Read Rampi Wahiu 2 Bible Online

Wahiu 2 - Rampi bible

Wahiu 2

¹Notiꞌi hi Yesu pe aku, “Iꞌukiꞌmo lolita hieꞌe wute pe malaꞌeka to morewahi jumaꞌa to i kota Epesu: Hieꞌemo lolitane Toaꞌ to motiko betueꞌ to pitu onu i korawe kuanaNa, hei to matengkaꞌ i lumbuna pobuntaha huluꞌ bulawa to pitu onu.

²Kubahaꞌ hapo to iwalikei. Modotokei mampopatengkaꞌ jamangKu, hei mantahakei ane nipoperima-rimakei alaꞌ pepoꞌohimi pe Aku. Kubahaꞌ kohawaꞌne ileikei waliare toaꞌ to kodake. Hei ihohongkeꞌmokei toaꞌ to mantiꞌi koꞌiora surongKa, angkana kotuꞌuana hawaꞌi hatoꞌo. Ibahaꞌkei powutire, alaꞌ itandaimokei waliare.

³Kosabaraꞌmi hei komantahami i lali komaporiꞌ alaꞌ pepoꞌohimi pe Aku, hante hawaꞌi moledeꞌ lalimi metuntu pe Aku.

⁴Angkana uwaꞌ to Kusalaꞌikikei: pepokarimami hieꞌe hamboaꞌmo hibali to uluꞌ-uluꞌna.

⁵Iomo hinaꞌ Kutiꞌikikei: Inioꞌ ikolembulihakikei pepokarimami hampiha. Hinewowoꞌena monawuꞌmokei i lali dosa. Mewaliꞌ, mengkatobaꞌmokei! Iwalimokei huliꞌ hapo to iwalikei uluꞌ-uluꞌmi mekahi mosarani. Alaꞌ ane hawaꞌi iwalikei hatoꞌo, hingkiꞌ mehupaꞌA mohukukei hante mampopolai pobuntaha huluꞌmi ka peꞌohaꞌana.

⁶Angkana uwaꞌ woꞌo waliami to moromiꞌ, alaꞌ ipokoiꞌkei waliare toaꞌ to mampetuntui poturuꞌna hi Nikolau[3] tota tuꞌu. Aku woꞌo mampokoiꞌ waliana tiꞌo.

⁷Moromiꞌ mpololeke ane ipoꞌilalikei hapo to notiꞌi Inohaꞌna Pueꞌ Ala pe jumaꞌa-jumaꞌa. Himo to penani ka kuasaꞌ topekelo, Kupoliu mangka wuaꞌ ka Loti to mampoꞌuwaꞌ kotuwuꞌ to hawaꞌi mokoꞌukoa, i Kineteꞌ Paradesi i suruga.”

⁸Uko tiꞌo, notiꞌi womo Pueꞌ Yesu pe aku, “Iꞌukiꞌmo lolita hieꞌe wute pe malaꞌeka to morewahi jumaꞌa to i kota Simirna: Hieꞌemo lolitane Toaꞌ to Uluꞌna hei to Koꞌukoana, to mahimo angkana tuwuꞌmo huliꞌ.

⁹Kubahaꞌ komaporiꞌ to morumpakei nokomi konipoperima-rimami, hei Kubahaꞌ komerima-rimami, angkana kotuꞌuana sugiꞌkei i lali pepoꞌohimi. Kubahaꞌ hohumbo korosalaꞌimi toaꞌ to mantiꞌi kotoYahudira. Angkana Kurekeꞌ handoꞌiohi toYahudi, hampalenareꞌi topegurunahi Belisiꞌ.

¹⁰Inioꞌkei morokaꞌ ikohingkiꞌ nipoperima-rimami. Hingkeꞌ ibahaꞌkei, Belisiꞌ hingkiꞌ motarungkuꞌ hantenaꞌ ka ingkei, hei hingkiꞌ nokelo-keloikei hingkeꞌna maꞌoruꞌkei ka pepoꞌohimi. Hingkiꞌ nipoperima-rimakei hampuluꞌ ando komoruene angkana inioꞌ ikorokaꞌkei. Hangangaa mantahakei i lali pepoꞌohimi, kehapokei hingkiꞌ nirokoꞌ. Ane hatoꞌoꞌi, hingkiꞌ Kupaꞌanikei kotuwuꞌ to wolaꞌ to hawaꞌi mokoꞌukoa, howonina ka kopenanimi.

¹¹Moromiꞌ mpololeke ane ipoꞌilalikei hapo to notiꞌi Inohaꞌna Pueꞌ Ala pe jumaꞌa-jumaꞌa. Himo to penani ka kuasaꞌ topekelo, hawaꞌhi mpuꞌu hingkiꞌ pahua komahia to korompihana.”

¹²Uko tiꞌo, Notiꞌi womo pe aku, “Iꞌukiꞌmo lolita hieꞌe pe malaꞌeka to morewahi jumaꞌa to i kota Pergamus: Hieꞌemo lolitane Toaꞌ to motiko piho to motari hei kemata motimali.

¹³Notiꞌi: Kubahaꞌ i imbo peꞌohaꞌami. Meꞌohaꞌkei i lumbura toaꞌ to nokuasaꞌi Belisiꞌ. Angkana ipangakuꞌAkei nturusi, kehapoꞌi sabiꞌKu hi Antipa, to tungkuꞌ tiꞌo, nirokoꞌ i kotami to nokuasaꞌi Belisiꞌ.

¹⁴Angkana uwaꞌ halangkaꞌ to Kusalaꞌikikei: uwaꞌ hantenaꞌ ka ingkei to mampetuntui poturuꞌna hi Bilea. Hampiha hi Bilea tiꞌo mopaguru hi Balaꞌ hohumbo lalane mampomonawuꞌ toSaraeli hingkeꞌna madosahi. Nowonahi mangka pangka to ropopenomba pe lomoa, hei nowonahi mowali salaꞌ to mekokomaꞌi.

¹⁵Hatoꞌo woꞌo, uwaꞌ hantenaꞌ ka ingkei to mampetuntui poturuꞌra topeguruna hi Nikolau.

¹⁶Iomo horiana Kutiꞌikikei, mengkatobaꞌmokei ka dosami tiꞌo! Ane hawaꞌi, hingkiꞌ humeiꞌA moponiꞌ hante ingkei hante pohawaꞌKu to hibali piho to mesuwu ka omeꞌKu.

¹⁷Moromiꞌ mpololeke ane ipoꞌilalikei hapo to notiꞌi Inohaꞌ Pueꞌ Ala pe jumaꞌa-jumaꞌa. Himo to penani ka kuasaꞌ topekelo, hingkiꞌ Kupaꞌanihi roti manna to tewuni. Hingkiꞌ Kupaꞌanikihi woꞌo haꞌanu watu to popuhiꞌ. I watu tiꞌo teꞌukiꞌ konaꞌ to wolaꞌ, to hawaꞌi robahaꞌ toaꞌ ntaniꞌna. Angkana to pobahaꞌ, bateꞌnalu to mantorimo watu tiꞌo.”

¹⁸Uko tiꞌo, Notiꞌi womo pe aku, “Iꞌukiꞌmo lolita hieꞌe pe malaꞌeka to morewahi jumaꞌa to i kota Tiatira: Hieꞌemo lolitane Anaꞌna Pueꞌ Ala; mataNa mewanta hibali makiꞌna api, hei kapuꞌNa manakiꞌ hibali tembaga to hongkoꞌ nipomanakiꞌ.

¹⁹Notiꞌi: Kubahaꞌ hapo to iwalikei, moromiꞌ rimami, moromiꞌ pepoꞌohimi pe Aku. Moromiꞌ pampopatengkaꞌmi jamangKu, moromiꞌ kosabaraꞌmi i lali komaporiꞌ. Modotokei tene mampopatengkaꞌ jamangKu hinewowoꞌena hintina hampiha.

²⁰Angkana uwaꞌ tene to Kusalaꞌikikei. Uwaꞌ haduo towoweꞌe i lumbumi to kodake waliana hibali kokodakena waliana datu Isebe to tuwuꞌ hampiha. Io mantiꞌi koꞌiona haduo nabi, hei ipotedehilukei mopaguru toaꞌ to mepoꞌohi pe Aku. Hantaro towoweꞌe tiꞌo mampoturuꞌhi hingkeꞌna mowalihi walia to mekokomaꞌi, hei mangkahi pangka to ropopenomba pe lomoa. Woriꞌ hawiꞌ-hawiꞌKu ropokonawuꞌ hante poturuꞌna tiꞌo.

²¹Kupaꞌanimo tempo pe io hingkeꞌna mengkatobaꞌ ka dosana, angkana io hawaꞌi hiniꞌ mengkatobaꞌ ka waliana to mekokomaꞌi tiꞌo.

²²Io horiana, hingkiꞌ Kupomahakiꞌhi hingkeꞌna tontona i koturuana moꞌawa hante awana hampomebualosiana. Ane toaꞌ tiꞌo hawaꞌhi mampohente petuntura i waliana towoweꞌe tiꞌo, hingkiꞌ makaja mpololeke komaporiꞌre.

²³Hingkiꞌ Kurokoꞌ lekiꞌ-lekiꞌna toaꞌ to mampetuntui waliana. Mepongka katoꞌo, hingkiꞌ mombaha pe lekiꞌ-lekiꞌna jumaꞌa koꞌAkuna to pobahaꞌ pekiri hei lalina toaꞌ, hei hingkiꞌ Kupaꞌanikei howonina hintotoꞌ hante waliami haduo-haduo.

²⁴Angkana uwaꞌ woꞌo hantenaꞌ to hawaꞌi mampetuntui poturuꞌ to kodake tiꞌo, hei hawaꞌikei hiniꞌ mampegurui poturuꞌ to rotiꞌi bahaꞌna Belisiꞌ to tewuni. Mewaliꞌ Kutiꞌikikei, hawaꞌi hingkiꞌ Kutambai lentuami hante hawaꞌ ntaniꞌna.

²⁵Angkana hangangaa ipetuntuikei nturusi poturuꞌKa to ibahaꞌmokei, wute i kohupaꞌKu.

²⁶Himo to penani ka kuasaꞌ topekelo hei mampetuntui peleihangKu wute i kotutuana, hingkiꞌ Kupaꞌanikihi kuasaꞌ hibali hante kuasaꞌ to Kutorimo ka UmoꞌKu. Hingkiꞌ Kupaꞌanikihi kuasaꞌ moparentai toaꞌ i humanele duniaꞌ. Komarohona kuasaꞌKu to Kupaꞌanikihi tiꞌo hibali komarohona laiꞌ besi. Kuasaꞌ tiꞌo hingkiꞌ nipakeꞌ moropuꞌi lekiꞌ-lekiꞌna poniꞌra hibali kiri woiꞌ to nirutu.

²⁸Hingkiꞌ Kupaꞌanihi betueꞌ motoꞌando pe to penani.[4]

²⁹Moromiꞌ mpololeke ane ipoꞌilalikei hapo to notiꞌi Inohaꞌna Pueꞌ Ala pe jumaꞌa-jumaꞌa.”