Read Rampi Wahiu 21 Bible Online

Wahiu 21 - Rampi bible

Wahiu 21

¹Uko tiꞌo, kuꞌokimo laniꞌ hante woiꞌ to wolaꞌ, alaꞌ laniꞌ, woiꞌ hante tahiꞌ to uluꞌ-uluꞌna moholi, hamboaꞌmo uwaꞌ.

²Hei kuꞌokimo kota to mangkolehi, to nikokeneꞌi Yerusale to wolaꞌ. Kota tiꞌo mengkohou humei ka Pueꞌ Ala i suruga. Manobaꞌ mpuꞌu kota tiꞌo, hibali haduo towoweꞌe to hingkiꞌ nipohamoko nibaduꞌi nipomaranga alaꞌ hingkiꞌ modupaꞌi tomaꞌani.

³Hei kuhori womo loaꞌ to mololita nopokobue ka pahura kodatuana Pueꞌ Ala, notiꞌi, “Ele! Hinewowoꞌena peꞌohaꞌana Pueꞌ Ala uwaꞌ moꞌawa hante toaꞌ. Io hingkiꞌ meꞌohaꞌ moꞌawa hante toaꞌ, hei hingkiꞌ Nopopewalihi toaꞌNa. Io hadoduoNa to hingkiꞌ mampoꞌawahi hei Io hingkiꞌ mewali Pueꞌra.

⁴Io hingkiꞌ mopahi uwai matara. Hamboaꞌmo hingkiꞌ uwaꞌ to mahi, hamboaꞌmo hingkiꞌ uwaꞌ to masusa laline ba to meꞌola, hamboaꞌmo hingkiꞌ uwaꞌ to mohakiꞌ, alaꞌ lekiꞌ-lekiꞌna to mewali tiꞌo liumo, hei hamboaꞌmo hingkiꞌ mewali.”

⁵Uko tiꞌo, notiꞌi Haduo to mahura i pahura kodatua, “Ele, hinewowoꞌena hingkiꞌ Kuwolaꞌi lekiꞌ-lekiꞌna. Iꞌukiꞌmo lolitangKa hieꞌe, alaꞌ bateꞌna tuꞌu hei bateꞌna tebuhoꞌi.”

⁶Uko katoꞌo, Notiꞌikiꞌa womo, “Tutumo! Akumo hieꞌe Alpa hei Omega.[36] Aku to Pepongkana hei to Koꞌukoana. Lekiꞌna toaꞌ to mangkumaro, hingkiꞌ Kupaꞌanikihi uwai ka ulu uwai Ngkotuwuꞌ to moromiꞌ to hawaꞌi mokoꞌukoa. Uwai tiꞌo hingkiꞌ Kupaꞌanikihi ntooꞌ-ntooꞌ.

⁷Himo to penani ka Belisiꞌ, hingkiꞌ pahuahi lekiꞌ-lekiꞌna tiꞌo. Aku hingkiꞌ mewali Pueꞌra hei hingkiꞌ mewalihi anaꞌKu.

⁸Angkana toaꞌ to morokaꞌhi metuntu pe Aku, toaꞌ to hawaꞌhi mepoꞌohi pe Aku, toaꞌ to kodake mpololeke waliara, to merorokoꞌ, to mekokomaꞌi waliara, topedoti, topenomba pe lentena lomoa, hei topowuti, bateꞌra hingkiꞌ nihuku lekiꞌ-lekiꞌra i lali tahiꞌ api belerang to makiꞌ mpololeke. Iomo to rotiꞌi komahia to korompihana.”

⁹Uko tiꞌo, mehupaꞌmo haduo ka malaꞌeka to pitu to motiko mangkuꞌ to buhaꞌ hante pitu langkaꞌ kohorewuꞌ to koꞌukoana. Malaꞌeka tiꞌo mampatiꞌikiꞌa, “Yohanes, humeimoko, hingkiꞌ kutidoꞌkiko haduo towoweꞌe[37] to hingkiꞌ nipohamoko hante Anaꞌ Gimba.”

¹⁰Nokuasaꞌiꞌa Inohaꞌ Mangkolehi, honiꞌi malaꞌeka tiꞌo mangkomiꞌa nolou pe wombo' biri to kodeꞌ hei dingkaoꞌ. Mepongka katoꞌo, notidoꞌkiꞌa Yerusale to wolaꞌ, kota to mangkolehi. Kuꞌokiꞌ kota tiꞌo mengkohou humei ka Pueꞌ Ala i suruga.

¹¹Kota tiꞌo mewanta nokomi komanobaꞌna Pueꞌ Ala, manakiꞌ hibali watu paramata to masuliꞌ hei hibali watu mpisiꞌ, hei moꞌinoto hibali watu kaca.

¹²Kota tiꞌo notuleliꞌi bente kota to dingkaoꞌ hei maroho. I bente tiꞌo, uwaꞌ hampuluꞌ meroꞌonu wambaꞌ. Haꞌanu-haꞌanu wambaꞌ nopoꞌodaꞌ haduo malaꞌeka, hei i haꞌanu-haꞌanu wambaꞌ, ropoꞌukiꞌi konaꞌra haduo-haduo anaꞌna hi Saraeli to hampuluꞌ meroduo, to mewali hampuluꞌ merontino toSaraeli.

¹³Bente kota tiꞌo, tolu-tolu onu wambaꞌne: tolu tinaꞌ i motoꞌando, tolu tinaꞌ i utara, tolu tinaꞌ i selatan, hei tolu tinaꞌ i kotompuha ando.

¹⁴Bente kota tiꞌo roꞌaro i womboꞌ hampuluꞌ meroꞌonu watu to kodeꞌ mpololeke, hei i haꞌanu-haꞌanu watu tiꞌo, ropoꞌukiꞌi konaꞌra haduo-haduo surona Anaꞌ Gimba to hampuluꞌ meroduo

¹⁵Malaꞌeka to mololita i aku tiꞌo, motiko laiꞌ popehukaꞌ to niwali ka bulawa, hingkeꞌna kota tiꞌo nohukaꞌ, hatoꞌo woꞌo bentena hante wambaꞌna.

¹⁶Kota tiꞌo iba mpolohu. Kokurauꞌna hante kokorobana hibobali. Malaꞌeka tiꞌo mohukaꞌ kota tiꞌo hante laiꞌ popehukaꞌna: 2.400 kilometeꞌ kokurauꞌne, kokorobana, hante kodingkaoꞌna.

¹⁷Bente kota tiꞌo nohukaꞌ woꞌo: komakambana[38] oni mpuluꞌ meteꞌ. Pohukaꞌ to nopake malaꞌeka tiꞌo iomo pohukaꞌ to nopakeꞌ toaꞌ.

¹⁸Bente kota tiꞌo rowali ka watu mpisiꞌ to masuliꞌ hilina. Kota tiꞌo rowali ka bulawa to manakiꞌ mpololeke hei hibali kaca.

¹⁹Pahurahana bente kota tiꞌo nibungai hante watu to maranga hei molangkaꞌ-langkaꞌ. To uluꞌ-uluꞌna iomo watu mpisiꞌ to mangkomomataꞌ. To koroꞌonuna iomo watu nilam to momataꞌ mpololeke. To katolu iomo watu mira to popuhiꞌ hei manakiꞌ. To kaꞌiba iomo watu samrut to hibali taweꞌ to mangkomomataꞌ hei manakiꞌ.

²⁰To kalimo iomo watu unam to popuhiꞌ hei momeaꞌ mangkononowa. To ka oni iomo watu sardis to momeaꞌ mangkoꞌoꞌiti. To kapitu iomo watu cempaka to molingkokuniꞌ hei manakiꞌ. To kawalu iomo watu beril to mangkomomataꞌ hibali tolu tinti timokoꞌ. To kahio iomo watu krisolit to molingkokuniꞌ mpololeke hei manakiꞌ. To ka hampuluꞌ iomo watu krisopras to mangkomomataꞌ hibali lokaꞌ to handoaꞌi tene mangke. To ka hampuluꞌ isaꞌ iomo watu Lasuardi to momataꞌ hibali laniꞌ. Hei to kohampuluꞌ meroꞌonu iomo watu kecubung to momeaꞌ mangkononowa.

²¹Wambaꞌ to hampuluꞌ meroꞌonu tiꞌo, lekiꞌ-lekiꞌna rowali ka watu mutiara. Haꞌanu-haꞌanu wambaꞌ rowali ka haꞌanu mutiara to kodeꞌ. Lala ngkodeꞌ i kota tiꞌo rowali ka bulawa to manakiꞌ hibali kaca to mewanta.

²²Hawaꞌa pangkiꞌ tambina Pueꞌ Ala i lali kota tiꞌo, alaꞌ tambina Pueꞌ Ala iomo Pueꞌ Ala hadoduona to Makuasaꞌ, hante Anaꞌ Gimba.

²³Kota tiꞌo hawaꞌi paralu nowanta ando ba wula, alaꞌ Pueꞌ Ala hante Anaꞌ Gimba to mowantaiꞌi kota tiꞌo.

²⁴Lekiꞌ-lekiꞌna toaꞌ i duniaꞌ hingkiꞌ matengkaꞌ i lali komobaro to ka Pueꞌ Ala, hei datu-datu i duniaꞌ hingkiꞌ mangkomihi kosugiꞌara mekahi pe lali kota tiꞌo.

²⁵Wambaꞌ bente kota tiꞌo hingkiꞌ teweaꞌ nturusi ando-ando, hei hawaꞌi hingkiꞌ rotutuꞌi, alaꞌ wini hamboaꞌmo uwaꞌ.

²⁶Toaꞌ ka lekiꞌ-lekiꞌna woiꞌ i duniaꞌ hingkiꞌ mangkomihi lekiꞌna kosugiꞌara mekahi pe lali kota tiꞌo.

²⁷Angkana hapo to mekokomaꞌi hawaꞌi mpuꞌu wadi mekahi i lali kota tiꞌo. Mewaliꞌ toaꞌ to mowali dake ba to mowuti, hawaꞌhi wadi mekahi. To wadi mekahi, bateꞌnalu toaꞌ to teꞌukiꞌ konaꞌra i lali Suraꞌ Ngkotuwuꞌ, iomo suraꞌna hi Yesu to nipandiriꞌ hibali Anaꞌ Gimba. Suraꞌ tiꞌo suraꞌ poꞌukiꞌa konaꞌra toaꞌ to pahua kotuwuꞌ to wolaꞌ to hawaꞌi mokoꞌukoa.