Read Rampi Wahiu 18 Bible Online

Wahiu 18 - Rampi bible

Wahiu 18

¹Koꞌukona malaꞌeka tiꞌo mololita, kuꞌokiꞌ womo malaꞌeka to ntaniꞌna mengkohou ka suruga. Kodeꞌ kuasaꞌne, hei nokomi pewantana, humanele duniaꞌ mewali mobaro.

²Io mololitamo nopokobue, notiꞌi, “Mokeromo! Mokeromo Babeli, kota to kodeꞌ! Mepongka hinewowoꞌena, kota hieꞌe hingkiꞌ ropeꞌohaꞌi lomoa hante kuasaꞌ to kodake hante lekiꞌ-lekiꞌna tinti to nikopali hante nikabiriꞌ.

³Mokeromo kota Babeli, alaꞌ toBabeli mampodulukimohi toaꞌ i humanele duniaꞌ hingkeꞌna maꞌinuhi to melolanu. Palaihana: mokeloihi toaꞌ mampetuntui peleihana lalira to mekokomaꞌi. Lekiꞌ-lekiꞌna datu i duniaꞌ mowalihi waliara to mekokomaꞌi hante iohi. Hei topobaluꞌ-baluꞌ i duniaꞌ mewalihi toaꞌ tosugiꞌ alaꞌ hapolu to rolei toBabeli rohili ka iohi.”

⁴Uko tiꞌo, kuhori womo loaꞌne hi Yesu ka suruga, Notiꞌi, “Polaimokei toaꞌKu! Ipolihimokei kota tiꞌo, hingkeꞌna hawaꞌkei motuntuni dosara, hei hingkeꞌna hawaꞌkei noniuꞌ pehuku to hingkiꞌ mewali itoꞌo.

⁵Alaꞌ woriꞌ mpololeke dosare, momeꞌodoꞌ-odoꞌmo wute i laniꞌ. Hei Pueꞌ Ala hingkiꞌ mohowoni lekiꞌ-lekiꞌna dosara.

⁶Iwalimokei pe io hibali hapo to nowali pe ingkei. Ihowonimokei rompiha lipaꞌ hapo to nowalimo, iꞌohimokei mangkuꞌre hante inua rompiha lipaꞌ komasaruꞌne ka inua to nopaꞌanikikei.

⁷ToBabeli tiꞌo hibali towoweꞌe to mampokokodeꞌ tuwuꞌra hei mowali hapolu motuntuni peleira. Mewaliꞌ Kuperapiꞌ hingkeꞌna Ipomanasahi hei Ipomasusahi, alaꞌ mampokokodeꞌhi, rotiꞌi: ‘Ingka hieꞌe datu towoweꞌe. Handoꞌioka tobembaꞌ. Hawaꞌka hingkiꞌ pahua komaporiꞌ.’

⁸Nokomi kohatoꞌona pekirira, i lali haꞌandolu to meꞌohaꞌ i kota Babeli hingkiꞌ norumpahi kohorewuꞌ hieꞌe: komahia, komaporiꞌ hei kobiloraha. Hei kota tiꞌo hingkiꞌ nihunu, alaꞌ to hingkiꞌ mohuku kota tiꞌo, Iomo Pueꞌ Ala to makuasaꞌ.”

⁹Datu-datu i duniaꞌ motuntunihi waliara toBabeli to mekokomaꞌi hei rolei mowali walia to motuntunilu peleihana lalira hibali toBabeli. Mewaliꞌ ane datu-datu tiꞌo pangkiꞌhi oroꞌ peꞌokana api i kota Babeli, hingkiꞌ ropeꞌoloni alaꞌ kopumpunamo.

¹⁰Hingkiꞌ roꞌele ngkoꞌela alaꞌ morokaꞌhi hingkiꞌ mekahi i lali poperima-rima to mewali i kota tiꞌo. Hei hingkiꞌ rotiꞌi, “Horewuꞌ! Horewuꞌ kota Babeli to kodeꞌ hei maroho! Hampaiꞌlu[31] nipoꞌuko alaꞌ pehukuna Pueꞌ Ala.”

¹¹Topobaluꞌ-baluꞌ i duniaꞌ hingkiꞌ masusa lalire hei hingkiꞌ meꞌolahi alaꞌ kopumpunamo kota Babeli, alaꞌ hamboaꞌmohi hingkiꞌ uwaꞌ to mehili baluꞌ-baluꞌra.

¹²Baluꞌ-baluꞌra tiꞌo, woriꞌ langkaꞌ. Uwaꞌ bulawa, peraꞌ, watu paramata, hei mutiara. Uwaꞌ baduꞌ to malolunu to rowali ka wida to masuliꞌ hante wida to momeaꞌ ba mangkononowa. Uwaꞌ baluꞌ-baluꞌre to rowali ka loti to mewowau, ka tengko gaja, ka loti to masuliꞌ, ka tembaga, ka besi hei ka watu manakiꞌ.

¹³Uwaꞌ loti koninoꞌ hei rampa-rampa ntaniꞌna. Uwaꞌ bokaꞌ to mewowau, dupaꞌ hante mire. Uwaꞌ anggoroꞌ, bokaꞌ saitu, tinampu, hei woiloꞌ. Uwaꞌ woꞌo gapiꞌ, gimba, nara, kereta nara, hei toaꞌ to ropohawiꞌ. Lekiꞌ-lekiꞌna baluꞌ-baluꞌra tepekahi woꞌo toaꞌ to nipohawiꞌ to nipobaluꞌ i toBabeli tiꞌo. Angkana alaꞌ komokerona kota Babeli, hamboaꞌmohi uwaꞌ to hingkiꞌ mehili.

¹⁴Iomo horiana topobaluꞌ-baluꞌ hingkiꞌ mampeꞌolonihi kota Babeli tiꞌo, hingkiꞌ rotiꞌi, “Lekiꞌ-lekiꞌna to ileikei hamboaꞌmo uwaꞌ. Lekiꞌ-lekiꞌna pangka to motomiꞌ hei lekiꞌ-lekiꞌna parewa to masuliꞌ, moholimo, hamboaꞌmo hingkiꞌ ihuakei.”

¹⁵Topobaluꞌ-baluꞌ tiꞌo mewalimohi toaꞌ tosugiꞌ alaꞌ mampobaluꞌhi lekiꞌ-lekiꞌna parewa i toBabeli. Angkana i tempora toBabeli nipoꞌuko, iohi hingkiꞌ metotiꞌihi ngkoꞌela mampeꞌele komokerona kota tiꞌo, alaꞌ morokaꞌhi noniuꞌ komaporiꞌ i kota tiꞌo. Hingkiꞌ meꞌolahi hei masusa lalire,

¹⁶hingkiꞌ rotiꞌi, “Horewuꞌ! Horewuꞌ kota to kodeꞌ! Hampiha toBabeli mopakeꞌ baduꞌ to malolunu, to momeaꞌ hei mangkononowa. Baduꞌra nibunga-bungai bulawa, watu paramata hei mutiara.

¹⁷Angkana hampaiꞌlu hei moholi kosugiꞌre tiꞌo!” Lekiꞌ-lekiꞌna toaꞌ to mampaliꞌhi kotuwuꞌra i tahiꞌ, moromiꞌ to mangkomi kapalaꞌ tahiꞌ, moromiꞌ topajama i kapalaꞌ hei lekiꞌ-lekiꞌna toaꞌ to mampaliꞌ kotuwuꞌana i tahiꞌ, hingkiꞌ metotiꞌiluhi ngkoꞌela

¹⁸mampeꞌele oroꞌ api to moneꞌ ka kota tiꞌo. Hingkiꞌ moloaꞌhi, rotiꞌi, “Hawaꞌi uwaꞌ kohibaliane kokodeꞌna kota tiꞌo!”

¹⁹Katoꞌo moꞌawuimohi tutuꞌra tandaꞌ komasusana lalira. Hingkiꞌ meꞌolahi honiꞌhi moloaꞌ, rotiꞌi, “Horewuꞌ! Horewuꞌ mpololeke kota to kodeꞌ tiꞌo! Alaꞌ komanobaꞌna, iomo horiana lekiꞌ-lekiꞌna to majama i kapalaꞌ tahiꞌ mewalihi toaꞌ tosugiꞌ. Angkana ele: hampaiꞌlu, kota tiꞌo uko!”

²⁰Motanaꞌ, motanaꞌmokei to meꞌohaꞌ i suruga. Ipomotanaꞌmokei komokerone! Motanaꞌ, motanaꞌmokei, toaꞌna Pueꞌ Ala, suro-suroNa hei nabi-nabiNa! Alaꞌ Pueꞌ Ala mohukumohi toBabeli, mohowoni waliara to kodake i ingkei.

²¹Uko tiꞌo, kuꞌokiꞌ haduo malaꞌeka to maroho mohini haꞌanu watu to kodeꞌ, hei kokodeꞌna hibali watu pogilia. Nopelubaꞌ pe tahiꞌ, notiꞌi, “Hibali watu to kupelubaꞌ i lali tahiꞌ hei hamboaꞌmo hingkiꞌ rohua huliꞌ, hatoꞌo woꞌo kota Babeli to kodeꞌ hingkiꞌ nokero Pueꞌ Ala, hei hamboaꞌmo hingkiꞌ roꞌaro huliꞌ.

²²Topokatapi, topolinga, topotulali hei tomotowuiꞌ torompeꞌ, hamboaꞌmohi hingkiꞌ nihori i kota tiꞌo. To mapande mowali tambi hei topokorohi hamboaꞌmohi hingkiꞌ uwaꞌ, monina pogilia hamboaꞌmo hingkiꞌ rohori.

²³Hamboaꞌmo hingkiꞌ uwaꞌ wantane palita. Hamboaꞌmo hingkiꞌ uwaꞌ posusaꞌ pepahamoko. Hingkiꞌ mondiiꞌ kota tiꞌo. Lekiꞌ-lekiꞌna hieꞌe hingkiꞌ mewali alaꞌ topobaluꞌ-baluꞌ i Babeli kodeꞌ konaꞌre i duniaꞌ, hei pedotira toBabeli ropakeꞌ mampomonawuꞌhi lekiꞌ-lekiꞌna toaꞌ i duniaꞌ.

²⁴To roposalaꞌ toBabeli, iomo porokoꞌra nabi-nabi hante toaꞌna Pueꞌ Ala. Hei masalaꞌhi woꞌo i porokoꞌra lekiꞌ-lekiꞌna toaꞌ i duniaꞌ.”