaꞌ hante inua to mekororokaꞌi. Ohi mangkuꞌ tiꞌo, mopalaiha waliana to mekokomaꞌi hei to hawaꞌi masipatoꞌ.

⁵I rouꞌna, teꞌukiꞌ konaꞌ tota nibahaꞌ palaihane. Ukiꞌna waheꞌe, “Hieꞌemo kota Babeli to kodeꞌ. Iomo inoꞌre lekiꞌ-lekiꞌna toaꞌ to mekokomaꞌi waliara hei pehupaꞌana mampopengaa walia to hawaꞌi masipatoꞌ i duniaꞌ.”

⁶Kuꞌokiꞌ towoweꞌe tiꞌo, malanumo maꞌinu raꞌa toaꞌna Pueꞌ Ala. Palaihana, io morokoꞌhi toaꞌ to mopangakuꞌ kohiYesuna Pueꞌra. Heleꞌa mpololeke pangkiꞌ towoweꞌe tiꞌo.

⁷Uko katoꞌo, notiꞌi malaꞌeka to mangkomiꞌa, “Mahamporeꞌi hinaꞌ ipohele? Hingkiꞌ kupokonontokiko palaihane towoweꞌe tiꞌo hante pinatuwuꞌ to nopehendeꞌi, Pinatuwuꞌ to motutuꞌ pitu hei motanduꞌ hampuluꞌ tiꞌo.

⁸Pinatuwuꞌ tiꞌo uluꞌana tuwuꞌ, hinewowoꞌena hamboaꞌmo uwaꞌ, angkana hampiha tempo hingkiꞌ tuwuꞌ huliꞌ hei mesuwu humei ka tua pehukua to hawaꞌi tehukaꞌ kokuladune. Hei uko tiꞌo, io hingkiꞌ nihuku mahi. Toaꞌ to meꞌohaꞌ i duniaꞌ to hawaꞌi teꞌukiꞌ konaꞌre i lali Suraꞌ Ngkotuwuꞌ ikohandoaꞌna tene duniaꞌ nipopewali, hingkiꞌ hokohi pangkiꞌ pinatuwuꞌ tiꞌo, alaꞌ hampiha tuwuꞌ, hinewowoꞌena hamboaꞌmo uwaꞌ, angkana hampiha tempo hingkiꞌ hupaꞌ huliꞌ.

⁹Hangangaa topekokiri moromiꞌ hingkeꞌna tobahaꞌi palaihane lolita hieꞌe. Tutuꞌ pinatuwuꞌ to pitu tiꞌo, palaihana pitu onu biri,[30] i kota peꞌohaꞌana towoweꞌe tiꞌo. Hei tutuꞌ to pitu tiꞌo, palaihana pitu datu.

¹⁰Limo ka datu tiꞌo, mahimohi. Haduo kolentuꞌana tene moparenta. Hei haduo handoaꞌi tene mampemoluka moparenta. Io hingkiꞌ hupaꞌ moparenta, angkana hawaꞌi morue poparentane.

¹¹Haduo ka datu to pitu tiꞌo hingkiꞌ hupaꞌ womo moparenta; iomo pinatuwuꞌ to tuwuꞌ uluꞌana hei to hamboaꞌmo uwaꞌ hinewowoꞌena. Io hingkiꞌ hupaꞌ womo mewali datu kowaluna. Angkana koꞌukoana datu tiꞌo bateꞌna hingkiꞌ nihuku wute nantolou-louna.

¹²Tanduꞌ to hampuluꞌ to iꞌokiꞌ hingkenia, palaihana hampuluꞌ datu to handoaꞌi tene mampemoluka moparenta. Datu to hampuluꞌ tiꞌo hingkiꞌ nipaꞌanihi tempo moparenta moꞌawa hante pinatuwuꞌ tiꞌo, angkana poparentara hawaꞌi morue.

¹³Datu to hampuluꞌ tiꞌo, hampekokirihi mosulungi pinatuwuꞌ to kodake. Lekiꞌ-lekiꞌna komarohora hante komakuasaꞌra moparenta hingkiꞌ nipaꞌaniki pinatuwuꞌ to kodake.

¹⁴Hingkiꞌ moꞌewahi Anaꞌ Gimba. Angkana Anaꞌ Gimba tiꞌo hingkiꞌ monanihi, alaꞌ Iomo Pueꞌ ka lekiꞌ-lekiꞌna pueꞌ, hei Datu ka lekiꞌ-lekiꞌna datu. To moꞌawa Anaꞌ Gimba tiꞌo, iomohi to Nowowoi, to Noꞌuwiꞌmo, hei to tungkuꞌ pe Io.”

¹⁵Notiꞌi womo malaꞌeka tiꞌo pe aku, “Uwai to iꞌokiꞌ hingkenia, to nopahurai towoweꞌe to mekokomaꞌi waliana tiꞌo, palaihana toaꞌ to ka humanele duniaꞌ, toaꞌ ka lekiꞌ-lekiꞌna kodatua hei lekiꞌ-lekiꞌna wiharo.

¹⁶Ane mehupaꞌmoꞌi tempone, pinatuwuꞌ hante datu to hampuluꞌ tiꞌo hingkiꞌ mampokoiꞌhi towoweꞌe to mekokomaꞌi waliana, hingki' morompoꞌihi lekiꞌna to noꞌompui hei ropopelolawa, hingkiꞌ roꞌoka ohine hei to hawaꞌi roꞌoka rolobuni.

¹⁷Hapo to rowali tiꞌo, hintotoꞌ hante tungkaihana Pueꞌ Ala, alaꞌ Pueꞌ Ala to mampopengkaduiꞌ lalire datu tiꞌo hingkeꞌna mampopatengkaꞌhi tungkaihana. Iomo horiana datu tiꞌo hampekokirihi mepaꞌani kuasaꞌ poparentara pe pinatuwuꞌ, hingkeꞌna tebuhoꞌimo mpuꞌu hapo to nopowute Pueꞌ Ala.

¹⁸Mewaliꞌ, towoweꞌe to mekokomaꞌi waliana to iꞌokiꞌ tiꞌo, palaihana kota to kodeꞌ, datuna moparentai lekiꞌ-lekiꞌna datu i duniaꞌ.”