Read Rampi Wahiu 19 Bible Online

Wahiu 19 - Rampi bible

Wahiu 19

¹Uko tiꞌo, kuhori hibali loaꞌra toaꞌ to woriꞌ i suruga. Mololitahi ropokobue, rotiꞌi: “Haleluia! Topokodeꞌmo Pueꞌ Ala![32] Alaꞌ Io to mampaꞌaniki kotuwuꞌ to wolaꞌ. Io to manobaꞌ tuwuꞌNa hei to makuasaꞌ.

²Topokodeꞌ Pueꞌ Ala alaꞌ pobutusiNa mononto hei maniuꞌ. Nohukumo towoweꞌe to mekokomaꞌi mpololeke waliane, alaꞌ nokomi waliana to hawaꞌi masipatoꞌ, duniaꞌ hieꞌe metuntu pe io. Nohukumo towoweꞌe tiꞌo alaꞌ morokoꞌi rumbaꞌanahi Pueꞌ Ala.”

³Mololita womohi toaꞌ to woriꞌ ropokobue, rotiꞌi: “Haleluia! Oroꞌ ka api to mangka kota tiꞌo hingkiꞌ moneꞌ nturusi wute nantolou-louna.”

⁴Uko katoꞌo, to tuwuꞌ iba hei tadulako-tadulako to rompuluꞌ iba, melingkotuꞌmohi lekiꞌ-lekiꞌra i hinaro pahurahana Pueꞌ Ala, hei menombahi pe Io, rotiꞌi, “Amin! Haleluia!”

⁵Uko tiꞌo, kuhori womo loaꞌ to mololita ka pahura datu tiꞌo, notiꞌi: “Topokodeꞌ Pueꞌ Ala Pueꞌta, ingkei lekiꞌ-lekiꞌna to mewali rumbaꞌaNa! Topokodeꞌmo, ingkei lekiꞌ to mengkoruꞌ pe Io, mepongka to i wowoiꞌ tuwuꞌmi, wute-wute i to mokonaꞌ tuwuꞌmi!”

⁶Uko tiꞌo, kuhori woꞌo poloaꞌ-loaꞌre toaꞌ to woriꞌ. Poloaꞌra tiꞌo hibali peroruuna uwai to kodeꞌ, hei hibali monina boluntuꞌ. Kuhorihi mantiꞌi: “Haleluia, alaꞌ Pueꞌ Ala Pueꞌta to meliu kuasaꞌNa ka lekiꞌ-lekiꞌna, moparentamo!

⁷Humeimoki molinga-linga i komotanaꞌ-tanaꞌ, mampokodeꞌki konaꞌNa, alaꞌ hupaꞌmo ando konipohamokone Anaꞌ Gimba hei towoweꞌe to nipohamoko mampatimomomo wotana hingkiꞌ nipohamoko.[33]

⁸Pueꞌ Ala mampatimomokiꞌi baduꞌ to malolunu, to popuhiꞌ hei manakiꞌ.” (Baduꞌna toaꞌ to mepoꞌohi tiꞌo, mopalaiha waliara toaꞌna Pueꞌ Ala to tuꞌu.)

⁹Uko katoꞌo, notiꞌikiꞌa malaꞌeka tiꞌo, “Iꞌukiꞌmo waheꞌe: Motanaꞌhi toaꞌ to niwowoi nolou pe posusaꞌa pepohamoko Anaꞌ Gimba.” Hei notiꞌi womo, “Hieꞌemo lolitane Pueꞌ Ala, hei bateꞌna tuꞌu.”

¹⁰Katoꞌo metumpapaꞌa i kapuꞌna malaꞌeka tiꞌo menombaꞌa pe io, angkana notiꞌikiꞌa, “Anioꞌko hatoꞌo! Inioꞌa ipenombai, alaꞌ aku hieꞌe rumbaꞌanaluꞌa woꞌo Pueꞌ Ala hibali hante ingko hante lekiꞌ-lekiꞌna halali hampepoꞌohimu to mampangakuꞌ kohiYesuna Pueꞌra. Bateꞌnalu Pueꞌ Ala to masipatoꞌ ipenombai, alaꞌ Inohaꞌna Pueꞌ Ala to mampaꞌani kuasaꞌ pe toaꞌ hingkeꞌna mampowuteki kohiYesuna Datu to Mamposalamaꞌ.”

¹¹Uko tiꞌo, kuꞌokiꞌ suruga teweaꞌ, hei kuꞌokiꞌ hambaꞌa nara to popuhiꞌ. To mampelambaꞌi nara tiꞌo, konaꞌNa “To nipoꞌohi hei to tuꞌu.” Mononto pobutusiNe, hei ane moponiꞌI, moponiꞌ i lali kototuꞌuana.

¹²Matana mewanta hibali api to makiꞌ mpololeke, hei i tutuꞌNa woriꞌ totali datu. I wotaNa teꞌukiꞌ konaꞌNe, hei Iolu to pobahaꞌ palaihana konaꞌ tiꞌo.

¹³Hei Io mopakeꞌ Juba to nilomiꞌ i lali raꞌa. KonaꞌNa iomo “Boona Pueꞌ Ala.”

¹⁴Woriꞌ surodadu ka suruga motuntuniꞌi melambaꞌhi nara mpopuhiꞌ hei mebaduꞌhi to malolunu hante popuhiꞌ mpololeke hei to motuntuniꞌI kamuri, mampelambaꞌi woꞌo nara to popuhiꞌ. Baduꞌra ka wida to malolunu, popuhiꞌ hei hawaꞌi mokomaꞌ.

¹⁵Ka lali omeꞌNa mesuwumo lolita to hibali hamato piho to motari. Hei lolitaNa tiꞌo hingkiꞌ monanihi lekiꞌ-lekiꞌna toaꞌ to kodake i duniaꞌ. Uko tiꞌo, hingkiꞌ Noparentahi hante lekiꞌna rohoNa, hawaꞌi uwaꞌ to pobiaꞌ moꞌewaꞌI. Io to hingkiꞌ mampetidoꞌki kobukotana Pueꞌ Ala to Makuasaꞌ, hibali to mopiꞌi wuaꞌ anggoroꞌ i lali popiꞌia anggoroꞌ.

¹⁶I jubaNa tinaꞌ i paꞌaNa teꞌukiꞌ woꞌo haꞌanu konaꞌ: “Datu ka lekiꞌ-lekiꞌna datu, Pueꞌ ka lekiꞌ-lekiꞌna pueꞌ.”

¹⁷Uko tiꞌo, kuꞌokiꞌ haduo malaꞌeka to metotiꞌi i womboꞌ ando. Malaꞌeka tiꞌo mowowoi lekiꞌ-lekiꞌna tinti to kodeꞌ to meloka-loka i raoha, notiꞌi nopokobue, “Humeimokei pe posusaꞌ ngkodeꞌ to nopoꞌuwaꞌ Pueꞌ Ala.

¹⁸Humeimokei mangka ohira lekiꞌ-lekiꞌna to mahi: ohina datu, ohina tadulako mpoponiꞌ, ohina tantara, ohina nara to ropakeꞌ moponiꞌ, hei ohina toaꞌ to melambaꞌ i nara, hei ohina lekiꞌ-lekiꞌna toaꞌ, mepongka to i wowoiꞌ tuwuꞌra, wute-wute i to mokonaꞌ tuwuꞌra, moromiꞌ to nipohawiꞌ tuwuꞌra, moromiꞌ to hawaꞌi nipohawiꞌ tuwuꞌra.”

¹⁹Uko tiꞌo, kuꞌokiꞌ womo pinatuwuꞌ to kodake, hante datu-datu i duniaꞌ hei lekiꞌ-lekiꞌna surodadura, morampuhi hingkeꞌna moꞌewahi To mampelambaꞌi nara to popuhiꞌ moꞌawa hante surodaduNa.

²⁰Katoꞌo pinatuwuꞌ tiꞌo nihokiꞌ moꞌawa hante nabi to mepomonawuꞌ to mowalimo tanda-tanda to mepohele i hinarona pinatuwuꞌ tiꞌo. Hante to mepohele tiꞌo, Pinatuwuꞌ moꞌakalai toaꞌ to uwaꞌ tanda pinatuwuꞌ, hante toaꞌ-toaꞌ to menomba pe lentena pinatuwuꞌ tiꞌo. Katoꞌo pinatuwuꞌ tiꞌo hante nabi to mepomonawuꞌ tiꞌo nitube ntuwuꞌ pe lali tahiꞌ api belerang.[34]

²¹Katoꞌo, To melambaꞌ i nara to popuhiꞌ morokoꞌ lekiꞌ-lekiꞌna surodaduna pinatuwuꞌ tiꞌo, Norokoꞌhi hante lolitaNa to mesuwu ka omeꞌNa hibali piho. Hei uko tiꞌo, mehupaꞌmohi mpuꞌu tinti, mangka ohi toaꞌ to nirokoꞌ wutehi wohu mpololeke.