Read Rampi Wahiu 20 Bible Online

Wahiu 20 - Rampi bible

Wahiu 20

¹Uko tiꞌo, kuꞌokiꞌ womo haduo malaꞌeka mengkohou ka suruga. Io mangkomi rante to kodeꞌ hei pegili wambaꞌ tua pehukua to hawaꞌi mokohukaꞌa kokuladune.

²Malaꞌeka tiꞌo mohokiꞌ naga; iomo ule to uluꞌana to nikokeneꞌi Belisiꞌ hei Tadulako Lomoa. Uko tiꞌo, nohiluꞌ hante rante, honiꞌi notube pe lali tua pehukua to hawaꞌi mokohukaꞌa kokuladune. Wambaꞌna nogili, hei notandaꞌi hingkeꞌna hawaꞌi teweaꞌ i lali hasabu ntoꞌa komoruene. Mewaliꞌ, Belisiꞌ tiꞌo hamboaꞌmo wadi mampomonawuꞌ toaꞌ i lali hasabu ntoꞌana. Angkana ane tutumoꞌi tempo tiꞌo, hingkiꞌ nipolohoꞌ hampaiꞌ.

⁴Uko tiꞌo, kuꞌokiꞌ haꞌumbora pahura to ropahurai toaꞌ to nipaꞌani kuasaꞌ mobutusi kara-karara toaꞌ. Kuꞌokiꞌ woꞌo tanuanaꞌre toaꞌ to nibokuꞌ tutuꞌra alaꞌ mampangakuꞌhi kohiYesuna Pueꞌra hei pampowutera pohawaꞌna Pueꞌ Ala. Toaꞌ tiꞌo, hawaꞌhi menomba i pinatuwuꞌ to kodake, hawaꞌhi menomba i lentena pinatuwuꞌ tiꞌo, hei hawaꞌhi woꞌo mantorimo tandaꞌ pinatuwuꞌ tiꞌo i rouꞌra ba i korawera. Iomo hinaꞌ nipotuwuꞌhi huliꞌ hei moparentahi moꞌawa hante Kerisitu hasabu ntoꞌa komoruene.

⁵Iomo peꞌaro to mahi to uluꞌ-uluꞌna. (Angkana toaꞌ to ntaniꞌna to mahi, handoaꞌhi tene nipotuwuꞌ huliꞌ i lali hasabu ntoꞌa tiꞌo.)

⁶Motanaꞌhi hei mangkolehihi toaꞌ to nipotuwuꞌ huliꞌ i peꞌarora to mahi to uluꞌ-uluꞌna. Alaꞌ komahia to korompihana hawaꞌi mokuasaꞌihi. Toaꞌ to nipatuwuꞌ huliꞌ i peꞌaro to uluꞌ-uluꞌna tiꞌo hingkiꞌ mewalihi tadulako mpenomba pe Pueꞌ Ala hei i Kerisitu. Hingkiꞌ moparentahi moꞌawa hante Kerisitu i lali hasabu ntoꞌa komoruene.

⁷Ane tutumoꞌi hasabu ntoꞌa Belisiꞌ tiꞌo, hingkiꞌ ropolohoꞌmo ka konitarungkuꞌana,

⁸hei io hingkiꞌ nolou mampokonawuꞌ toaꞌ i humanele duniaꞌ, to nipandiriꞌ hibali Gog hei Magog.[35] Norampuhi Belisiꞌ hingkeꞌna nolouhi moponiꞌ. Koworiꞌra hibali woꞌoni i bota ntahiꞌ.

⁹Hingkiꞌ nolouhi pe humanele duniaꞌ, honiꞌi morampuhi hingkeꞌna molimbuꞌhi kota Yerusale to nopokarima Pueꞌ Ala hei to ropeꞌohaꞌi toaꞌNa. Angkana hangkaꞌ-hangkaꞌlu hingkiꞌ mengkohou humei api ka laniꞌ mampopumpuhi.

¹⁰Uko tiꞌo, Belisiꞌ to mampomonawuꞌ toaꞌhi, hingkiꞌ nitube pe lali tahiꞌ api belerang to makiꞌ mpololeke. Tahiꞌ api tiꞌomo konitubearemo pinatuwuꞌ to kodake hante nabi to mepomonawuꞌ. Itoꞌo, hingkiꞌ nipoperima-rimahi nturusi wute nantolou-louna.

¹¹Uko tiꞌo, aku hi Yohanes pangkiꞌa haꞌanu pahura datu to popuhiꞌ hei kodeꞌ, hei kuꞌokiꞌ woꞌo Haduo to mahura i pahura tiꞌo. Alaꞌ komakuasaꞌNa, laniꞌ hante duniaꞌ hangkaꞌ-hangkaꞌ romo moholi, hamboaꞌmo uwaꞌ.

¹²Hei kuꞌokiꞌhi toaꞌ to mahi to nipotuwuꞌ huliꞌ, mepongka to i wowoiꞌ tuwuꞌra, wute-wute i to mokonaꞌ tuwuꞌra, metotiꞌihi i hinarona Haduo to mahura i pahura tiꞌo. Toaꞌ to mahi i tahiꞌ, hei lekiꞌ-lekiꞌna toaꞌ to i peꞌohaꞌa to mahi, nipatuwuꞌ huliꞌ, honiꞌhi metotiꞌi lekiꞌ-lekiꞌra i hinaroNa Toaꞌ tiꞌo. Uko tiꞌo, suraꞌ-suraꞌ niwuraꞌ. I lali suraꞌ-suraꞌ tiꞌo, teꞌukiꞌ waliara lekiꞌ-lekiꞌna toaꞌ. Katoꞌo, lekiꞌ-lekiꞌna to mahi hingkiꞌ nihukuhi hintotoꞌ hante hapo to teꞌukiꞌ i lali suraꞌ-suraꞌ tiꞌo, konihukura tiꞌo mampetuntui waliara hadoduora. Hei niwuraꞌmo woꞌo suraꞌ to ntaniꞌna, konaꞌna Suraꞌ Ngkotuwuꞌ. Itoꞌo teꞌukiꞌ konaꞌ-konaꞌ toaꞌ to hingkiꞌ pahua kotuwuꞌ to wolaꞌ to hawaꞌi mokoꞌukoa.

¹⁴Lekiꞌ-lekiꞌna toaꞌ to hawaꞌi teꞌukiꞌ konaꞌra i lali Suraꞌ Ngkotuwuꞌ nitube pe lali tahiꞌ api. Pehuku tiꞌo iomo to nikokeneꞌi komahia to korompihana. Uko tiꞌo, peꞌohaꞌana to mahi nitubemo pe tahiꞌ api, alaꞌ hamboaꞌmo hingkiꞌ uwaꞌ komahia.